1. ‘Ona fai atu ai lea o Tavita, “O le fale lenei o le ALI‘I le Atua, o le fatafaitaulaga fo‘i lenei o le taulaga mū mo Isaraelu.”
2. ‘Ua fai atu fo‘i Tavita ‘ia fa‘apotopotoina tagata ‘ese ‘ua i le nu‘u o Isaraelu; ma ‘ia togia tufuga talai ma‘a e teuteua ma‘a ‘ua talai e ati a‘e le fale o le Atua.
3. ‘Ua saunia fo‘i e Tavita o u‘amea e tele e fai a‘i fao o puipui o faitoto‘a ma mea e soso‘o a‘i; ma ‘apamemea e tele e le fuatia;
4. ma la‘au o arasi e le faitaulia; auā na ‘aumai e sa Saitonū ma tagata o Turo, o la‘au o arasi e tele ‘iā Tavita.
5. ‘Ua fai atu Tavita, “O Solomona lo‘u atali‘i o le tamaitiiti ma le vaivai o ia; o le fale fo‘i e faia mo le ALI‘I e tele, e maualuga, e ta‘ua, ma le matagofie i nu‘u uma; o lea ‘ou te sauniuni ai.” ‘Ona sauniuni ai lea e Tavita o mea e tele, a o le‘i oti o ia.
6. ‘Ua vala‘au atu fo‘i o ia ‘iā Solomona lona atali‘i, ma ‘ua fai atu ‘iā te ia e fai le fale mo le ALI‘I le Atua o Isaraelu.
7. ‘Ua fai atu fo‘i Tavita ‘iā Solomona, “Lo‘u atali‘i e, o a‘u nei, sa i lo‘u loto e fai se fale mo le suafa o le ALI‘I lo‘u Atua;
8. a ‘ua o‘o mai ‘iā te a‘u le afioga a le ALI‘I, ‘ua fa‘apea mai, ‘‘Ua fa‘amaligiina e oe toto e tele ma tau‘a e tele ‘ua e faia; ‘e te lē faia se fale mo lo‘u igoa, auā ‘ua fa‘amaligiina e oe toto e tele i le ‘ele‘ele i o‘u luma.
9. Fa‘auta, ‘ua fānauina le atali‘i mo oe, o le tagata filemū lava ia; ‘ou te avatua ‘iā te ia le filemū ‘iā te i latou uma ē fai o ia mo latou fili e vagavagai mai ‘iā te ia; auā o lona igoa o Solomona, ‘ou te avatu fo‘i le to‘afilemū ma le mapusaga ‘iā Isaraelu i lana nofoa‘iga.
10. O ia na te faia le fale mo lo‘u igoa; e fai fo‘i o ia mo‘u atali‘i, e fai fo‘i a‘u mōna tamā; ‘ou te fa‘atumauina fo‘i le nofoāli‘i o lona mālō ‘iā Isaraelu e fa‘avavau.’
11. O lenei, lo‘u atali‘i e, ‘ia ‘iā te oe le ALI‘I; ‘ia manuia oe ma ‘ia e faia le fale o le ALI‘I lou Atua, e tusa ma lana afioga ‘iā te oe.
12. Tau ‘ina ‘ia foa‘i ‘iā te oe e le ALI‘I o le poto ma le mafaufau ma ‘ia poloa‘i ‘iā te oe ‘iā Isaraelu, ‘ina ‘ia e tausi le tulafono a le ALI‘I lou Atua.
13. ‘Ona manuia ai lea o oe, pe ‘āfai ‘e te tausi e fai ai tulafono ma fa‘amasinoga na poloa‘i mai ai le ALI‘I ‘iā Mose ‘iā Isaraelu; ‘ia fa‘amalosi ma ‘ia loto tele; ‘aua le fefe, ‘aua le mata‘u.
14. Fa‘auta fo‘i, ‘ua saunia e a‘u ma lo‘u tigā, mo le fale o le ALI‘I o taleni o auro e selau o afe ma taleni o ario e afe o afe ma ‘apamemea ma u‘amea e le fuatia ‘ina ‘ua tele lava; ‘ua ‘ou saunia fo‘i la‘au ma ma‘a; ‘e te fa‘aopoopo i ai fo‘i.
15. O ‘iā te oe fo‘i tagata e to‘atele e faia le galuega, o ē talai, o tufuga ati ma‘a ma tufuga, o tagata popoto uma i galuega ‘ese‘ese uma lava.
16. O le auro ma le ario ma le ‘apamemea ma le u‘amea, e le faitaulia. ‘Inā tula‘i ia ma galue, ‘ia ‘iā te oe fo‘i le ALI‘I.”
17. ‘Ua poloa‘i fo‘i Tavita i ali‘i uma o Isaraelu e fesoasoani ‘iā Solomona lona atali‘i, ‘ua fa‘apea atu,
18. “E lē o ‘iā te ‘outou ‘ea o le ALI‘I lo ‘outou Atua, ‘ua maua ai e ‘outou le filemū ‘iā te ia i itū uma? Auā ‘ua tu‘uina mai e ia tagata o le nu‘u i lo‘u lima; ma ‘ua fa‘ato‘ilaloina le nu‘u i luma o le ALI‘I ma luma fo‘i o lona nu‘u.
19. O lenei, ‘ia ua‘i o ‘outou loto ma o ‘outou agaga e sā‘ili‘ili i le ALI‘I lo ‘outou Atua; ‘inā tula‘i ia ma ‘ia ‘outou faia le malumalu o le ALI‘I le Atua, e avatu i ai le ‘atola‘au o le feagaiga a le ALI‘I ma mea pa‘ia a le Atua, i le fale a faia i le suafa o le ALI‘I.”#