1. ‘Ua tatalo fo‘i Hana, ‘ua fa‘apea,“‘Ua ‘oli‘oli lava lo‘u loto i le ALI‘I;‘ua fa‘amaualugaina lo‘u nifo e le ALI‘I.‘Ua ‘ou mautali ai i ē ita mai,auā ‘ou te fiafia i le olataga mai ‘iā te oe.
2. “E leai sē pa‘ia e tusa ma le ALI‘I;auā ‘ua leai se tasi ‘ua na o oe;e leai fo‘i se papa e tusa ma lo tatou Atua.
3. Sōia tou te fa‘atele a ‘outou ‘upu fa‘amaualuga na‘uā,e alu a‘e ai le fa‘a‘ono‘ono i o ‘outou gutu.Auā o le ALI‘I, o le Atua sisila mai o ia,o ia fo‘i lē na te fuatia amio.
4. ‘Ua gauia ‘aufana a tagata malolosi;a o ē na tautevateva, ‘ua fusi o latou sulugātiti i le malosi.
5. O ē sa mā‘o‘ona,‘ua fai ma ‘au‘auna i latou ‘ia maua ai mea e ‘ai;a o ē sa fia ‘a‘ai, ‘ua mapu i latou.O lē na pā ‘ua i‘u ‘ina fānau mai se to‘afitu;a o ia ‘ua to‘atele ana fānau, ‘ua vaivai o ia.
6. O le ALI‘I na te fasioti ma fa‘aola;na te fa‘ao‘o ifo i le tu‘ugamau,ma fa‘afo‘i a‘e.
7. O le ALI‘I na te fa‘amativaina ma fa‘atamao‘āigaina;o ia na te fa‘amaulaloina ma fa‘amaualugaina.
8. Na te fa‘atula‘iina le tagatalautele nai le ‘ele‘ele,na te fa‘aeaina fo‘i le tagata mativa nai le fa‘atafuna.‘Ia nofo fa‘atasi ma ali‘i,‘ia fai fo‘i mo latou tofi le nofoāli‘i mamalu.Auā o lo‘o i le ALI‘I fa‘avae o le lalolagi,‘ua na fa‘ae‘e ai le atu laulau.
9. “E leoleo e ia vae o ona tagata pa‘ia,‘ae fa‘alologo tagata agasala i le pouliuli;auā e lē mālō le tagata i le malosi.
10. O ē ‘ua finau i le ALI‘I e fa‘amomomoina i latou;e fa‘apā mai e ia le faititili mai le lagi i o latou luga.E pule le ALI‘I i tulu‘iga o le lalolagi;na te foa‘i atu le malosi i lana tupu,e fa‘amaualugaina fo‘i e ia le nifo o lē na ia fa‘au‘uina.”
11. ‘Ua alu Elekana i Rama i lona fale, ‘ae nofo le tama e ‘au‘auna i le ALI‘I i luma o Eli le ositaulaga.
12. A o atali‘i o Eli, o tagata ulavavale i lā‘ua, ‘ua la lē iloa le ALI‘I.
13. O le tu lenei a ositaulaga e fai i le nu‘u; a avatu e se tasi le taulaga, pe a tunu tufa‘aga, ‘ona alu atu ai lea o le ‘au‘auna a le ositaulaga ma le tui mata tolu i lona lima;
14. ona tutu‘i atu lea i le tanoa, po o le pani, po le ‘ulo, po o se tasi mea e tunu a‘i mea, o mea uma na ‘ava‘e i le tui ‘ua ‘ave e le ositaulaga māna; ‘ua fa‘apea lava ‘ona fai e i lā‘ua ‘iā Isaraelu uma na ō a‘e i Sailo.
15. ‘Ua alu le ‘au‘auna a le ositaulaga, a o le‘i susunuina e i latou le ga‘o, ma na fai atu i le tagata e ana le taulaga, “‘Aumai ia se tufa‘aga e tunu mā le ositaulaga; auā na te lē talia mai ‘iā te oe se tufa‘aga ‘ua vela, a o se tufa‘aga mata lava.”
16. I le a fai mai le tagata ‘iā te ia, “Se‘ia latou lua‘i susunu le ga‘o,” ‘ona ‘ave ai lea mā oe le mea ‘e te loto i ai; ‘ona fai atu lea o ia ‘iā te ia, “E leai, a ‘ia e ‘aumai nei lava, a leai ‘ou te faoa.”
17. O lea sa matuā tele ai le agasala a nei taulele‘a i luma o le ALI‘I, auā na ‘ino‘ino ai tagata i taulaga i le ALI‘I.
18. A o Samuelu, na ‘au‘auna o ia i luma o le ALI‘I; ‘ua ‘ofu le tama i le efota ‘ie lino.
19. Na faia e lona tinā se ‘ofu itiiti mōna, na ‘avea ai ‘iā te ia i lea tausaga ma lea tausaga, pe a la ō a‘e ma lana tane e avatu ai le taulaga e fai i tausaga.
20. ‘Ua fa‘amanuia fo‘i Eli ‘iā Elekana ma lana avā, ma ‘ua fai atu, “‘Ia foa‘i mai e le ALI‘I ‘iā te oe fānau i lenei fafine e sui a‘i lana na ia tu‘u mai i le ALI‘I.”‘Ona la ō ai lea i lona nu‘u.
21. O lea na asiasi ai le ALI‘I ‘iā Hana, ‘ua tō ia, ‘ona fānau mai lea; o ana tama tane o to‘atolu ma tama teine e to‘alua. ‘Ua tupu le tama o Samuelu i luma o le ALI‘I.
22. Sa matuā toeaina Eli, ‘ua fa‘alogo fo‘i o ia i mea uma na faia e ona atali‘i ‘iā Isaraelu uma ma latou momoe ma fafine o ē na fa‘apotopoto atu i le faitoto‘a o le fale fetāfa‘i o le fa‘apotopotoga.
23. ‘Ua fai atu o ia ‘iā te i lā‘ua, “Se a le mea lua te fai ai nei mea? Auā ‘ou te fa‘alogo i le nu‘u nei uma lava ‘iā ‘oulua amio leaga;
24. o‘u atali‘i e, sōia, auā e lē se tala lelei ‘ou te fa‘alogo ai ‘iā te ‘oulua, ‘ina ‘ua ‘oulua fa‘asesē i le nu‘u o le ALI‘I.
25. ‘Āfai e agasala se tasi tagata i le tasi tagata e fa‘amasino le Atua ‘iā te ia; ‘ae ‘āfai e agasala se tagata i le ALI‘I, o ai ‘ea sē fai ma puluvaga ‘iā te ia?”A ‘ua la lē fa‘alogo i le ‘upu a lo la tamā, auā ‘ua finagalo le ALI‘I e fasioti ‘iā te i lā‘ua.
26. ‘Ua tupu pea lava le tama o Samuelu ma ‘ua fa‘apelepeleina e le ALI‘I ‘atoa fo‘i ma tagata.
27. ‘Ua alu atu se tasi tagata o le Atua ‘iā Eli, ‘ua fai atu ‘iā te ia, “‘Ua fa‘apea ‘ona fetalai mai o le ALI‘I, ‘Na ‘ou lē matuā fa‘aali ‘ea a‘u i le ‘āiga o lou tamā ‘ina o i ai i latou i Aikupito i le ‘āiga o Farao?
28. Na ‘ou lē filifili ‘ea ‘iā te ia nai itū‘āiga uma o Isaraelu ‘ia fai ma ositaulaga ‘iā te a‘u, ‘ia alu a‘e i lo‘u fatafaitaulaga, ‘ia susunu i mea manogi, ‘ia ‘ofu i le efota i o‘u luma? Na ‘ou le foa‘i ‘ea i le ‘āiga o lou tamā taulaga uma lava a le fānauga a Isaraelu e fai i le afi?
29. Se a le mea e fa‘alēaogā ai e ‘outou le taulaga e fai ‘iā te a‘u ma mea e foa‘i mai, na ‘ou poloa‘i e fai i lo‘u fale; ma ‘ua e fa‘asili i ou atali‘i ‘iā te a‘u, e fa‘apuputa ai ‘outou ‘iā te ‘outou i tufa‘aga sili i mea foa‘i mai uma lava e Isaraelu lo‘u nu‘u?’
30. O le mea lea ‘ua fetalai mai ai le ALI‘I le Atua o Isaraelu: ‘Na ‘ou fai atu lava i lou ‘āiga ma le ‘āiga o lou tamā latou te feoa‘i i o‘u luma e fa‘avavau;’ a o lenei, ‘ua fetalai mai le ALI‘I, ‘‘Ia mamao lea mea ‘iā te a‘u, a o ē fa‘asili ‘iā te a‘u, ‘ou te fa‘asili ‘iā te i latou; a o ē ‘ino‘ino mai ‘iā te a‘u, e ta‘u fa‘atauva‘aina i latou.
31. Fa‘auta, o le a o‘o mai aso ‘ou te gagau ai lou lima ma lima o le ‘āiga o lou tamā, ‘ina ‘ia lē toe i ai se toeaina i lou ‘āiga.
32. ‘E te iloa atu se fili i le malumalu i mea uma e fa‘amanuia ai Isaraelu; o lea e leai se toeaina i lou ‘āiga i aso uma lava.
33. O le tagata o lou ‘āiga ‘ou te lē vavae‘eseina i lo‘u fatafaitaulaga, e fa‘atauasoina ai ou mata ma vaivai ai lou loto; a o le vao tagata uma o lou ‘āiga e oti i latou o taulele‘a.
34. O lenei fo‘i le fa‘ailoga ‘iā te oe e o‘o ai i ou atali‘i e to‘alua o Hofeni ma Fineaso, e oti i lā‘ua i le aso e tasi.
35. ‘Ou te fa‘atūina mo a‘u se ositaulaga fa‘amaoni, na te faia e tusa ma lo‘u loto ma la‘u manatu, ‘ou te ati a‘e fo‘i se fale tumau mōna; e savali o ia i aso uma lava i luma o lē ‘ua a‘u fa‘au‘uina.
36. O ē ‘ua totoe uma lava i lou ‘āiga e ta‘itasi ma sau ma fa‘atoga ‘iā te ia i se tupe ario, po o se pōtoi areto, e fai ane fo‘i, ‘Ou te ‘ai‘oi ‘iā te oe, ‘ia e tofi mai ‘iā te a‘u i sina faiva o ositaulaga, ‘ina ‘ia ‘ou ‘ai ai sina mea e ‘ai.’”