1. Na ta‘uina atu ‘iā Tavita, ‘ua fa‘apea, “Fa‘auta, o lo‘o tau Filisitia ma Kaila, o lo‘o latou vete fo‘i i mea e sasa ai saito.”
2. ‘Ona fesili lea o Tavita i le ALI‘I, ‘ua fa‘apea, “‘Ou te alu ‘ea, ma ‘ou fasi i ni Filisitia?”‘Ona fetalai mai lea o le ALI‘I ‘iā Tavita, “Alu ia, ma e fasi ‘iā Filisitia, ma e fa‘aola ‘iā Kaila.”
3. ‘Ona fai mai lea o tagata o Tavita ‘iā te ia, “Fa‘auta, ‘ua tatou fefefe ‘i‘inei i Iuta; ‘ae atili ai pe a tatou ō atu i Kaila i le itūtau‘a a Filisitia.”
4. ‘Ona toe fesili lava lea o Tavita i le ALI‘I; ‘ona tali mai lea o le ALI‘I ‘iā te ia, ‘ua fa‘apea mai, “Tula‘i ia, ‘inā alu ifo i Kaila, auā ‘ou te tu‘uina atu Filisitia i lou lima.”
5. ‘Ona alu atu ai lea o Tavita ma ona tagata i Kaila; ‘ua latou tau ma Filisitia, ‘ua fao a latou mea, ma fasi ‘iā te i latou i le fasi tele; ‘ua fa‘aola fo‘i e Tavita i ē na nonofo i Kaila.
6. Na sola mai Aviata le atali‘i o Aimeleka ‘iā Tavita i Kaila, ‘ua alu ifo ai o ia ma le efota i lona lima.
7. ‘Ua ta‘uina atu ‘iā Saulo, ‘ua alu atu Tavita i Kaila; ‘ona fai ane lea o Saulo, “‘Ua tu‘ulafoa‘i mai e le Atua ‘iā te ‘ia i o‘u lima, auā ‘ua punitia o ia ‘ina ‘ua alu atu i le ‘a‘ai ‘ua fai puipui ma fa‘amaufa‘alava.”
8. ‘Ona alu ai lea o le fa‘ala‘ei‘au a Saulo i le nu‘u uma e ō mai i le tau‘a, ‘ia ō ifo i Kaila, e si‘osi‘o atu ‘iā Tavita ma ona tagata.
9. ‘Ua iloa e Tavita, ‘ua fai togafiti leaga Saulo ‘iā te ia, ‘ona fai atu lea o ia ‘iā Aviata le ositaulaga, “‘Aumai ia le efota.”
10. ‘Ona fai atu lea o Tavita, “Le ALI‘I e, le Atua o Isaraelu, ‘ua matuā fa‘alogo lava e lau ‘au‘auna o lo‘o fou mai Saulo e sau i Kaila e fa‘atafuna i le ‘a‘ai ‘ona o a‘u.
11. E tu‘uina atu ‘ea a‘u e tagata o Kaila i lona lima? e alu ifo ‘ea Saulo, pei ‘ona fa‘alogo ai lau ‘au‘auna? Le ALI‘I e, le Atua o Isaraelu, ‘ia e fetalai mai i lau ‘au‘auna.”‘Ona fetalai mai lea o le ALI‘I, “E alu ifo ai lava o ia.”
12. ‘Ona fai atu lea o Tavita, “E tu‘uina atu ‘ea a‘u ma o‘u tagata e tagata o Kaila i lima o Saulo?”‘Ua fetalai mai ai le ALI‘I, “Latou te tu‘uina atu ai lava ‘outou.”
13. ‘Ona tula‘i lea o Tavita ma ona tagata, pe ‘atoa se to‘aono galau, ‘ua latou ō ‘ese nai Kaila, ‘ua so‘ona o lava. ‘Ua ta‘uina atu ‘iā Saulo, ‘ua sola Tavita nai Kaila; ‘ona tu‘u ai lea o ia, ‘ua lē toe alu atu.
14. ‘Ua nofo Tavita i le vao i ‘olo mauga, ‘ua nofo i le mauga i le vao o Sifi; ‘ua sā‘ili e Saulo ‘iā te ia i aso uma, ‘ae le‘i tu‘uina o ia e le Atua i lona lima.
15. ‘Ua iloa e Tavita, ‘ua alu atu Saulo e sā‘ili ‘ia oti o ia; sa i ai Tavita i le vao o Sifi i le vao matua.
16. ‘Ona tula‘i lea o Ionatana le atali‘i o Saulo, ‘ua alu atu ‘iā Tavita i le vao matua, ‘ua fa‘amalosi ‘iā te ia i la le Atua;
17. ‘ua fai mai fo‘i ‘iā te ia, “‘Aua le fefe, auā e lē maua oe e le lima o Saulo lo‘u tamā; e fai oe ma tupu o Isaraelu, o a‘u fo‘i ‘ou te aupito atu ‘iā te oe; ‘ua iloa lava e lo‘u tamā o Saulo e fa‘apea lava.”
18. ‘Ona fai lea o la la mavaega i luma o le ALI‘I; ‘ua nofo Tavita i le vao matua, ‘ae alu atu Ionatana i lona fale.
19. ‘Ua ō a‘e tagata o Sifi ‘iā Saulo i Kipea, ‘ua fa‘apea, “E lē ‘ua lafi ‘ea Tavita ‘iā te i matou i ‘olo mauga i le vao matua i le mauga o Hakila, o lo‘o i le itū i saute o Iesimoni?
20. O lenei, le tupu e, ‘ia e maliu ifo i mea uma ‘ua naunau i ai lou finagalo e maliu ifo ai; ‘ae a matou e tu‘uina atu o ia i le lima o le tupu.”
21. ‘Ona fai mai lea o Saulo, “‘Ia fa‘amanuia ‘outou e le ALI‘I, auā ‘ua ‘outou alolofa mai ‘iā te a‘u.
22. ‘Inā ō ia ‘outou, toe sauniuni lelei, ma iloa, ma va‘ai i le mea e masani ai o ia; po o ai ‘ua iloa ai o ia; auā fai mai ‘ua matua togafiti poto o ia.
23. ‘Ia ‘outou va‘ava‘ai fo‘i, ma ‘ia iloa ‘ona lafitaga uma e lafi ai o ia; ‘ona ‘outou fo‘i mai lea ‘iā te a‘u ma le tonu, ‘ona tatou ō lea ma ‘outou; ‘ae ‘āfai o i ai o ia i le nu‘u, ‘ou te sā‘ili ‘iā te ia i afe uma o Iuta.”
24. ‘Ona tula‘i lea o i latou, ‘ua ō i Sifi, ‘ua muamua ‘iā Saulo; a o Tavita ma ona tagata sa i le vao o Meona i latou, i le ‘ele‘ele laugatasi i le itū i saute o Iesimoni?
25. ‘Ua alu atu fo‘i Saulo ma ona tagata e sā‘ili ‘iā te ia; ‘ua ta‘uina atu ai ‘iā Tavita, ‘ona alu ifo lea o ia i le papa, ‘ua nofo i le vao o Meona. ‘Ua fa‘alogo ai Saulo, ‘ona tuliloa lea o ia ‘iā Tavita i le vao o Meona.
26. ‘Ua alu atu Saulo i le tasi itū o le mauga, a o Tavita ma ona tagata sa i le tasi itū o le mauga i latou. ‘Ua fa‘ata‘alise ‘ona alu ‘ese o Tavita ‘iā Saulo, a o Saulo ma ona tagata, ‘ua latou si‘osi‘o ‘iā Tavita ma ona tagata e pupu‘e ‘iā te i latou.
27. ‘Ona sau ai lea o le fe‘au ‘iā Saulo, ‘ua fa‘apea, “‘Ia vave ‘ona maliu atu, auā ‘ua osofia le nu‘u e Filisitia.”
28. ‘Ona fo‘i lea o Saulo a‘i le tuliloaga o Tavita, ‘ua alu e tau ma Filisitia; o le mea lea na latou fa‘aigoa ai lea mea, o le Papa o le fa‘asaoina.
29. ‘Ua alu a‘e Tavita nai lea mea, ‘ua nofo i ‘olo mauga i Enokati.#