1. ‘Ua fai atu Samuelu ‘iā Saulo, “Na ‘auina mai a‘u e le ALI‘I e fa‘au‘u ‘iā te oe ‘ia fai ma tupu o lona nu‘u o Isaraelu; o lenei, ‘ia e fa‘afofoga i le afioga a le ALI‘I.
2. O lo‘o fa‘apea ‘ona fetalai mai le ALI‘I o ‘au, ‘‘Ou te taui atu i le mea na faia e Amaleka ‘iā Isaraelu, ‘ina ‘ua tu mai o ia ‘iā te ia i le ala i lona alu a‘e nai Aikupito.
3. O lenei, ‘inā alu ia ma e fasi ‘iā Amaleka ma ‘outou fa‘aumatia ‘atoa uma ana mea, ‘aua ‘e te fa‘asaoina o ia, a ‘ia fasioti i tane ‘atoa ma fafine, o tama matua ‘atoa ma tama meamea, o povi ‘atoa ma mamoe, o kamela ‘atoa ma asini.’”
4. ‘Ona alu lea o le fa‘ala‘ei‘au a Saulo i le nu‘u ma na faitauina i latou i Tilaima, e lua selau afe o ‘au e sāvavali, ma afe e sefulu o tagata Iuta.
5. ‘Ua o‘o atu Saulo i le tasi ‘a‘ai o Amaleka, ‘ona latou lalafi ai lea i le alia.
6. ‘Ua fai atu Saulo i sa Kenī, “Ō mai ia ‘outou, ‘inā ō ‘ese, ‘inā ō ifo nai ‘iā Amaleka, ne‘i ‘ou fasia oe fa‘atasi ma ia; auā na e alofa i le fānauga a Isaraelu uma ‘ina ‘ua latou ō a‘e nai Aikupito;” ‘ona alu ‘ese ai lea o sa Kenī nai ‘iā Amaleka.
7. ‘Ua fasi e Saulo ‘iā Amaleka, e pau mai i Havila e o‘o i Sura, o lo‘o feagai ia ma Aikupito.
8. ‘Ua ia pu‘e ola ‘iā Akako le tupu a Amaleka, a o le nu‘u uma ‘ua ia fasioti ‘iā te i latou i le pelu.
9. ‘Ua fa‘asao e Saulo ma le nu‘u ‘iā Akako ma ē aupito lelei o mamoe ma povi, ‘atoa ma ē aupito i ai, ma tama‘i mamoe, ma mea lelei uma ‘ua latou lē mafafai ‘ona fa‘aumatia; a o manu uma ‘ua leaga ma mama‘i, ‘ua matuā fa‘aumatia ia.
10. ‘Ona o‘o mai ai lea o le afioga a le ALI‘I ‘iā Samuelu, ‘ua fa‘apea mai,
11. “‘Ua ‘ou salamō ‘ina ‘ua ‘ou tofia Saulo e fai ma tupu, auā ‘ua ia liliu ‘ese ‘iā te a‘u, ‘ua na lē fa‘ai‘uina a‘u ‘upu.” ‘Ua tigā ai Samuelu, ‘ua aoina le po o vala‘au o ia i le ALI‘I.
12. ‘Ua ala usu Samuelu i le taeao e fa‘afetaia‘i ‘iā Saulo, ‘ona ta‘ua mai lea ‘iā Samuelu, ‘ua fa‘apea, “Na sau Saulo i Karamelu, fa‘auta fo‘i, ‘ua fa‘atū le fa‘ailoga mōna, i le ‘ua fa‘ata‘amilo ma alu lea, ‘ua alu ifo i Kilikala.”
13. ‘Ua o‘o atu Samuelu ‘iā Saulo, ‘ona fai mai lea o Saulo ‘iā te ia, “‘Ia fa‘amanuia oe e le ALI‘I; ‘ua ‘ou fa‘ai‘uina le afioga a le ALI‘I.”
14. ‘Ona fai atu lea o Samuelu, “O le a fo‘i lenei tagi o mamoe i o‘u taliga ma le tagi o povi ‘ou te fa‘alogo i ai?”
15. ‘Ona fai mai lea o Saulo, “‘Ua latou ‘aumaia nai Amaleka; ‘ua fa‘asaoina e le nu‘u o mamoe ma povi e aupito lelei, ‘ina ‘ia fai ai taulaga i le ALI‘I lou Atua; a o mea na totoe ‘ua latou fa‘aumatia lava.”
16. ‘Ua fai atu Samuelu ‘iā Saulo, “Sōia, se‘i ‘ou ta‘u atu ‘iā te oe le mea na fetalai mai ai le ALI‘I ‘iā te a‘u anapō.”‘Ua fai mai o Saulo ‘iā te ia, “‘Inā fai mai ia.”
17. ‘Ua fai atu Samuelu, “Sa lē faia ‘ea oe ma ali‘i o itū‘āiga o Isaraelu ‘ina o fa‘atauva‘a oe i lou lava manatu; sa fa‘au‘uina fo‘i oe e le ALI‘I e fai ma tupu o Isaraelu.
18. Na ‘auina atu oe e le ALI‘I i le malaga, na ia fetalai atu, ‘Alu ia oe, ma e fa‘aumatia o ia tagata agasala, o Amaleka, ma e tau ma i latou se‘ia fa‘aumatia i latou.’
19. O le a le mea ‘ua e lē fa‘afofoga ai i le si‘ufofoga o le ALI‘I, a ‘ua e oso i mea a le itūtau‘a ma ‘ua e fai le mea leaga i luma o le ALI‘I.”
20. ‘Ona fai mai lea o Saulo ‘iā Samuelu, “Auā ‘ua ‘ou fa‘alogo lava i le si‘ufofoga o le ALI‘I; na ‘ou alu fo‘i i le malaga na ‘auina ai a‘u e le ALI‘I; ‘ua ‘ou ‘aumaia fo‘i Akako le tupu a Amaleka, ma a‘u fa‘aumatia Amaleka.
21. A ‘ua ‘aumai e le nu‘u mea a le itūtau‘a, o mamoe ma povi, (o mea sili lava ia i mea na fa‘afanoina,) e fai a‘i taulaga i le ALI‘I lou Atua i Kilikala.”
22. ‘Ua fai atu Samuelu, “E tusa, ‘ea ‘ona fiafia o le ALI‘I i taulaga mū ma taulaga, i lona fiafia i le fa‘alogo i le si‘ufofoga o le ALI‘I? Fa‘auta o le fa‘alogo e sili lea i le taulaga ma le usiusita‘i e sili lea i le ga‘o o mamoe po‘a.
23. Auā o le fouvale, e tusa ia ma le agasala o le fa‘ataulāitu; o le finau vale, e tusa ia ma le leaga o le tapua‘i i tupua. ‘Ua e lafoa‘i le afioga a le ALI‘I, o lea ‘ua lafoa‘i ai o ia ‘iā te oe ‘ia lē fai ma tupu.”
24. ‘Ona fai mai lea o Saulo ‘iā Samuelu, “‘Ua ‘ou agasala, auā ‘ua ‘ou tu‘umavaega i le afioga a le ALI‘I ‘atoa ma lau ‘upu; auā sa a‘u fefe i le nu‘u ma ‘ou fa‘alogo ‘iā latou ‘upu.
25. A o lenei, ‘ou te ‘ai‘oi ‘iā te oe, ‘ia e fa‘amāgalo i la‘u agasala, ma ‘ia tā fo‘i ma a‘u, ‘ia ‘ou ifo ai i le ALI‘I.”
26. ‘Ona fai atu lea o Samuelu ‘iā Saulo, “Tā te lē fo‘i ma oe, auā ‘ua e lafoa‘i le afioga a le ALI‘I, ‘ua lafoa‘i fo‘i e le ALI‘I ‘iā te oe, ‘ina ‘ia lē fai oe ma tupu ‘iā Isaraelu.”
27. ‘Ua liliu Samuelu o le a alu, ‘Ona tago atu ai lea o ia i lona pito ‘ofu, ‘ona māsae lea.
28. ‘Ona fai atu lea o Samuelu ‘iā te ia, “‘Ua saeia e le ALI‘I le mālō o Isaraelu nai ‘iā te oe i lenei aso ma ‘ua foa‘i atu ai i le tasi e sili lona lelei ‘iā te oe.
29. E lē pepelo lava le Mamalu o Isaraelu, e lē salamō fo‘i o ia; auā e lē se tagata o ia e salamō ai.”
30. ‘Ona fai mai lea o ia, “‘Ua ‘ou agasala, ‘ou te ‘ai‘oi atu ‘iā te oe, ‘ia e fa‘amamalu mai ‘iā te a‘u i luma o toeaina o lo‘u nu‘u ma luma o Isaraelu, ma ‘ia tā fo‘i ma a‘u, ‘ou te ifo i le ALI‘I lou Atua.”
31. ‘Ona fo‘i ai lea o Samuelu, ‘ua mulimuli atu ‘iā te ia o Saulo; ‘ona ifo lea o Saulo i le ALI‘I.
32. ‘Ua fai atu Samuelu, “‘Aumai ia Akako le tupu o Amaleka ‘iā te a‘u.” ‘Ona sau ai lea o Akako ‘iā te ia ma le fiafia; ‘ua fa‘apea mai Akako, “E moni lava ‘ua mavae le tigā o le oti.”
33. A ‘ua fai atu Samuelu,“E pei ‘ona āufānaua o fafine i lau pelu;e fa‘apea fo‘i lou tinā i fafine,e āufānaua o ia.”‘Ona tamotuina lea o Akako e Samuelu i luma o le ALI‘I i Kilikala.
34. ‘Ona alu lea o Samuelu i Rama, ‘ae alu a‘e Saulo i lona fale i Kipea.
35. ‘Ua lē toe asiasi Samuelu ‘iā Saulo, ‘ua o‘o i le aso o lona oti; a ‘ua fa‘anoanoa Samuelu ‘iā Saulo; ‘ua salamō fo‘i le ALI‘I ‘ina ‘ua ia tofia Saulo e fai ma tupu o Isaraelu.#