1. ‘Ua fetāgofi Filisitia i le ‘atola‘au a le Atua ma latou ‘ave nai Epenesa i Asetota,
2. ‘Ua fetāgofi Filisitia i le ‘atola‘au a le Atua, ma avatu ai i le fale o Takono, ‘ua tu‘u i tafatafa o Takono.
3. ‘Ua ala usu atu i le taeao tagata o Asetota, fa‘auta ‘iā Takono, ‘ua pa‘ū faō i le ‘ele‘ele i luma o le ‘atola‘au a le ALI‘I; ‘ona latou fetāgofi ai lea ‘iā Takono, ma fa‘atū ‘iā te ia i le mea e tu ai.
4. ‘Ua latou ala usu atu fo‘i i le tasi taeao, fa‘auta fo‘i ‘iā Takono, ‘ua pa‘ū faō ia i le ‘ele‘ele i luma o le ‘atola‘au a le ALI‘I; ‘ua motu ‘ese fo‘i le ulu o Takono ma ona tapulima e lua i le faitoto‘a, ‘ua na o le ‘ogātino o Takono ‘ua toe ‘iā te ia.
5. O le mea lea ‘ua lē solia ai le faitoto‘a o Takono i Asetota e ositaulaga a Takono ‘atoa ma ē ulu atu i le fale o Takono, ‘ua o‘o mai i nei ona po.
6. Sa mamafa le ‘a‘ao o le ALI‘I i tagata o Asetota, ‘ua ia fa‘atafunaina i latou, ma fasi ‘iā te i latou i silailalo, o Asetota ma ona itū.
7. ‘Ua iloa e tagata o Asetota, ‘ua fa‘apea ‘ona fai, ‘ona latou fai ane ai lea, “E lē tu‘upeaina le ‘atola‘au a le Atua o Isaraelu ‘iā te i tatou; auā ‘ua mamafa lona ‘a‘ao ‘iā te i tatou ‘atoa ma Takono lo tatou atua.”
8. ‘Ona latou tu‘u savali lea, ma fa‘apotopotoina ali‘i uma o Filisitia ‘iā te i latou, ‘ua latou fai atu ai, “Se a se mea e faia i le ‘atola‘au a le Atua o Isaraelu?”‘Ona fai ane ai lea o i latou, “‘Inā fa‘ata‘amilo atu ia le ‘atola‘au a le Atua o Isaraelu i Kata.” ‘Ona fa‘ata‘amilo atu ai lea o le ‘atola‘au a le Atua o Isaraelu.
9. Mulimuli ane ‘ina ‘ua uma ‘ona fa‘ata‘amilo ai, ‘ona o‘o lea o le ‘a‘ao o le ALI‘I i le ‘a‘ai, ‘ua matuā tele lava le atuatuvale, ‘ua ia fasia tagata o le nu‘u, o tamaiti ‘atoa ma ē matutua, ‘ua fa‘atigāina i latou i le silailalo.
10. ‘Ona latou avatu lea o le ‘atola‘au a le Atua i Ekerona; ‘ua o‘o le ‘atola‘au a le Atua i Ekerona, ‘ona uiō ai lea o tagata o Ekerona, o lo‘o fa‘apea, “‘Ua latou fa‘ata‘amilo mai le ‘atola‘au a le Atua o Isaraelu ‘iā te i tatou e fasioti ‘iā te i tatou ‘atoa ma lo tatou nu‘u.”
11. ‘Ona latou tu‘u savali lea, ma fa‘apotopotoina ali‘i uma o Filisitia, ‘ua latou fai atu ai, “‘Inā avatu ia le ‘atola‘au a le Atua o Isaraelu ‘ia fo‘i atu i lona lava nu‘u, ‘ina ne‘i oti ai i matou ‘atoa ma lo matou nu‘u;” auā sa i ai le atuatuvale i le oti i le ‘a‘ai uma, sa matuā mamafa i ai le ‘a‘ao o le Atua.
12. O tagata na lē oti, ‘ua taia i latou i le silailalo; ‘ua alu a‘e i le lagi le uiō o le nu‘u.#