1. ‘Ua toeaina lava Tavita ma ‘ua tu‘u tulu‘i lona ola, ‘ona faia lea e ia o Solomona lona atali‘i ma tupu o Isaraelu.
2. ‘Ua fa‘apotopotoina e ia o ali‘i uma o Isaraelu, ‘atoa ma le ‘au ositaulaga ma sa Levī.
3. ‘Ua faitauina sa Levī e āfua mai i ē ‘ua tolu sefulu o latou tausaga ma ē ‘ua matutua ai; o le faitau aofa‘i o tagata, e tolu sefulu o afe ma afe e valu.
4. Sa tofia e pule i le galuega o le fale o le ALI‘I o lua sefulu ma le fa o afe o i latou ma le ono o afe e fai ma faipule ma fa‘amasino;
5. o le fa o afe e fai ma leoleo faitoto‘a ma le fa o afe ‘ua vivi‘i atu i le ALI‘I, i la‘au pese na ‘ou faia e vivi‘i ai.
6. ‘Ua vaevaeina i latou e Tavita i vasega i atali‘i o Levī, o Keresona, o Koato ma Merari.
7. O sa Keresonā; o Latana ma Semi.
8. O atali‘i o Latana; o le ali‘i sili o Ieielu, i le ma Setama ma Ioelu, e to‘atolu ia.
9. O atali‘i o Semi; o Salome ma Asielu ma Arana, e to‘atolu ia. O matai sili ia o Latana.
10. O atali‘i o Semi, o Iata, o Sesa ma Iuso ma Peria. O atali‘i o Semi, e to‘afa ia.
11. O Iata o le ali‘i sili ia ma Sesa o le aupito ane i ai; a o Iuso ma Peria ‘ua lē to‘atele ni a lā‘ua fānau; o le mea lea sa faitauina fa‘atasi ai i lā‘ua ma le ‘āiga o lā‘ua tamā.
12. O atali‘i o Koato; o Amaramo, o Isara, o Heperona ma Usialu, e to‘afa ia.
13. O atali‘i o Amaramo; o Arona ma Mose; ‘ua vavae‘eseina Arona, na te fa‘apa‘iaina mea e sili ‘ona pa‘ia, o ia ma ona atali‘i e fa‘avavau, e fa‘amū ai mea manogi i luma o le ALI‘I, e ‘au‘auna ‘iā te ia ma fa‘amanuia atu i le nu‘u i lona suafa e fa‘avavau.
14. A o Mose le tagata o le Atua, sa ta‘ua ona atali‘i i le itū‘āiga o Levī.
15. O atali‘i o Mose; o Keresoma ma Elisara.
16. O atali‘i o Keresoma; o Sepuelu o le sili ia.
17. O le atali‘i o Elisara; o Reapea o le sili ia. Sa leai se tasi atali‘i ‘iā Elisara; a o atali‘i o Reapea ‘ua matuā to‘atele i latou.
18. O atali‘i o Isara; o Salome, o le sili ia.
19. O atali‘i o Heperona; o Ieria o le sili, o Amaria le to‘alua, o Iaaseelu le to‘atolu ma Ikamamo le to‘afa.
20. O atali‘i o Usialu; o Mika le sili ma Isea le to‘alua.
21. O atali‘i o Merari; o Maali, ma Musi. O atali‘i o Maali; o Eleasaro ma Kiso.
22. ‘Ua oti Eleasaro, a ‘ua leai ni ona atali‘i, na o fafine; ‘ua fai avā fo‘i ‘iā te i latou o atali‘i o Kiso, o latou lava ‘āiga.
23. O atali‘i o Musi; o Maali ma Eteru ma Ieremota, e to‘atolu.
24. O atali‘i ia o Levī i le ‘āiga o latou tamā, o matai sili e fa‘atatau i le faitauina o i latou i le faitau aofa‘i o latou igoa, ē na faia le galuega e ‘au‘auna ai i le fale o le ALI‘I, e āfua mai i ē ‘ua luafulu o latou tausaga ma ē ‘ua matutua ai.
25. Auā na fai atu Tavita, “O le ALI‘I le Atua o Isaraelu, ‘ua avatua e ia le filemū i lona nu‘u, e mau fo‘i i Ierusalema e fa‘avavau.
26. O sa Levī fo‘i, latou te lē toe tau‘ave le malumalu, ‘atoa ma mea uma e fai a‘i ana sauniga.”
27. Auā sa faitauina le fānauga a Levī e tusa ma ‘upu mulimuli a Tavita, e āfua i ē ‘ua luafulu o latou tausaga ma ē ‘ua matutua ai;
28. “auā o lo latou tofi lea e ‘au‘auna i atali‘i o Arona i le galuega i le fale o le ALI‘I, i lotoā ma potu ma le fa‘amamāina o mea pa‘ia uma ma le faiga o le galuega i le fale o le Atua;
29. ma le areto e laulauina i luma ma le falaoa lelei mo le taulaga i mea e ‘ai ma areto manifinifi e le fa‘afefeteina ma u‘amea salalafa ma mea e palua, ‘atoa ma fua fa‘a‘ofu‘ofu uma ma fua fa‘aloloa;
30. e tutū fo‘i i taeao uma e fa‘afetai ma vivi‘i atu i le ALI‘I, e fa‘apea fo‘i i afiafi;
31. e osi fo‘i taulaga mū uma i le ALI‘I i sapati ma masina fa‘ato‘ā va‘aia ma tausamiga, e lē aunoa i luma o le ALI‘I, e pei o le faitau, e pei ‘ona fa‘atonuina ‘iā te i latou;
32. latou te ‘ana‘ana fo‘i i le tausiga o le fale fetāfa‘i o le fa‘apotopotoga ma le tausiga o le malumalu ma le tausiga o atali‘i o Arona o latou uso, i le galuega i le fale o le ALI‘I.”#