1. ‘Ua fa‘apotopoto mai Isaraelu uma ‘iā Tavita i Heperona, ‘ua fa‘apea mai, “Fa‘auta, o i matou nei o ou ivi ma ou ‘a‘ano.
2. O anamua fo‘i, ‘ina o fai Saulo ma tupu, o oe lava na e feta‘ita‘iina‘i ‘iā Isaraelu. Na fetalai mai fo‘i le ALI‘I lou Atua ‘iā te oe, O oe ‘e te leoleo i lo‘u nu‘u o Isaraelu, e fai fo‘i oe ma ta‘ita‘i i lo‘u nu‘u o Isaraelu.”
3. ‘Ona ō mai lea o toeaina uma o Isaraelu i le tupu i Heperona, ‘ia latou osia le feagaiga ma Tavita i luma o le ALI‘I i Heperona; ‘ua latou fa‘au‘uina fo‘i Tavita e fai ma tupu ‘iā Isaraelu, e tusa ma le afioga a le ALI‘I ‘iā Samuelu.
4. ‘Ona ō atu lea o Tavita ma Isaraelu uma i Ierusalema, o Iepuse lea; sa i ai sa Iepusē o ē o mau i le nu‘u.
5. ‘Ua fai mai ē na mau i Iepuse ‘iā Tavita, “‘E te lē sao mai ‘i‘inei.” A ‘ua ā‘ea e Tavita le ‘olo o Siona, o le ‘a‘ai fo‘i lea a Tavita.
6. ‘Ona fa‘apea atu ai lea o Tavita, “O sē na te mua‘i fasia sa Iepusē, e fai o ia ma ali‘i sili ma ta‘ita‘i.” Na muamua ‘ona alu a‘e o Ioapo le tama a Seruia, ‘ona fai lea o ia ma ali‘i sili.
7. ‘Ua mau Tavita i le ‘olo; o le mea lea na fa‘aigoaina ai e i latou, o le ‘a‘ai o Tavita.
8. ‘Ua ati e ia le ‘a‘ai e fa‘ata‘ali‘oli‘o, e amata mai i Milo e so‘o ai. ‘Ua fa‘aolaina e Ioapo o ē na totoe i le ‘a‘ai.
9. ‘Ua tupu pea lava le mamalu o Tavita; sa ‘iā te ia fo‘i le ALI‘I o ‘au.
10. O ali‘i sili nei o toa sa ‘iā Tavita, o ē na fa‘amalolosi fa‘atasi ma ia i lona mālō, ‘atoa ma Isaraelu uma e fai o ia ma tupu, e tusa ma le afioga a le ALI‘I ‘iā Isaraelu.
11. O le faitau lenei o toa sa ‘iā Tavita; o Iasapama o le atali‘i o Hakamoni, o le ali‘i sili ia o ē ‘avea ‘au; o ia lava na si‘i lona tao i tagata e to‘atolu selau na fasia e ia i le aso e tasi.
12. E aupito ane ‘iā te ia o Eleasaro o le atali‘i o Toto, o lo sa Aokī, o ia o so le ‘au toa e to‘atolu.
13. O ia sa ‘iā Tavita i Fesetame, sa fa‘apotopoto ai Filisitia e tau ai le tau‘a; sa i ai le fāsi fanua ‘ua lilo i karite; na sōsōla le nu‘u i luma o Filisitia.
14. ‘Ua fa‘amau fo‘i i latou i totonu o le fanua, ‘ua fa‘asaoina ai, ‘ua fasia fo‘i Filisitia; ‘ua faia fo‘i e le ALI‘I le fa‘aolataga tele.
15. Na ō ifo le to‘atolu nai le to‘atolugafulu o ē ‘ua sili, ‘ua o‘o ‘iā Tavita i le papa i le ana o Atulama, ‘ua tolauapi fo‘i o ‘au a Filisitia i le vanu o sa Rafā.
16. Sa i ai Tavita i le ‘olo i ia ona po; o le leoleoga fo‘i o Filisitia sa i Peteleema i ia ona po.
17. ‘Ua mana‘o Tavita, ‘ua fa‘apea ane, “Tā fia inu vai i le vai‘eli o Peteleema o i ai i le faitoto‘a!”
18. ‘Ona osofa‘ia lea o ‘au a Filisitia e ia tagata e to‘atolu ma ‘ua latou utu ai vai i le vai‘eli o Peteleema ‘ua i le faitoto‘a, ‘ua ‘aumai ma ‘ua avane ‘iā Tavita; a ‘ua lē mafai Tavita ‘ona inu ai, a ‘ua liligi atu i le ALI‘I.
19. ‘Ua fa‘apea o ia, “Lo‘u Atua e, ‘ia mamao ‘iā te a‘u ‘ona faia o lenei mea; ‘ou te inu ‘ea le toto o nei tagata ē na tōa‘i? auā na ō tōa‘i i latou e ‘aumai ai;” ‘ua ia lē mafai ‘ona inu ai. O mea ia sa faia e ia toa e to‘atolu.
20. O Apisai le uso o Ioapo o ia ‘ua sili i le to‘atolu; o ia fo‘i na si‘i lona tao i tagata e tolu selau, ‘ua fasi ‘iā i latou, ‘ua ta‘ua ai o ia fa‘atasi ma le to‘atolu.
21. O lo le to‘atolu, ‘ua sili ‘ona vi‘ia o ia i le to‘alua; sa fai o ia mo latou ali‘i; ‘ae le‘i aulia le to‘atolu muamua.
22. O Penaia le atali‘i o Ioiata, le atali‘i o le tagata fitafita mai Kapeseelu, o lē na faia mea tetele; o ia na fasia tagata Moapi e fa‘amataleona e to‘alua; o ia fo‘i na alu ifo ma fasi le leona i totonu o le lua i ona po o kiona.
23. Na fasiotia fo‘i e ia o le tagata Aikupito, o le tagata tino‘ese lava, e lima kupita lona maualuga. Sa i ai fo‘i i le lima o le Aikupito o le tao e pei o le la‘au fa‘alava o lē lalaga ‘ie; na ia alu ifo ‘iā te ia ma le to‘oto‘o, ‘ua se‘ia le tao nai le lima o le Aikupito ma na fasioti ‘iā te ia i lona lava tao.
24. O mea ia na faia e Penaia le atali‘i o Ieoiata, ‘ua ta‘ua ai o ia fa‘atasi ma toa e to‘atolu.
25. Fa‘auta, sa sili ‘ona vi‘ia o ia i le to‘atolugafulu, a ‘ua lē aulia e ia le to‘atolu muamua. ‘Ua tofia o ia e Tavita e pule i ē na fa‘afeao ‘iā te ia.
26. O ē ‘ua totoa fo‘i i ‘au; o Asaelu le uso o Ioapo, o Eleana le atali‘i o Toto o le Peteleema,
27. o Sama le Arari, o Helesa le Pelone,
28. o Ira le atali‘i o Ikesa le Tikoa, o Apieseru le Anatota,
29. o Sepekai o lo sa Usā, o Ilai o lo sa Aokī,
30. o Maarai o lo sa Netopā, o Heleta le atali‘i o Paana o lo sa Netopā,
31. o Itai le atali‘i o Ripai o le Kipea, o le ‘a‘ai a le fānauga a Peniamina, o Penaia le Piratonu,
32. o Huri mai vaitafe o Kaasa, o Avielu o le Arepa,
33. o Asemau le Paarumi, o Eliepa le Saalepo,
34. o atali‘i o Asema le Kisoni, o Ionatana le atali‘i o Sage le Arari,
35. o Aiamu le atali‘i o Sakaru le Arari, o Elefala le atali‘i o Uro,
36. o Eferu le Mekira, o Akia le Pelone,
37. o Heserai le Karamelu, o Narai le atali‘i o Esepai,
38. o Ioelu le uso o Natano, o Mepekara le atali‘i o Akara,
39. o Seleka o le Amoni, o Naarai le Perota o le soātau o Ioapo le tama Seruia,
40. o Ira le sa Ieterō, Karepa le sa Ieterō,
41. o Uria o lo sa Hetī o Sapata le atali‘i Akelai,
42. o Atina le atali‘i o Sesa o lo sa Reupenā, o le ali‘i o sa Reupenā, sa ‘iā te ia fo‘i o tagata o to‘atolugafulu,
43. o Hanana le atali‘i o Maaka ma Iosafata le Metini,
44. o Usia le Asorota, o Sama ma Ieielu o atali‘i o Hotama le Aroeru,
45. o Ietiaelu le atali‘i o Semeri ma Ioka lona uso, o le Tise,
46. o Elielu le Makavi ma Iaripa ma Iosavia, o atali‘i o Elenaama ma Itema o le Moapi,
47. o Elielu ma Opeta ma Iasielu le Mesopaia.