1. ‘Ona tago lea o Samuelu i le fagu u‘u, ‘ua liligi ifo ai i lona ulu, ma sogi ‘iā te ia; ‘ua fai mai, “E lē ‘ua fa‘au‘u ‘ea oe e le ALI‘I e fai ma ali‘i i lona tofi?
2. A e alu ‘ese nei ‘iā te a‘u, ‘e te maua atu tagata e to‘alua i le tu‘ugamau o Rasela i le tuā‘oi o Peniamina i Selesa; e fai mai i lā‘ua ‘iā te oe, ‘‘Ua maua asini na e alu e sā‘ili; fa‘auta fo‘i, ‘ua tu‘u e lou tamā lona manatu i asini, ‘ae atuatuvale ‘ona o ‘oulua, o lo‘o fa‘apea ia: Se a se mea ‘ou te faia ‘ona o lo‘u atali‘i?’
3. ‘Ona e alu atu lea nai lea mea, ‘e te o‘o atu i le aluna o Tapora, tou te fetaia‘i ai ma tagata e to‘atolu o lo‘o ō a‘e i latou i le Atua i Peteli. O lo‘o ‘ave e le tasi tama‘i ‘oti e tolu, o lo‘o ‘ave e le tasi pōtoi areto e tolugafua, o lo‘o ‘ave e le tasi le fagu pa‘u o uaina.
4. E ofo mai i latou ‘iā te oe, latou te foa‘i mai fo‘i ‘iā te oe o pōtoi areto e lua, ‘e te talia fo‘i nai o latou lima.
5. Mulimuli ane ‘e te o‘o i le mauga o le Atua, o lo‘o i ai le leoleoga a Filisitia; a e o‘o i ai i le ‘a‘ai, ‘ona fetaia‘i lea ma oe le ‘au perofeta o lo‘o ō ifo i le mea maualuga, o lo‘o muamua i o latou luma napeli, ma topa, ma fagufagu, ma kitara, e perofeta ane fo‘i i latou.
6. ‘Ona osofia lea o oe e le Agaga o le ALI‘I ‘e te perofeta fo‘i oe fa‘atasi ma i latou; e liua oe peiseaī se isi tagata.
7. A o‘o mai nei i fa‘ailoga ‘iā te oe, faitalia oe ‘ona fai o se mea ‘e te manatu ai ‘ua tatau, auā o lo‘o ‘iā te oe le Atua.
8. ‘E te muamua ifo ‘iā te a‘u i Kilikala; fa‘auta fo‘i, ‘ou te alu ifo ‘iā te oe e fai ai taulaga mū, ma sauni taulaga fa‘afetai. E fitu aso ‘e te fa‘atali ai i lo‘u alu atu ‘iā te oe, ma ‘ou fa‘ailoa atu ‘iā te oe le mea ‘e te faia.”
9. ‘Ua o‘o ‘ina ‘ua liliu atu lona tua e alu ‘ese ‘iā Samuelu, ‘ona liliu lea o lona loto e le Atua; ‘ua taunu‘u fo‘i nei fa‘ailoga uma i lea lava aso.
10. ‘Ua o‘o atu i lā‘ua i le mauga, fa‘auta i le ‘au perofeta ‘ua fetaia‘i ma ia, ‘ona osofia lea o ia e le Agaga o le Atua, ‘ona perofeta ane lea o ia fa‘atasi ma i latou.
11. O i latou uma na iloa o ia anamua ‘ua latou va‘ai, fa‘auta, ‘ua perofeta mai o ia fa‘atasi ma le ‘au perofeta; ‘ona fa‘apea lea o le nu‘u o le tasi i le tasi, “O le a lenei mea ‘ua o‘o i le atali‘i o Kiso? ‘Ua i ai ‘ea fo‘i Saulo fa‘atasi ma le ‘au perofeta.”
12. ‘Ona tali mai lea o le isi tagata o lea nu‘u, ‘ua fa‘apea, “A o ai ‘ea lo latou tamā?” O le mea lea sa fai ai le fa‘atusa, “O lo‘o i ai ‘ea fo‘i Saulo ma le au perofeta?”
13. ‘Ua uma ‘ona perofeta ane o ia, ‘ona alu a‘e ai lea o ia i le mea maualuga.
14. ‘Ua fai mai le uso o le tamā o Saulo ‘iā te ia ma lana ‘au‘auna, “Na ‘oulua ō ifea?”‘Ua fai atu, “Na mā sā‘ili asini, ‘ua ma iloa ‘ua leai, ‘ona mā ō lea ‘iā Samuelu.”
15. ‘Ona fai mai lea o le uso o le tamā o Saulo, “Se‘i ta‘u mai ia ‘iā te a‘u, po o le a na fai mai ai Samuelu ‘iā te ‘oulua?”
16. ‘Ona fai atu lea o Saulo i le uso o lona tamā, “Na ia ta‘utino mai ‘iā te i mā‘ua, ‘ua maua asini;” a o le ‘upu i le mālō na fai mai ai Samuelu, e le‘i ta‘u i ai ‘iā te ia.
17. ‘Ua fa‘apotopotoina le nu‘u uma e Samuelu i luma o le ALI‘I i Mesepa.
18. ‘Ona fai atu lea o ia i le fānauga a Isaraelu, “O lo‘o fa‘apea mai le ALI‘I le Atua o Isaraelu, ‘O a‘u na ‘ou ‘aveina a‘e ‘iā Isaraelu nai Aikupito, ma ‘ou lavea‘iina ‘outou nai lima o Aikupito, ma lima o mālō uma na fa‘asauā ‘iā te ‘outou.’
19. A o ‘outou, ‘ua ‘outou lafoa‘i atu i lenei aso i lo ‘outou Atua sa na fa‘aola ‘iā te ‘outou i mea uma na ‘outou leaga ai ma o ‘outou puapuagā uma; ‘ua ‘outou fai mai fo‘i ‘iā te ia, ‘‘Ia tofia lava se tupu mo i matou o lenei.’ ‘Inā laulau tutū mai ia i luma o le ALI‘I o ‘outou itū‘āiga ma o ‘outou ‘āiga.”
20. ‘Ona fa‘alatalataina mai lea e Samuelu o itū‘āiga uma o Isaraelu; ‘ona maua lea o le itū‘āiga o Peniamina.
21. ‘Ua fa‘alatalataina mai e ia le itū‘āiga o Peniamina, e āua‘i mai ai ‘āiga, ‘ona maua lea o le ‘āiga o Matere; ‘ona maua lea o Saulo le atali‘i o Kiso; na latou sā‘ili ‘iā te ia, e le‘i iloa.
22. ‘Ona toe fesili atu lea o i latou i le ALI‘I, “E i‘u ‘ea ‘ina sau le tagata ‘i‘inei”‘Ua fetalai mai le ALI‘I, “Fa‘auta, o lo‘o lafi o ia i le vao ‘oa.”
23. ‘Ona latou tamomo‘e atu lea, ‘ua ‘a‘ami ‘iā Saulo nai lea mea; ‘ua tu atu o ia i luma o le nu‘u, e gata ifo i ona tau‘au le maualuga o le nu‘u uma.
24. ‘Ona fai atu lea o Samuelu i le nu‘u uma, “Va‘ava‘ai ia ‘iā te ia ‘ua filifilia e le ALI‘I, ‘ua leai se tasi o le nu‘u uma e tusa ma ia.”‘Ona ‘alalaga ai lea o le nu‘u uma, ‘ua fa‘apea, “‘Ia soifua le tupu!”
25. ‘Ona ta‘u atu lea e Samuelu i le nu‘u o le uiga o le mālō, ma na tusia i le tusi, ma na teua i luma o le ALI‘I. ‘Ona ‘a‘auina atu lea e Samuelu o le nu‘u uma ‘ia ta‘itasi ma alu i lona ‘āiga.
26. ‘Ua alu atu fo‘i Saulo i lona ‘āiga i Kipea; ‘ua ō fo‘i ma ia le ‘au o ē ‘ua fa‘amanatuina o latou loto e le Atua.
27. A ‘ua fai ane tagata ulavavale, “Pe fa‘apefea ‘ona fa‘aola mai ‘iā te i tatou e lenā tagata.” ‘Ua latou ‘ino‘ino ‘iā te ia; ‘ua lē ‘aumai fo‘i se alofa ‘iā te ia; a ‘ua fa‘alologo o ia.#