1. Na si‘i mai le tau‘a e Filisitia ‘iā Isaraelu; ‘ona sōsōla lea o tagata Isaraelu a‘i luma o Filisitia, ‘ua pa‘u‘ū i latou i le mauga o Kilepoa ‘ua manunu‘a.
2. ‘Ua tulitatao Filisitia ‘iā Saulo ma ona atali‘i ma ‘ua fasiotia e Filisitia o Ionatana ma Apinatapa ma Makisua, o atali‘i o Saulo.
3. ‘Ua mamafa le tau‘a ‘iā Saulo, ‘ua maua atu o ia e tagata fanafana u ma ‘ua manu‘a o ia i ē na fanafana.
4. ‘Ona fai atu lea o Saulo i lona soātau, “‘Inā tō a‘e ia lau pelu ma tutu‘i mai ‘iā te a‘u, ne‘i o‘o mai na tagata le peritomeina ma fa‘aleaga mai ‘iā te a‘u;” a ‘ua lē mafai lona soātau, auā ‘ua tele lona fefe; ‘ona tago ai lea o Saulo i le pelu ma fa‘apa‘ū i ona luga.
5. ‘Ua va‘ai lona soātau, ‘ua oti Saulo, ‘ona fa‘apa‘ū fo‘i lea o ia i luga o le pelu, ‘ua oti ai.
6. O lea ‘ua oti ai Saulo ma ona atali‘i o to‘atolu, ma lona ‘āiga uma ‘ua oti fa‘atasi.
7. ‘Ua va‘ai tagata o Isaraelu uma sa i le vanu, ‘ua sōsōla i latou ma ‘ua oti Saulo ma ona atali‘i; ‘ona tia‘i ai lea e i latou o a latou ‘a‘ai ma sōsōla i latou; ‘ona ō mai lea o Filisitia ma nonofo ai.
8. ‘Ua o‘o i le taeao, ‘ona ō atu lea o Filisitia e tatala ‘ofu o ē na fasia; ‘ona latou maua lea o Saulo ma ona atali‘i o lo‘o ta‘atitia i le mauga o Kilepoa.
9. ‘Ua latou tala‘eseina ona ‘ofu, ‘ona latou ‘ave ai lea o lona ulu ma ana ‘au‘upega; ‘ona latou tu‘u sāvali ai lea i le nu‘u o Filisitia, ‘ia fa‘ata‘amilo ‘ona tala‘i ‘iā latou tupua, ‘atoa ma le nu‘u.
10. ‘Ua latou tu‘u ona ‘ofutau i le fale o latou atua, ma ‘ua fa‘amauina lona ulupo‘o i le fale o Takono.
11. ‘Ua fa‘alogo Iapese-Kiliata uma i mea uma sa faia e Filisitia ‘iā Saulo,
12. ‘ona tutū ai lea o tagata totoa uma ma ‘ua latou ‘ave le tino o Saulo ma tino o ona atali‘i, ‘ua ‘aumai i Iapese, na tanu o latou ivi i lalo o le tapeneto i Iapese ma ‘ua latou anapopogi ai i aso e fitu.
13. O lea na oti ai Saulo ‘ona o lana agasala na na agasala atu ai i le ALI‘I, o le afioga lava a le ALI‘I na ia lē usiusita‘i i ai, ‘ua sā‘ili fo‘i i le aitu vavalo e fesili i ai.
14. A ‘ua lē fesili atu i le ALI‘I, o le mea lea na fasiotia ai o ia; ‘ua liua fo‘i le mālō mo Tavita le atali‘i o Iese.#