1. ‘Ua fai atu fo‘i le tupu o Tavita i le fa‘apotopotoga uma, “O Solomona lo‘u atali‘i, o ia lava ‘ua filifilia e le Atua, o le tamaitiiti ia ma le vaivai, ‘ua tele fo‘i le galuega; auā e lē se maota mo tagata, a o le ALI‘I le Atua.
2. ‘Ua saunia e a‘u ma lo‘u malosi ‘atoa mo le fale o lo‘u Atua, o le auro e fai a‘i mea auro ma le ario e fai a‘i mea ario ma ‘apamemea e fai a‘i mea ‘apamemea, ma u‘amea e fai a‘i mea u‘amea ma la‘au e fai a‘i mea la‘au ma ma‘a soama ma ma‘a e fa‘ava‘a ai, o ma‘a fepulafi ma lanu ‘ese‘ese ma ma‘a tāua uma, ‘atoa ma ma‘a sesa e tele lava.
3. O lea fo‘i, ‘ua ‘ou fiafia i le fale o lo‘u Atua, o le mea lea ‘ua ‘ou avatu ai mo le fale o lo‘u Atua o la‘u lava ‘oloa, o auro ma ario, e fa‘aopoopo i mea uma na saunia e a‘u mo le fale pa‘ia,
4. e tolu afe o taleni o auro, o le auro o Ofeira ma afe e fitu o taleni o ario ‘ua fa‘amamāina, e ufi ai pā o fale.
5. O auro e fai a‘i mea o auro ma ario e fai a‘i mea o ario mo galuega uma fo‘i e faia e lima o tufuga. O ai fo‘i sē loto e foa‘i ana mea i le ALI‘I i le aso nei?”
6. ‘Ona foa‘i lea ma le loto o matai sili ma ali‘i o itū‘āiga o Isaraelu ma ali‘i o ta‘ito‘aafe ma ta‘ito‘aselau, ma ē pule i le galuega a le tupu.
7. ‘Ua avatua fo‘i mo le galuega o lē fale o le Atua, o auro e lima gaafe o taleni ma le sefulu o afe o tareki ma ario e sefulu afe o taleni ma ‘apamemea e sefulu ma le valu o afe o taleni ma u‘amea e selau afe o taleni.
8. O i latou na i ai ma‘a tāua ‘ua tu‘uina atu i le ‘oloa o le fale o le ALI‘I, i le lima o Ikieli le sa Keresonā.
9. ‘Ona fiafia lava lea o le nu‘u, auā na foa‘i ma le loto, auā na latou foa‘i ma le fiafia ma le loto ‘ato‘atoa i le ALI‘I. ‘Ua fiafia fo‘i Tavita le tupu ma le fiafia tele lava.
10. ‘Ona fa‘amanū atu ai lea o Tavita i le ALI‘I i luma o le fa‘apotopotoga uma ma ‘ua fa‘apea atu Tavita, “‘Ia fa‘amanūina oe, le ALI‘I e, le Atua o Isaraelu, lo matou tamā, mai le vavau e o‘o i le fa‘avavau.
11. Le ALI‘I e, e ou le silisili ‘ese ma le malosi ma le matagofie ma le mamalu ma le maluali‘i; auā o ‘iā te oe mea uma o i le lagi ma le lalolagi; le ALI‘I e, e ou le mālō o fa‘asilisili oe e silisili i mea uma lava.
12. Mai ‘iā te oe le ‘oloa ma le mamalu, o oe ‘e te pule i mea uma lava; o i ai fo‘i i lou ‘a‘ao le mamana ma le malosi, o ‘iā te oe fo‘i e fa‘ateleina ma fa‘amalosia tagata uma lava.
13. O lenei, lo matou Atua e, ‘ua matou fa‘afetai atu ‘iā te oe ma vivi‘i atu i lou suafa mamalu.
14. “A o ai ‘ea a‘u nei? O ai ‘ea fo‘i lo‘u nu‘u, ‘ina ‘ua matou mafaia ‘ona fai taulaga ma le loto fa‘apenei? Auā mai ‘iā te oe mea uma lava; o au mea fo‘i ‘ua matou foa‘iina atu ai ‘iā te oe.
15. Auā o tagata ‘ese i matou i ou luma ma ē āumau e pei o matou tamā uma lava. O matou nei aso i le lalolagi e pei o se ata, e leai fo‘i se fa‘atuatuaga.
16. Le ALI‘I e, lo matou Atua, o le ‘oloa uma nei ‘ua saunia e i matou e fai a‘i se fale mo oe, mo lou suafa pa‘ia, e mai ‘iā te oe ia, o au mea uma fo‘i ia.
17. Lo‘u Atua e, ‘ua ‘ou iloa o oe ‘e te su‘esu‘e i le loto ma ‘ua e fiafia i le amiotonu. O a‘u nei, o le fa‘amaoni o lo‘u loto ‘ua ‘ou foa‘iina atu ai ma le fiafia o nei mea uma lava; o lenei, ‘ua ‘ou va‘ai atu ma le fiafia i lo‘u nu‘u, o nonofo mai ‘i‘inei e fai taulaga ‘iā te oe ma le loto.
18. Le ALI‘I e, le Atua o Aperaamo, o Isaako ma Isaraelu, o matou tamā, ‘ia e tausi e fa‘avavau lenei mea i le manatu ma mafaufau o loto o lou nu‘u, ma ‘ia e fa‘atumauina o latou loto ‘iā te oe;
19. ma ‘ia e avatua ‘iā Solomona lo‘u atali‘i o le loto ‘atoa e tausi ai au poloa‘iga ma au tulafono ma au sauniga ma ‘ia faia nei mea uma ma ‘ia faia le malumalu ‘ua ‘ou sauni i ai.”
20. ‘Ua fai atu Tavita i le fa‘apotopotoga uma, “‘Ia ‘outou fa‘amanū atu i le ALI‘I lo ‘outou Atua.” ‘Ona fa‘amanū atu ai lea o le fa‘apotopotoga uma i le ALI‘I le Atua o latou tamā, ‘ua latou punonou fo‘i, ma ifo atu i le ALI‘I ma le tupu.
21. O le taeao, ‘ina ‘ua mavae lea aso, ‘ua latou osi ai taulaga i le ALI‘I ma ‘ua fai ai taulaga mū i le ALI‘I, o povi po‘a e tasi le afe, o mamoe po‘a e tasi le afe, o tama‘i mamoe e tasi le afe, ‘atoa ma o latou taulaga i mea e inu ma taulaga e tele mo Isaraelu uma.
22. ‘Ua latou ‘a‘ai ma inu i luma o le ALI‘I i lea aso ma le fiafia tele.‘Ua latou tofia Solomona le atali‘i o Tavita e fai mo latou tupu, o le atu lua lea ma ‘ua fa‘au‘uina o ia mo le ALI‘I e fai ma ali‘i sili; o Satoka fo‘i ‘ua fai ma ositaulaga.
23. ‘Ona ti‘eti‘e ai lea o Solomona i le nofoāli‘i o le ALI‘I e fai ma tupu e sui a‘i lona tamā o Tavita; ‘ua manuia fo‘i o ia ma ‘ua fa‘alogo ‘iā te ia o Isaraelu uma.
24. O ali‘i sili uma fo‘i ma toa, ‘atoa fo‘i ma atali‘i uma o Tavita le tupu, ‘Ua usiusita‘i ‘iā Solomona le tupu.
25. ‘Ua fa‘atuputeleina le mamalu o Solomona e le ALI‘I i luma o Isaraelu uma ma ‘ua foa‘i atu ‘iā te ia le maluali‘i e le‘i fa‘apenā se tasi tupu i Isaraelu na muamua ‘iā te ia.
26. Na fai Tavita le atali‘i o Iese ma tupu ‘iā Isaraelu uma.
27. O ona tausaga na fai ai o ia ma tupu o Isaraelu e fagafulu ia; o tausaga e fitu na fai ai o ia ma tupu i Heperona ma tausaga e tolugafulu ma le tolu na fai ai o ia ma tupu i Ierusalema.
28. ‘Ua oti o ia, ‘ua matuā toeaina, ‘ua tele ona tausaga ma ana ‘oloa ma lona mamalu; ‘ua soloa‘i ane fo‘i Solomona lona atali‘i e fai ma tupu.
29. O mea na faia e le tupu o Tavita, o mea na muamua ma mea na mulimuli, fa‘auta, ‘ua tusia i le tala a Samuelu le tagata va‘ai ma le tala a Natano le perofeta ma le tala a Kato le tagata va‘ai,
30. ‘atoa ma le tala i lana nofoa‘iga uma ma lona malosi ma mea na o‘o ‘iā te ia ma Isaraelu, ‘atoa ma mālō uma o nu‘u.