1. ‘Ua mavae ia mea, ‘ona oti ai lea o Naasa le tupu o le fānauga a Amoni; ‘ona soloa‘i ane ai lea o lona atali‘i e fai ma tupu.
2. ‘Ona fa‘apea ane ai lea o Tavita, “‘Ou te agalelei atu ia Anuni, le atali‘i o Naasa, auā na agalelei mai lona tamā ‘iā te a‘u.” ‘Ona ‘auina atu ai lea e Tavita o le sāvali e fa‘amatalaloto ‘iā te ia ‘ona o lona tamā.‘Ua o‘o atu ‘au‘auna a Tavita i le nu‘u o le fānauga a Amoni ‘iā Anuni e fa‘amatalaloto ‘iā te ia.
3. A ‘ua fai atu ali‘i o le fānauga a Amoni ‘iā Anuni, “‘E te manatu ‘ea, na āva mai Tavita i lou tamā, ‘ina ‘ua ‘a‘auina mai nisi e fa‘amatalaloto ‘iā te oe? ‘Ua lē ō mai ‘ea ana ‘au‘auna ‘iā te oe e iloilo ma fa‘aumatia ma agaga i le nu‘u?”
4. ‘Ona pupu‘e ai lea o Anuni i ‘au‘auna a Tavita, ‘ua ia tafi a latou ‘ava ma na sesele ‘ese o latou ‘ofu i totonu, e pau atu i o latou nofoaga; ‘ona ‘a‘au ‘ese atu lea e ia ‘iā te i latou.
5. ‘Ua ō atu nisi ma ta‘u atu ‘iā Tavita o mea na faia i na tagata. ‘Ona ‘a‘auina atu ai lea o ia nisi e fa‘afetaia‘i ‘iā te i latou, auā ‘ua matuā tele le mā o ia tagata. ‘Ua fai atu fo‘i le tupu, “‘Ia ‘outou nonofo i Ieriko se‘ia tutupu a ‘outou ‘ava, ‘ona ‘outou fo‘i mai ai lea.”
6. ‘Ua iloa e le fānauga a Amoni ‘ua ‘inosia i latou e Tavita, ‘ona avatua ai lea e Anuni ma le fānauga a Amoni o taleni ario e tasi le afe e fa‘a‘oloatau‘aina mo i latou o kariota ma ‘au e ti‘eti‘e i solofanua mai Mesopotamia ma Suriamaaka ma Sopa.
7. ‘Ua latou fa‘a‘oloatau‘aina mo i latou o kariota e tolu sefulu o afe ma afe e lua ma le tupu o Maaka ma ona tagata, na latou ō mai ma tolauapi i luma o Metepa. ‘Ua fa‘apotopoto mai fo‘i le fānauga, a Amoni nai o latou ‘a‘ai ‘ua ō mai e tau ai le tau‘a.
8. ‘Ua fa‘alogo i ai Tavita, ‘ona ‘a‘auina atu ai lea o Ioapo ma ‘au uma o ē fitafita.
9. ‘Ua ō atu le fānauga a Amoni, ‘ua tofi le tau‘a i le faitoto‘a o le ‘a‘ai; a o tupu na ō mai, ‘ua nonofo ‘ese i latou i le vao.
10. ‘Ua iloa e Ioapo ‘ua fa‘asaga mai le tau‘a ‘iā te ia i luma ma tua, ‘ona filifili lea e ia nisi i taulele‘a uma o Isaraelu, ‘ua ia tofia fo‘i i latou ‘ia fa‘afesaga‘i ma Suria.
11. A o ē na totoe o le nu‘u, na ia tu‘uina atu i le pule a Apisai lona uso ma ‘ua latou fa‘asaga tau i le fānauga a Amoni.
12. ‘Ona fai atu ai lea o ia, “‘Āfai e mālō mai Suria ‘iā te a‘u, ‘ona e fesoasoani mai ai lea ‘iā te a‘u; ‘ae ‘āfai e mālō mai le fānauga a Amoni ‘iā te oe, ‘ona ‘ou fesoasoani atu ai lea ‘iā te oe.
13. ‘ia e fa‘amalosi ma ‘ia fa‘amalolosi i tatou ‘ona o lo tatou nu‘u ma ‘a‘ai a lo tatou Atua; a ‘ia faia e le ALI‘I le mea e finagalo i ai o ia.”
14. ‘Ona fa‘alatalata atu lea o Ioapo ma tagata sa ‘iā te ia ‘iā Suria, e tau ai le tau‘a; ‘ona latou sōsōla atu ai lea i ona luma.
15. ‘Ua va‘ava‘ai atu le fānauga a Amoni ‘ua sōsōla Suria, ‘ona latou sōsōla fo‘i lea i luma o Apisai lona uso ma ō atu i le ‘a‘ai. ‘Ona alu ai lea o Ioapo i Ierusalema.
16. ‘Ua iloa e Suria ‘ua fasia i latou e Isaraelu, ‘ona latou tu‘u sāvali ai lea, ‘ona latou fa‘ala‘ei‘au mai lea o Suria sa i tala atu o le vaitafe; o Sopaka fo‘i o lē na pule i ‘au a Atatesa ‘ua muamua ‘iā te i latou.
17. ‘Ua ta‘ua mai ‘iā Tavita; ‘ona fa‘apotopotoina lea e ia o Isaraelu uma, ‘ua ia sopo‘ia atu Ioritana ma ‘ua o‘o atu ‘iā te i latou, ‘ua ia tofi fo‘i le tau‘a ‘iā te i latou. ‘Ua tofi e Tavita le tau‘a e fa‘asaga atu ‘iā Suria, ‘ona latou tau ai lea ma ia.
18. A ‘ua sōsōla Suria i luma o Isaraelu, ‘ua fasia e Tavita o Suria e fitu afe o tagata na tau i kariota ma ‘au e sāvavali e fa sefulu o afe; ‘ua fasiotia fo‘i Sopaka o lē na pule i ‘au.
19. ‘Ua iloa e ‘au‘auna a Atatesa ‘ua fasia i latou i luma o Isaraelu, ‘ona latou fa‘alelei ai lea ‘iā Tavita, ma latou nofo pologa ‘iā te ia; ‘ona lē toe mafai ai lea e Suria ‘ona fesoasoani i le fānauga a Amoni.