Le mataupu

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14
  15. 15
  16. 16
  17. 17
  18. 18
  19. 19
  20. 20
  21. 21
  22. 22
  23. 23
  24. 24
  25. 25
  26. 26
  27. 27
  28. 28
  29. 29

Feagaiga Tuai

Feagaiga Fou

1 Nofoaiga a Tupu 12 O LE TUSI PA'IA - Ekalesia Katoliko Roma (RSCB)

O ē na Fa‘atasi ane ‘iā Tavita i Sekeleka ma Heperona

1. O i latou ia na ō mai ‘iā Tavita i Sekeleka ‘ina o nofonofo ai o ia ‘ona o Saulo le atali‘i o Kiso; o toa i latou ē ‘ua fesoasoani i le tau‘a.

2. Sa ‘iā te i latou ‘aufana, ‘ua sasau e i latou o ma‘a ma fanafana i ū i le ‘aufana, i le lima taumatau ‘atoa ma le lima tauagavale. O isi o le ‘au uso o Saulo i latou o sa Peniaminā.

3. O Aisera o le ali‘i sili ia, i le ma Ioasa o atali‘i o Sema le Kipea; ma Ieseelu ma Pelete, o atali‘i o Asemau; ma Pereka ma Ieu o le Anatota.

4. O Isemaia o le Kipeona, o le tagata malosi ia i le to‘atolugafulu, ‘ua ia pule fo‘i i le to‘atolugafulu ma Ieremia ma Iaaseelu ma Iokana ma Ieosapa o le Ketere,

5. o Elusai ma Ierimota ma Pealia ma Semariau ma Sefatiao o le Harufi,

6. o Elekana ma Isea ma Asareelu ma Ioesera ma Iasapama o sa Korū;

7. o Ioeli ma Sepatia, o atali‘i o Ieroama i Kitoru.

O Toa Malolosi sa ‘Au‘auna ‘iā Tavita mai le Itū‘āiga o Kato

8. ‘Ua vavae mai o sa Katō ‘iā Tavita i le ‘olo i le vao, o toa malolosi, o tagata o ‘au e taulia le tau‘a, e masani i le talitā ma le tao; o latou mata fo‘i o mata o leona, ‘ua tele vavave fo‘i i latou a pei o sevi i mauga;

9. o Esera o le muamua, o Opetaia le to‘alua, o Eliapo le to‘atolu,

10. o Mesemana le to‘afa, o Ieremia le to‘alima,

11. o Atai le to‘aono, o Elielu le to‘afitu,

12. o Iokana le to‘avalu, o Elesapata le to‘aiva,

13. o Ieremia le to‘asefulu, o Makapanai le to‘asefulu ma le to‘atasi.

14. O le fānauga ia a Kato, o ē ‘avea ‘au; e ta‘ito‘atasi o ē aupito iti ma pule i le to‘aselau, e ta‘ito‘atasi fo‘i o ē sili ma pule i le to‘aafe.

15. O i latou nei na sopo‘ia Ioritana i le masina muamua ‘ina ‘ua o‘o o‘o tutū ona ‘auvai uma; na latou tulia i latou uma o ē na i vanu i sasa‘e ‘atoa ma sisifo.

O ‘Au‘auna mai itū‘āiga o Peniamina ma Iuta

16. Na ō mai nisi o le fānauga a Peniamina ma Iuta i le ‘olo ‘iā Tavita.

17. Na alu atu Tavita ‘iā te i latou ma ‘ua fai atu, ‘ua fa‘apea atu ‘iā te i latou, “‘Āfai ‘ua ‘outou ō mai ma le filemū ‘iā te a‘u e fesoasoani mai ‘iā te a‘u, tatou te loto gatasi ma ‘outou; ‘ae ‘āfai ‘ua ‘outou ō mai e fa‘alataina a‘u i ē o faia a‘u mo latou fili, auā e leai so‘u sauā, ‘ia sisila mai le Atua o tatou tamā ma ‘ia a‘oa‘i atu ai.”

18. ‘Ona ufitia lea e le Agaga o Amase le ali‘i sili o ē ‘ave ‘au, ‘ua fai atu,“Tavita e, e ‘iā te oe i matou nei,le atali‘i o Iese e, tatou te ‘au ma oe;‘ia ‘iā te oe le manuia, le manuia lava,‘ia i ai fo‘i le manuia i ē fesoasoani ‘iā te oe;auā o lo‘o fesoasoani lou Atua ‘iā te oe.”‘Ona talia ai lea o i latou e Tavita, na faia fo‘i i latou ma a ‘ave ‘au.

O ‘Au‘auna mai le itū‘āiga o Manase

19. ‘Ua sola mai fo‘i nisi o Manase ‘iā Tavita, ‘ina o sau o ia ma Filisitia e tau le tau‘a ma Saulo; a ‘ua latou le fesoasoani ‘iā te i latou; auā ‘ua ‘au‘eseina atu o Tavita e ali‘i o Filisitia e tusa ma le filifiliga, ‘ua fa‘apea ane, “E toe sola atu o ia i lona ali‘i o Saulo ma o tatou ulu.”

20. Na alu o ia i Sekeleka, ‘ona sola mai lea ‘iā te ia nisi o Manase, o Atana ma Iosapatu ma Ietiaelu ma Mekaeli ma Iosapatu ma Eliu ma Seletai, o ē ‘ave ‘au e ta‘ito‘aafe a Manase.

21. ‘Ua latou fesoasoani ‘iā Tavita e tau ma ‘au, auā o toa malolosi i latou uma, o i latou fo‘i a ‘ave ‘au.

22. Auā o ona po ia na ō mai ai i lea aso ma lea aso nisi ‘iā Tavita e fesoasoani ‘iā te ia, ‘ua ‘ave ma ‘au e tele, e pei o le ‘au a le Atua.

O le Lisi o ‘au Tau a Tavita

23. O le faitau lenei o tagata ‘ua saunia i le tau‘a, na ō mai ‘iā Tavita i Heperona e liliu ai ‘iā te ia le mālō o Saulo, e tusa ma le afioga a le ALI‘I.

24. O le fānauga a Iuta ē na i ai le talitā ma le tao, e ono o afe ma le valu o selau, o saunia i le tau‘a.

25. O ē o le fānauga a Simeona o toa malolosi e tau, e fitu afe ma le selau.

26. O ē o le fānauga a Levi, e fa afe ma le ono o selau.

27. O Ioiata o le pule i sa Aronā, sa ‘iā te ia e tolu afe ma le fitu selau;

28. o Satoka o le taule‘ale‘a o le toa malosi ma le to‘aluafulu ma le to‘alua o ē ‘ave ‘au i le ‘āiga o lona tamā.

29. O ē o le fānauga a Peniamina o ‘āiga o Saulo, e tolu afe; auā ‘ua o‘o mai i ia ona po na leoleo ai le to‘atele o i latou i le ‘āiga o Saulo.

30. O ē o le fānauga a Efaraima, e lua sefulu afe ma le valu o selau, o toa malolosi, na ta‘ua i latou i le ‘āiga o latou tamā.

31. O ē o le tasi vaega o le itū‘āiga o Manase, e sefulu ma le valu o afe, o ē na ta‘ua i o latou igoa, e ō mai e fai Tavita ma tupu.

32. O ē o le fānauga a Isakara, sa popoto e fa‘autauta e iloa ai mea e tatau ‘ona faia o Isaraelu i ia ona po, o ali‘i sili e lua selau, o latou uso uma fo‘i e fa‘alogologo mai ‘iā i latou.

33. O ē o Sepulona e na ō atu e tau, ‘ua sauniuni i le tau‘a ma ‘au‘upega uma o le tau‘a, e lima sefulu afe, o ē na popoto i pae tau; e le‘i fa‘alotolotolua i latou.

34. O ē o Nafatali fo‘i, e tasi le afe o ē ‘ave ‘au, ‘atoa ma tagata e tolu sefulu afe ma afe e fitu ‘ua i ai talitā ma tao.

35. O ē o sa Tanū, ‘ua sauniuni i le tau‘a, e lua sefulu afe ma afe e valu ma le ono selau.

36. O ē o Asera ē na ō atu e tau ‘ua sauniuni i le tau‘a, e fa sefulu o afe.

37. O ē mai le tasi itū o Ioritana o sa Reupenā, ma ē o sa Katō ma ē o le tasi vaega o le itū‘āiga o Manase, ‘ua i ai ‘au‘upega uma e tau ai le tau‘a, e tasi le selau o afe ma afe e lua sefulu.

38. O ia ‘au uma o le tau‘a o ē ‘ua popoto e pae tau, na ō mai i latou i Heperona ma le loto ‘atoa e fai ai Tavita ma tupu o Isaraelu uma; ‘atoa ma ē na totoe uma o Isaraelu na loto gatasi e fai Tavita ma tupu.

39. Na i ai i latou ma Tavita i aso e tolu, o ‘a‘ai ma inu; auā na saunia mea e o latou uso mā latou.

40. O i latou fo‘i ‘ua vāvā lalata ma i latou, ‘ua o‘o ‘iā Isakara ma Sepulona ma Nafatali, ‘ua latou ‘aumai ai areto i luga o asini ma kamela ma falata ma povi, o mea e ‘ai o falaoa ma potopotoga mati ma fuifui vine mago ma le uaina ma le suāu‘u ma povi ma mamoe e matuā tele; auā sa i ai le fiafia i Isaraelu.