Le mataupu

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14
  15. 15
  16. 16
  17. 17
  18. 18
  19. 19
  20. 20
  21. 21
  22. 22
  23. 23
  24. 24
  25. 25
  26. 26
  27. 27
  28. 28
  29. 29

Feagaiga Tuai

Feagaiga Fou

1 Nofoaiga a Tupu 15 O LE TUSI PA'IA - Ekalesia Katoliko Roma (RSCB)

O le ‘Amiga o le ‘Atola‘au a‘i le Fale o Opete-etoma i le ‘A‘ai a Tavita

1. ‘Ua fai fo‘i e Tavita fale mōna i le ‘a‘ai o Tavita, ma ‘ua saunia le mea mo le ‘atola‘au a le Atua, ‘ua faia fo‘i le fale ‘ie mo le ‘atola‘au.

2. ‘Ona fai atu ai lea o Tavita: E lē tatau ‘ona ‘ave e nisi le ‘atola‘au a le Atua ‘ua na o sa Levī; auā ‘ua filifilia i latou e le ALI‘I e ‘ave le ‘atola‘au a le Atua ma ‘au‘auna ‘iā te ia e fa‘avavau.

3. ‘Ona fa‘apotopotoina lea e Tavita o Isaraelu uma i Ierusalema, e ‘ava‘e le ‘atola‘au a le ALI‘I i le mea ‘ua saunia e ia e tu‘u ai.

4. ‘Ua fa‘apotopotoina fo‘i e Tavita o le fānauga a Arona ma sa Levī;

5. o le fānauga a Koato; o Urielu le ali‘i sili, ‘atoa ma ona uso e to‘aselau ma le to‘aluafulu.

6. O le fānauga a Merari; o Asaia le ali‘i sili, ‘atoa ma ona uso e to‘alua selau ma le to‘aluafulu.

7. O le fānauga a Keresona; o Ioelu le ali‘i sili, ‘atoa ma ona uso e to‘aselau ma le to‘atolugafulu.

8. O le fānauga a Elisafano; o Semaia le ali‘i sili, ‘atoa ma ona uso e to‘alua selau.

9. O le fānauga a Heperona; o Elielu le ali‘i sili, ‘atoa ma ona uso e to‘avalu sefulu.

10. O le fānauga a Usialu; o Aminatapu le ali‘i sili, ‘atoa ma ona uso e to‘aselau ma le to‘asefulu ma le to‘alua.

11. ‘Ua ‘a‘ami atu e Tavita o Satoka ma Aviata o ositaulaga ma sa Levī; ma Urielu ma Asaia ma Ioelu ma Semaia ma Elielu ma Aminatapu,

12. ‘ua fa‘apea atu ‘iā te i latou, “O ‘outou o matai sili o sa Levī; ‘ia fa‘apa‘iaina ‘outou ‘iā te ‘outou, ‘atoa ma o ‘outou uso, e ‘aumai ai e ‘outou le ‘atola‘au a le ALI‘I, o le Atua o Isaraelu, i le mea ‘ua saunia e a‘u e tu‘u ai.

13. Auā na osofia i tatou e le ALI‘I lo tatou Atua, ‘ina ‘ua lē mua‘i ‘aumaia e ‘outou; auā na tatou le sā‘ili‘ili ‘iā te ia e tusa ma le tulafono.”

14. ‘Ona fa‘apa‘iaina lea o ositaulaga ma sa Levī ‘iā te i latou e ‘ava‘e ai le ‘atola‘au a le ALI‘I le Atua o Isaraelu.

15. ‘Ua amo e le fānauga a sa Levī le ‘atola‘au a le Atua i ona amo i o latou ua, e pei ‘ona poloa‘i mai o Mose e tusa ma le afioga a le ALI‘I.

16. ‘Ua fai atu Tavita i ali‘i sili o sa Levī; ‘ia latou tofi ni o latou uso e usua pese i la‘aupese, o napeli, ma kitara ma sumepalo, e pepese ai ma le leo tele e fiafia ai.

17. ‘Ua tofia e sa Levī; o Hemana le atali‘i o Ioelu, i le ma Asafo le atali‘i o Perekia a‘i ona uso; na tofia fo‘i ai le fānauga a Merari o latou uso, o Etano le atali‘i o Kusaia.

18. O latou uso fo‘i e aupito ane ‘iā te i latou, o Sakaria, o Pene ma Iaasielu ma Semiramota ma Ikielu, ma Uni, o Eliapo ma Penaia ma Maaseia ma Matitia, ma Elipeleu ma Mikenau ma Opete-etoma ma Ieielu, o le ‘au leoleo faitoto‘a.

19. O le ‘au usu pese lenei; o Hemana, o Asafo ma Etano, na tofia i latou ma sumepalo ‘apamemea e fa‘atagitagi ai.

20. O Sakaria fo‘i ma Asielu ma Semiramota ma Ikielu ma Uni ma Eliapo ma Maaseia ma Penaia, na tofia i latou ma napeli i alemota;

21. o Matitia ma Elipeleu ma Mikenau ma Opete-etoma ma Ieielu ma Asesau, na i ai kitara i seminita, e ta‘ita‘i ai le pese.

22. O Kinania fo‘i le ali‘i sili o sa Levī; o le usu pese ia, ‘ua na a‘oa‘o i pese, auā ‘ua poto ia.

23. O Perekia fo‘i ma Elekana, o leoleo faitoto‘a i lā‘ua mo le ‘atola‘au.

24. O Sepania ma Iosefatu ma Natanielu ma Amesai ma Sakaria ma Penaia ma Elisara, le ‘au ositaulaga, e a latou e fa‘asasau i pū i luma o le ‘atola‘au a le Atua. O Opete-etoma ma Ikia, o leoleo faitoto‘a i lā‘ua mo le ‘atola‘au.

O le ‘Aumaia o le ‘Atola‘au o le Feagaiga i Ierusalema

25. ‘Ua ō atu Tavita ma toeaina o Isaraelu ma ali‘i o ta‘ito‘aafe, e ‘aumai le ‘atola‘au o le feagaiga a le ALI‘I ma le fiafia nai le fale o Opete-etoma.

26. Na fesoasoani le Atua i sa Levī ē na ‘ave le ‘atola‘au o le feagaiga a le ALI‘I; ‘ona latou osia lea o le taulaga, o povi po‘a e fitu ma mamoe po‘a e fitu.

27. ‘Ua ‘ofu Tavita i le ‘ofu ‘ie vavae, o sa Levī uma fo‘i o ē na ‘ave le ‘atola‘au ma ē pepese ma Kinania o le usu pese sili i ē pepese. Sa ‘ofu Tavita i le efota ‘ie vavae.

28. ‘Ua ‘ava‘e e Isaraelu uma le ‘atola‘au o le feagaiga a le ALI‘I ma le ‘alalaga ma le leo o le foafoa ma pū ma sumepalo, ‘ua ta fo‘i napeli ma kitara.

29. ‘Ua o‘o le ‘atola‘au o le feagaiga a le ALI‘I i le ‘a‘ai a Tavita, ‘ona va‘ai ifo lea o Mekala le afafine o Saulo i le fa‘amalama, ‘ua iloa atu le tupu o Tavita o sa‘a ma siva, ‘ona ‘ino‘ino lea o ia ‘iā te ia i lona loto.#