1. ‘Ua fa‘apotopoto e Filisitia a latou ‘au e tau. ‘Ua fa‘apotopoto i latou i Suka o i sa Iutā; ‘ua latou tolauapi i le vā o Suka ma Aseka i Efesetame.
2. ‘Ua fa‘apotopoto fo‘i Saulo ma tagata Isaraelu, ‘ua tolauapi i le vanu o le tapeneto, ‘ua latou tofi ai le tau‘a e ō atu e tau ma Filisitia.
3. ‘Ua tutū mai fo‘i Filisitia i le mauga i le tasi itū, a ‘ua tutū atu Isaraelu i le mauga i le tasi itū, ‘ae vā a‘i le vanu.
4. ‘Ona alu ane lea o le toa nai le togālauapi a Filisitia, o Koliata lona igoa mai Kata; o lona maualuga e ono kupita ma le aga e tasi.
5. Sa i lona ulu le pulou ‘apamemea, sa ‘ofu i le ufifatafata fa‘auna o i‘a; o le mamafa o lona ufifatafata ‘ua lima gaafe o sekeli o ‘apamemea.
6. Sa fai fo‘i ufivae ‘apamemea i ona vae, ma le tao ‘apamemea i lona vaitau‘au.
7. O le fuata o lona tao e pei o le la‘au fa‘alava o le lalaga ‘ie, o le matatao o lona tao e ono galau sekeli o u‘amea; ‘ua muamua atu i ona luma lē na ‘ave le tali pupuni.
8. ‘Ua tu o ia ma vala‘au i le itūtau‘a a Isaraelu, ‘ua fa‘apea mai ‘iā te i latou, “O le a le mea tou te ō mai ai e tofi le tau‘a? E lē o a‘u ‘ea le Filisitia a o ‘outou o ‘au‘auna a Saulo ‘outou? filifili ia e ‘outou se tagata e alu ifo ‘iā te a‘u;
9. ‘āfai na te mafaia ‘ona mā tau ma fasi ‘iā te a‘u, matou te fai ma ‘au‘auna ‘iā te ‘outou; ‘ae ‘āfai ‘ou te mālō ‘iā te ia, ma ‘ou fasi ‘iā te ia, ‘ona fai lea o ‘outou ma a matou ‘au‘auna, e ‘au‘auna mai ‘iā te i matou.”
10. ‘Ua fai mai le Filisitia, “O a‘u nei, ‘ou te fa‘amasiasi i le itūtau‘a a Isaraelu i le aso nei; tu‘u mai ‘iā te a‘u se tagata ma te tau.”
11. ‘Ua fa‘alogo Saulo ma Isaraelu uma i nei ‘upu a le Filisitia, ‘ona matata‘u ai lea ma fefefe tele i latou.
12. O Tavita o le atali‘i ia o le tasi tagata o Efarata, o Peteleema o Iuta, ‘ua igoa ‘iā Iese, e to‘avalu ona atali‘i; na ta‘utoeaina o ia e tagata i ona aso o Saulo.
13. O atali‘i o Iese e to‘atolu ē na matutua ‘ua latou ō ma Saulo i le tau‘a; o igoa nei o ona atali‘i e to‘atolu na o i le tau‘a, o Eliapo le ulumatua, o lē aupito ane i ai o Apinatapa, o lona to‘atolu o Sama.
14. O Tavita o le ui‘i ia; a o le to‘atolu na matutua ‘ua latou mulimuli ‘iā Saulo.
15. ‘Ua alu Tavita, ‘ua fo‘i atu nai ‘iā Saulo e leoleo mamoe a lona tamā i Peteleema.
16. ‘Ua fa‘alatalata mai le Filisitia i le taeao ma le afiafi, ‘ua tu mai i aso e fagafulu.
17. ‘Ua fai mai Iese ‘iā Tavita lona atali‘i, “‘Inā avatu ia i ou uso o lenei efa o saito tunu, ma pōtoi areto nei e fuagafulu ma e momo‘e atu i ou uso i le togālauapi.
18. ‘Ave fo‘i nei tufa‘aga o suāsusu ma‘a‘a e sefulu i le ali‘i o lo latou to‘aafe, ma ‘ia e asiasi i ou uso po ‘ua manuia, ma ‘ia ‘aumai so latou fa‘amaoni.”
19. O Saulo ma i latou ma tagata Isaraelu uma sa i le vanu o le tapeneto i latou, o lo‘o tau ma Filisitia.
20. ‘Ona tula‘i lea o Tavita i le taeao, ‘ua tu‘uina atu ma mamoe i se leoleo, ‘ua ia ‘ave mea, ‘ua alu fo‘i ia pei ‘ona poloa‘i mai o Iese ‘iā te ia; ‘ua o‘o atu ia i le ‘olo o le a ō ‘au i le tau‘a, ‘ua pā le ‘alaga o le a tau.
21. Auā na tofi le tau‘a a Isaraelu ma Filisitia, ma ‘ua fesagai itūtau‘a.
22. ‘Ona tu‘u atu lea e Tavita o mea na ‘iā te ia i le lima o le leoleo i mea, ‘ua momo‘e atu i ‘au, ‘ua alu ma ofo atu i ona uso.
23. O lo‘o tautala o ia ma i latou, fa‘auta, ‘ua alu a‘e le toa, o Koliata lona igoa, o le Filisitia, o le Kata, a‘i ‘au a Filisitia, ‘ua tautala o ia pei o ana ‘upu na lua‘i fai; ‘ua fa‘alogo ai Tavita.
24. O tagata uma o Isaraelu ‘ua latou va‘ai atu i le tagata, ‘ona latou sōsōla lea i ona luma, ‘ina ‘ua latou matuā fefefe ai.
25. ‘Ua fai ane le tasi tagata o Isaraelu, “‘Ua ‘outou iloa ‘ea lenei tagata ‘ua alu a‘e? Auā na alu a‘e ia e fāifai ‘iā Isaraelu; o le tagata fo‘i na te fasioti ‘iā te ia, e fa‘atamao‘āigaina o ia e le tupu i le ‘oa tele, e avatu fo‘i lona afafine e fai māna avā, e fa‘asa‘olotoina fo‘i e ia le ‘āiga o lona tamā ‘iā Isaraelu.”
26. ‘Ua fesili atu Tavita i tagata na tutū fa‘atasi ma ia, ‘ua fa‘apea, “Se a se mea e avatu ma le tagata na te fasia lenei Filisitia, e galo ifo ai le fāifai ‘iā Isaraelu? auā po o ai lenei Filisitia lē peritomeina na te fāifai ai i ‘au a le Atua soifua?”
27. ‘Ona tali mai lea o le nu‘u ‘iā te ia e tusa ma ia ‘upu na muamua, ‘ua fa‘apea, “E fa‘apea ‘ona faia i le tagata na te fasi ‘iā te ia.”
28. ‘Ua fa‘alogo Eliapo lona uso e matuā i lana fesili i tagata, ‘ona tupu ai lea o le ita o Eliapo ‘iā Tavita, ‘ua fai mai fo‘i, “Se a le mea ‘ua e sau ai? ‘Ua e tu‘uina atu fo‘i ‘iā te ai nā mamoe itiiti i le vao? ‘ua ‘ou iloa lava lou fa‘amaualuga ma le leaga o lou loto, auā o le fia matamata i le tau‘a ‘ua e sau ai.”
29. ‘Ona fai atu lea o Tavita, “O le a ‘ea le mea ‘ua ‘ou faia nei? ‘Ua fai fua ‘ea la‘u mea.?”
30. ‘Ua liliu ‘ese o ia ‘iā te ia, ‘ua fa‘asaga atu i le tasi, ‘ua fai atu fo‘i pei o na ‘upu; ‘ona tali mai lea o le nu‘u pei o le lua‘i ‘upu.
31. ‘Ua latou fa‘alogologo i ‘upu na fai mai ai Tavita, ‘ona latou ta‘uina atu ai lea ‘iā Saulo. ‘Ona ‘a‘ami ai lea o ia ‘iā te ia.
32. ‘Ua fai mai Tavita ‘iā Saulo, “‘Aua ne‘i vaivai le loto o se tasi tagata ‘ona o ia; e alu lava lau ‘au‘auna e tau ma lenā Filisitia.”
33. ‘Ona fai mai lea o Saulo ‘iā Tavita, “‘E te lē lavā ‘ona ‘oulua tau ma lenā Filisitia, auā o oe o le tamaitiiti, a o ia o le toa talu ‘ona tamaitiiti.”
34. ‘Ona tali atu lea o Tavita ‘iā Saulo, “Sa leoleo lau ‘au‘auna i mamoe a lona tamā; ‘ona alu atu lea o le leona ma le urosa, ‘ua ‘ave le tama‘i mamoe nai le lafu;
35. ‘ona ‘ou tuliloa lea ‘iā te ia, ma ‘ou fasi ‘iā te ia, ma segi mai le mea nai lona gutu; na tu mai o ia ‘iā te a‘u, ‘ona ‘ou tago ai lea i lana ‘ava, ma fasi ‘iā te ia, ‘ua mate ai.
36. Na fasia e lau ‘au‘auna le leona ‘atoa ma le urosa; e fa‘apea fo‘i o lenā Filisitia lē peritomeina, e pei o so lā‘ua, ‘ina ‘ua ia fāifai i le itūtau‘a a le Atua soifua.”
37. ‘Ua fai atu fo‘i Tavita, “O le ALI‘I na ia lavea‘i ‘iā te a‘u nai le lima o le leona ma le lima o le urosa, o ia lava na te lavea‘i ‘iā te a‘u a‘i le lima o lenā Filisitia.”‘Ona fai mai lea o Saulo ‘iā Tavita, “Alu ia oe, ‘ia ‘iā te oe fo‘i le ALI‘I.”
38. ‘Ona fa‘a‘ofu lea e Saulo ‘iā Tavita i ona ‘ofu, ‘ua fa‘apulouina lona ulu i le pulou ‘apamemea, ‘ua fa‘a‘ofu fo‘i ‘iā te ia i le ufifatafata u‘amea.
39. ‘Ua fusi e Tavita lana pelu i luga o ona ‘ofu; ‘ona fa‘ata‘ita‘i lea o ia ‘ona alu, auā na ia le masani ai. ‘Ona fai mai lea o Tavita ‘iā Saulo, “‘Ou te lē mafai ‘ona alu ma nei mea, auā ‘ou te le‘i masani ai.” ‘Ona tu‘u ‘ese ai lea e Tavita o mea nai ‘iā te ia.
40. ‘Ua ia ‘ave lona to‘oto‘o i lona lima ma ‘ua filifili i ma‘a lamolemole e lima mai le alia, ‘ua fafao ai i le ‘ato o le leoleo mamoe sa ‘iā te ia, (o le taga fo‘i lea,) ma le ma‘atā i lona lima; ‘ona fa‘alatalata atu lea o ia i le Filisitia.
41. ‘Ua sau fo‘i le Filisitia, ‘ua fa‘alatalata mai ‘iā Tavita, ‘ua muamua i ona luma le tagata sa ‘ave lona talipupuni.
42. ‘Ua va‘ava‘ai mai le Filisitia, ‘ua na iloa atu ‘iā Tavita, ‘ona ‘ino‘ino ai lea ‘iā te ia; auā o le tamaitiiti o ia, ‘ua enaenamūmū lona lauulu, ‘ua manaia fo‘i ona mata.
43. ‘Ua fai mai le Filisitia ‘iā Tavita, “O se ulī ‘ea a‘u, ‘ina ‘ua e sau ‘iā te a‘u ma to‘oto‘o?” ‘Ona fetu‘u lea e le Filisitia ‘iā Tavita i ona atua.
44. ‘Ua fai mai fo‘i le Filisitia ‘iā Tavita, “Sau ia ‘iā te a‘u, ‘ou te foa‘i atu ai lou tino i manu felelei ma manu tata‘a.”
45. ‘Ona tali atu lea o Tavita i le Filisitia, “‘Ua e sau ‘iā te a‘u ma le pelu, ma le tao, ma le tao leoleo; a o a‘u, ‘ou te alu atu ‘iā te oe i le suafa o le ALI‘I o ‘au, o le Atua o le itūtau‘a a Isaraelu ‘ua e fāifai i ai.
46. O le aso nei e tu‘uina mai ai oe e le ALI‘I i lo‘u lima, ‘ou te fasi ‘iā te oe, ma ‘ave ‘ese lou ulu; ‘ou te foa‘i atu fo‘i tino oti o ‘au a Filisitia i lenei aso i manu felelei ma manu fe‘ai e tata‘a; e iloa ai e le lalolagi uma, o i ai le Atua ‘iā Isaraelu.
47. E iloa ai fo‘i e lenei fa‘apotopotoga uma, e lē fa‘aolaina tagata e le ALI‘I i se pelu ma se tao; auā o lo‘o i le ALI‘I le tau‘a, na te tu‘uina mai ‘outou i o matou lima.”
48. ‘Ua tula‘i le Filisitia, ‘ua alu ane ma fa‘alatalata e fa‘afetaia‘i ‘iā Tavita; ‘ona fa‘ata‘alise lea o Tavita, ‘ua momo‘e atu i le itūtau‘a e fa‘afetaia‘i i le Filisitia.
49. ‘Ona tago ifo lea o Tavita i le ‘ato, ‘ua ‘ava‘e ai se ma‘a, ‘ua sasau e ia le ma‘atā, ‘ua lavea le Filisitia i lona muaulu, ‘ua goto le ma‘a i lona muaulu, ‘ona pa‘ū ai lea o ia i le ‘ele‘ele.
50. ‘Ua mālō Tavita i le Filisitia i le ma‘atā, ma le ma‘a, ‘ua na fasi le Filisitia ‘ua oti ai, ‘ae leai se pelu i le lima o Tavita.
51. ‘Ona momo‘e atu ai lea o Tavita, ‘ua tu i luga o le Filisitia, ‘ua tago i lana pelu, ‘ua tō a‘e nai lona fa‘amoega, ‘ua na fa‘aoti ai ‘iā te ia, ma vavae ai lona ulu.‘Ua va‘ai Filisitia ‘ua oti lo latou toa, ‘ona sōsōla ai lea o i latou.
52. ‘Ona tutū lea o tagata o Isaraelu ma Iuta, ‘ua solovī, ma tuliloa ‘iā Filisitia e o‘o atu i le vanu, ‘ua o‘o fo‘i i puipui o Ekerona. ‘Ua pa‘u‘ū ē na manunu‘a o Filisitia i le ala o Saraima, ‘ua o‘o i Kata, na o‘o fo‘i i Ekerona.
53. ‘Ua fo‘i atu le fānauga a Isaraelu sa tulitatao ‘iā Filisitia, ‘ona latou vetea lea o latou togālauapi.
54. ‘Ua ‘ave e Tavita le ulu o Filisitia, ‘ua ‘aumai i Ierusalema, a o ana mea ‘ua tu‘u e ia i lona fale ‘ie.
55. Na va‘ai Saulo ‘iā Tavita ‘ina ‘ua alu atu e fa‘afetaia‘i i le Filisitia, ‘ona fai atu ai lea o ia ‘iā Apineru le pule i ‘au, “Apineru e, se atali‘i o ai lenā tama?”‘Ua fai mai Apineru, “‘Ua e soifua, le tupu e ‘ou te lē iloa lava.”
56. ‘Ona fai atu lea o le tupu, “‘Ia e fesili, pe se atali‘i o ai lenā taule‘ale‘a?”
57. O lo‘o fo‘i Tavita nai le fasiga o le Filisitia, ‘ona ‘ave lea o ia e Apineru, ‘ua momoli ‘iā te ia i luma o Saulo, o le ulu fo‘i o le Filisitia ‘ua i lona lima.
58. ‘Ona fai mai lea o Saulo ‘iā te ia, “Le atali‘i ‘ea oe o ai?”‘Ua fai atu Tavita, “O a‘u o le atali‘i o lau ‘au‘auna o Iese le Peteleema.”