1. ‘Ua mavae lea mea, ‘ona fafasi ai lea e Tavita ‘iā Filisitia ma fa‘ato‘ilalo ‘iā te i latou ma ‘ua faoa Kata ma ona faoa ‘a‘ai nai Filisitia.
2. ‘Ua ia fasia fo‘i Moapi; ‘ona ‘avea lea o Moapi ma pologa ‘iā Tavita, ‘ua latou ‘aumai ai taulaga.
3. ‘Ua fasia fo‘i e Tavita o Atatesa le tupu o Sopa e o‘o atu i Amato, ‘ina ‘ua alu atu o ia e fa‘atumau lana pule i le vaitafe o Eufirate.
4. ‘Ua maua e Tavita nai ‘iā te ia, o kariota e tasi le afe ma ē ti‘eti‘e i solofanua e fitu o afe ma ‘au e sāvavali o tagata e lua sefulu o afe; ‘ua vaevae e Tavita o ua o vae o solofanua i kariota uma, a ‘ua fa‘asao ai māna o kariota e selau.
5. ‘Ua ō mai tagata o Suria mai Tamaseko e fesoasoani ‘iā Atatesa le tupu o Sopa, ‘ona fasia lea e Tavita o Suria e lua sefulu o afe ma afe e lua o tagata.
6. ‘Ua tu‘u e Tavita leoleoga i Suria Tamaseko; ‘ua ‘avea Suria ma pologa ‘iā Tavita, ‘ua latou ‘aumai ai taulaga. ‘Ua fa‘asaoina Tavita e le ALI‘I i mea uma na ia alu i ai.
7. ‘Ua ‘ave e Tavita o talitā auro na i ai i ‘au‘auna a Atatesa, ‘ua ‘aumai ai i Ierusalema.
8. ‘Ua ‘avea fo‘i e Tavita o ‘apamemea e tele lava mai Tipeata ma Kuna, o ‘a‘ai o Atatesa, na fai a‘i e Solomona o le vai ‘apamemea ma pou ma ipu ‘apamemea.
9. ‘Ua lagona e Tou le tupu o Amato ‘ua fasia e Tavita ‘au uma a Atatesa le tupu o Sopa,
10. ‘ona ‘auina mai ai lea o lona atali‘i o Aturamo i le tupu o Tavita, e alofa ‘iā te ia ma fa‘afetai ‘iā te ia, ‘ina ‘ua tau o ia ma Atatesa ma fasi ‘iā te ia; auā sa vā tau Atatesa ma Tou; ‘ua ‘aumai fo‘i e ia o ipu ‘ese‘ese uma lava o auro ma ario ma ‘apamemea.
11. ‘Ua fa‘asāina fo‘i e le tupu o Tavita o ia mea i le ALI‘I, ‘atoa ma le ario ma le auro na ‘aumaia e ia mai nu‘u ‘ese uma nei, o Etoma ma Moapi ma le fānauga a Amoni ma Filisitia ma Amaleka.
12. ‘Ua fasia fo‘i e Apisai le tama a Seruia o Etoma e sefulu afe ma afe e valu i le vanu masima.
13. ‘Ona tu‘u lea e ia o leoleoga i Etoma; ma ‘ua ‘avea Etoma uma ma pologa o Tavita. ‘Ua fa‘asaoina Tavita e le ALI‘I i mea uma na ia alu i ai.
14. ‘Ua faia Tavita ma tupu i Isaraelu uma, ‘ua ia faia fo‘i le fa‘amasinoga ma le tonu i lona nu‘u uma lava.
15. O Ioapo le tama a Seruia na pule o ia i ‘au; o Iosefatu le atali‘i o Ailuta o le fātua‘iupu o ia;
16. o Satoka le atali‘i o Akitopo ma Aimeleka le atali‘i o Aviata, o ositaulaga i lā‘ua ma Savesa o le tusi‘upu ia;
17. o Penaia le atali‘i o Ioiata na pule i le ‘au Kereti ma le ‘au Peleti; o atali‘i fo‘i o Tavita o ali‘i sili i latou e vāvā lalata ma le tupu.