1 Nofoaiga a Tupu 9 O LE TUSI PA'IA - Ekalesia Katoliko Roma (RSCB)

O le Fa‘ato‘aina o le Nu‘u ‘ina ‘ua Mavae le Tāfeaga

1. Sa tusia gafa o Isaraelu uma. Fa‘auta fo‘i, ‘ua tusia i latou i le tusi i tupu o Isaraelu.Na tāfea fo‘i Iuta i Papelonia ‘ona o a latou agasala.

2. O ē na mua‘i nonofo i o latou fanua ‘iā latou ‘a‘ai, o Isaraelu, o le ‘au ositaulaga, o sa Levī ma ‘au‘auna o le malumalu.

3. ‘Ua nonofo fo‘i i Ierusalema nisi o le fānauga a Iuta ma nisi o le fānauga a Peniamina ma nisi o le fānauga a Efaraima ma Manase.

4. O Utai le atali‘i o Ameuta, o le atali‘i o Omeri, le atali‘i o Imeri, o le atali‘i o Pani, na tupu mai i atali‘i o Faresa le atali‘i o Iuta.

5. Na tupu mai ‘iā Seloni; o Asaia le ulumatua ma ona atali‘i;

6. mai atali‘i o Sera; o Ieielu ma o latou uso e ono selau ma le iva sefulu.

7. Mai atali‘i o Peniamina; o Salu le atali‘i o Mesulama, o le atali‘i o Hotavia, o le atali‘i o Hasenua,

8. o Ipeneia fo‘i le atali‘i o Ieroama ma Ele le atali‘i o Usi, o le atali‘i o Mekeri ma Mesulama le atali‘i o Sefatia, o le atali‘i ia o Reuelu, o le atali‘i ia o Ipenia.

9. O latou uso fo‘i, i o latou tupulaga, e iva selau ma le lima sefulu ma le ono. O tagata uma ia o matai sili i le ‘āiga o latou tamā.

O le ‘Au Ositaulaga o ē Nonofo i Ierusalema

10. Na tupu mai i le ‘au ositaulaga; o Ietaia ma Ioaripa ma Iakinu,

11. o Asaria fo‘i o le atali‘i o Hilikia, o le atali‘i ia o Mesulama, o le atali‘i ia o Satoka, o le atali‘i ia o Meraiota, o le atali‘i ia o Akitopo, o lē pule i le fale o le Atua;

12. o Ataia fo‘i o le atali‘i o Ieroama, o le atali‘i ia o Pasura, o le atali‘i ia o Malekia, o Maseai le atali‘i o Atielu, o le atali‘i ia o Iaesera, o le atali‘i ia o Mesulama, o le atali‘i ia o Meselemita, o le atali‘i ia o Imeru.

13. O latou uso fo‘i, o matai sili i ‘āiga o latou tamā, e tasi le afe ma le fitu selau ma le to‘aono sefulu; o tagata malolosi lava i ‘au‘auna i le galuega o le fale o le Atua.

O le ‘Au sa Levī o ē Nonofo i Ierusalema

14. Na tupu mai fo‘i i sa Levī; o Semaia o le atali‘i o Hasupo, o le atali‘i ia o Aserikama, o le atali‘i ia o Hasapea, mai le fānauga a Merari;

15. o Pakepakara fo‘i, o Heresa ma Kalali ma Matania o le atali‘i o Mika, o le atali‘i ia o Sekari, o le atali‘i ia o Asafo;

16. o Opetaia fo‘i le atali‘i o Semaia, o le atali‘i ia o Kalali, o le atali‘i ia o Iutana, ma Perekia le atali‘i o Asa, o le atali‘i ia o Elekana, o ē na nonofo i ‘a‘ai o tagata Netopa.

O le ‘au Leoleo o le Malumalu i Ierusalema

17. O leoleo faitoto‘a nei, o Saluma ma Akopa ma Talemoni ma Aimano ma o latou uso; o Saluma o le matai sili ia;

18. na leoleo i le faitoto‘a o le tupu i le itū i sasa‘e, ‘ua o‘o mai i nei ona po; o leoleo faitoto‘a ia i vasega o le fānauga a Levī.

19. O Saluma fo‘i le atali‘i o Kori, o le atali‘i ia o Eviasafo, o le atali‘i ia o Koru ma ona uso, o le ‘āiga o lona tamā, o sa Korū, na pule i le faiga o le galuega, o leoleo o faitoto‘a o le fale fetāfa‘i; o latou tamā fo‘i na pule i toagalauapi a le ALI‘I, o ē na leoleo i le mea e ui atu ai.

20. O Fineaso fo‘i le atali‘i o Eleasaro, na pule o ia ‘iā te i latou anamua, sa ‘iā te ia le ALI‘I.

21. O Sakaria le atali‘i o Meselemia na leoleo i le faitoto‘a o le fale fetāfa‘i o le fa‘apotopotoga.

22. O i latou uma ia sa filifilia e fai ma leoleo i faitoto‘a, e to‘alua selau ma le to‘asefulu ma le to‘alua. Sa tusia o latou gafa ‘iā latou ‘a‘ai, o i latou na tofia e Tavita ma Samuelu le tagata va‘ai, i o latou tofiga.

23. O i latou ma a latou fānau sa leoleo faitoto‘a o le fale o le ALI‘I, o le fale fetāfa‘i fo‘i, e tusa ma a latou leoleoga.

24. Sa i ai leoleo faitoto‘a i itū e fa, o sasa‘e ma sisifo ma le itū i matū ma le itū i saute.

25. O latou uso fo‘i, ē na nonofo i o latou ‘a‘ai, e ō mai e feaua‘i ma i latou, ta‘ifitu o latou aso.

26. Auā o tagata ia o sa Levī, o leoleo sili i faitoto‘a, sa i ai i latou e to‘afa i o latou tofiga, sa leoleo fo‘i i potu ma mea e teu ai ‘oa o i le fale o le Atua.

27. ‘Ua latou nonofo fa‘ata‘ali‘oli‘o fo‘i i le fale o le Atua, auā sa ‘iā te i latou ē leoleo ai, e a latou fo‘i e tatala faitoto‘a i taeao uma lava.

O Galuega sa Tofia i ai isi sa Levī

28. O isi o i latou na tausi ai ipu e fai a‘i sauniga, ‘ina ‘ia faitau ai pe a avane i totonu ma faitau ai pe a toe ‘aumai i fafo.

29. O isi fo‘i o i latou ‘ua tofia e tausi ai ipu ma mea pa‘ia uma ma le falaoa lelei ma le uaina ma le suāu‘u, ma le pulu lipano ma mea manogi.

30. O isi fo‘i atali‘i o le ‘au ositaulaga na faia e i latou le u‘u manogi.

31. O Matatia o lo sa Levī, o le ulumatua ia a Saluma, o lo sa Korū, e ana le tofiga e pule i le faiga o mea e tunu i u‘amea salalafa.

32. O isi fo‘i o latou uso, o lo sa Koatō, sa ‘iā te i latou le areto e laulauina i luma e sauniuni ai i lea sapati ma lea sapati.

33. O i latou ia e pepese, o matai sili o sa Levī, sa nonofo i potu, sa aunoa ma isi galuega; auā na latou i ai i lea faiva i le ao ‘atoa ma le po.

34. O matai sili ia o sa Levī, ‘ua sili i o latou tupulaga; ‘ua nonofo i latou i Ierusalema.

O Tupuga ma le Gafa o Saulo

35. ‘Ua mau i Kipeona o Ieielu le tamā o Kipeona, o le igoa o lana avā o Maaka.

36. O lona atali‘i ulumatua o Avatonu ma Suro ma Kiso ma Paala ma Neru ma Natapu,

37. o Kitoru fo‘i ma Aio ma Sakaria ma Mekelota.

38. ‘Ua fānaua e Mekelota o Semaama. ‘Ua latou mau fo‘i ma o latou uso i Ierusalema, ‘ua fa‘afeagai ma o latou uso.

39. ‘Ua fānaua e Neru o Kiso, ‘ua fānaua e Kiso o Saulo, ‘ua fānaua fo‘i e Saulo o Ionatana ma Makisua ma Apinatapa ma Esepaala.

40. O le atali‘i o Ionatana o Meripaala, na fānaua e Meripaala, o Mika.

41. O atali‘i o Mika; o Pitonu, ma Meleka ma Tarea.

42. ‘Ua fānaua e Aasa o Iara; o Iara fo‘i ‘ua fānaua e ia o Alemetu ma Asemau ma Semeri; ‘ua fānaua e Semeri o Mosa.

43. ‘Ua fānaua fo‘i e Mosa o Pinea; o Refaia fo‘i lona atali‘i, o Eliasa lona atali‘i, o Aselu lona atali‘i.

44. O atali‘i o Aselu e to‘aono, o latou igoa fo‘i nei; o Aserikama, o Pokeru ma Isamaeli ma Searia ma Opetaia ma Hanana. O atali‘i ia o Aselu.