1. O vasega o le ‘au leoleo faitoto‘a. O sa Korū, o Meselemia, le atali‘i o Kori, mai le fānauga a Asafo.
2. O atali‘i o Meselemia; o Sakaria le ulumatua, o Ietiaelu le to‘alua, o Sepatia le to‘atolu, o Iatanielu le to‘afa,
3. o Elama to‘alima, o Iokana le to‘aono, o Elioenai le to‘afitu.
4. O atali‘i o Opete-etoma; o Semaia o le ulumatua, o Iosapa le to‘alua, o Ioaa le to‘atolu, o Sakaru le to‘afa ma Natanielu le to‘alima,
5. o Amueli le to‘aono, o Isakara le to‘afitu, o Pulati le to‘avalu; auā sa fa‘amanuia o ia e le Atua.
6. ‘Ua fānaua fo‘i atali‘i o lona atali‘i o Semaia, o ē na pule i le ‘āiga o lo latou tamā; auā o toa malolosi i latou.
7. O atali‘i o Semaia; o Oteni ma Refaelu ma Opeta, o Elesapata, o ona uso o tagata malolosi, o Eliu ma Semakia.
8. O i latou uma ia mai le fānau a Opete-etoma; o i latou ma o latou atali‘i ma o latou uso, o tagata malolosi mo le galuega, e to‘aono sefulu ma le to‘alua o sa Opete-etomā.
9. ‘Ua ‘iā Meselemia fo‘i o atali‘i ma uso, o tagata malolosi e to‘asefulu ma le to‘avalu.
10. O Hosa fo‘i o lo sa Merarī na i ai atali‘i; o Semeri o le sili, ‘ae lē o le ulumatua ia, a ‘ua tofia e lona tamā ‘ia sili o ia.
11. O Hilikia le to‘alua, o Tepelia le to‘atolu, o Sakaria le to‘afa; o atali‘i uma ma uso o Hosa e to‘asefulu ma le to‘atolu.
12. ‘Ua ‘iā te i latou vasega o le ‘au leoleo faitoto‘a, ‘ua i ali‘i sili, o tausiga pei o latou uso, e ‘au‘auna i le fale o le ALI‘I.
13. ‘Ua latou fai ai le vili, o ē iti e tusa ma ē matutua, i ‘āiga o latou tamā, mo lea faitoto‘a ma lea faitoto‘a.
14. O le vili mo le itū i sasa‘e ‘ua fa‘asaga lea ‘iā Selemia. ‘Ua latou fai fo‘i le vili mo Sakaria lona atali‘i, o le faipule poto ia; ‘ua fa‘asaga lona tofi i itū i matū.
15. ‘Ua ‘iā Opete-etoma le itū i saute ma ona atali‘i i le fale e tu‘u ai mea.
16. ‘Ua ‘iā Supima ma Hosa le itū i sisifo ma le faitoto‘a o Saleketa, i le ala tele e alu a‘e, o le leoleoga e feagai ma le leoleoga.
17. ‘Ua to‘aono o sa Levī i le itū i sasa‘e, e to‘afa i lea aso ma lea aso i le itū i matū, e to‘afa i lea aso ma lea aso i le itū i saute ma ta‘ito‘alua i le fale e fa‘aputu ai mea.
18. O i Parevara i sisifo, e to‘afa i le ala tele, e to‘alua i Parapara.
19. O vasega ia o le ‘au leoleo faitoto‘a ‘ua i le fānauga a sa Korū ma le fānauga a Merari.
20. O sa Levī; o Akia ‘ua leoleo i ‘oloa o le fale o le Atua ma ‘oloa ‘ua fa‘asāina.
21. O atali‘i o Latana, o atali‘i o le sa Keresonā o Latana, o matai sili, o Latana fo‘i o lo sa Keresonā, o Ikieli.
22. O atali‘i o Ikieli; o Setama ma lona uso o Ioelu e leoleo i ‘oloa o le fale o le ALI‘I.
23. O sa Amaramō ma sa Isarā ma sa Heperonā, ma sa Usialū.
24. O Sepuelu fo‘i o le atali‘i o Keresonā, le atali‘i ia o Mose, o le ali‘i sili ia e leoleo i ‘oloa.
25. O ona uso fo‘i o le fānau a Eliesera; o Reapea lona atali‘i ma Isaia lona atali‘i ma Iorama lona atali‘i, ma Sekari lona atali‘i, ma Salome lona atali‘i.
26. O Salome lenei ma ona uso na leoleo i ‘oloa uma na fa‘asāina, na fa‘asāina e le tupu o Tavita ma matai sili, o ali‘i o ta‘ito‘aafe ma ta‘ito‘aselau ma ē ‘avea ‘au.
27. Na fa‘asāina e i latou o mea mai tau‘a ma vete e fai ai le fale o le ALI‘I.
28. O mea uma na fa‘asāina e Samuelu le tagata va‘ai ma Saulo le atali‘i o Kiso ma Apineru le atali‘i o Neru ma Ioapo le tama a Seruia; o mea uma na fa‘asāina ‘ua leoleo ai Salome ma ona uso.
29. O sa Isarā; o Kinania ma ona atali‘i sa tofia i sauniga fa‘alenu‘u ‘iā Isaraelu e fai ma faipule ma fa‘amasino.
30. O sa Heperonā; o Hasapea ma ona uso, o tagata malolosi, e to‘aafe ma le to‘afitu selau na pule i sauniga ‘iā Isaraelu i le itū mai o Ioritana i sisifo i sauniga uma a le ALI‘I ma galuega fo‘i a le tupu.
31. O sa Heperonā; o Ieria o le ali‘i sili i sa Heperonā i ‘āiga o ona tamā. O le tausaga e fa sefulu o le nofoa‘iga a Tavita na su‘esu‘eina ai i latou, na maua fo‘i ‘iā te i latou o toa malolosi i Iasaru i Kiliata.
32. O ona uso fo‘i, o tagata malolosi, e lua afe ma le fitu selau, o matai sili, na tofia i latou e le tupu o Tavita e pule i sa Reupenā ma sa Katō ma le tasi vaega o le itū‘āiga o Manase, i mea uma a le Atua ma mea a le tupu.#