1. ‘Ua o‘o i le tasi aso, ‘ona fai atu ai lea o Ionatana le atali‘i o Saulo i le taule‘ale‘a o lona soātau, “Sau ia, ‘inā tā ō atu i le leoleoga a Filisitia o lo‘o i le tasi itū;” A ‘ua na lē ta‘u atu ai i lona tamā.
2. ‘Ua nofo Saulo i le pito nu‘u o Kipea i lalo o le rimoni sa i Mekerona, ‘atoa ma le nu‘u sa ‘iā te ia, pe ‘atoa se ono selau o tagata;
3. sa i ai fo‘i Akia le atali‘i o Akitopo, le uso o Ikapoti, le atali‘i o Fineaso, le atali‘i ia o Eli le ositaulaga a le ALI‘I i Sailo, o lo‘o ‘ofu i le efota. ‘Ua lē iloa e le nu‘u ‘ua alu Ionatana.
4. O le ala na sā‘ili e Ionatana e ui atu ai i le leoleoga a Filisitia sa i ai le pito papa i le tasi itū ala, ma le pito papa i le tasi itū ala; o le igoa o le tasi o Posese, o le igoa o le tasi o Sene.
5. ‘Ua fa‘asaga le tasi pito papa i le itū i matū e feagai ma Mekemase; a ‘ua fa‘asaga le tasi e feagai ma Kipea i le itū i saute.
6. ‘Ua fai atu Ionatana i le taule‘ale‘a o lona soātau, “Sau ia, tā ō atu i le leoleoga a nā nu‘u lē peritomeina, atonu e galue le ALI‘I mo i tā‘ua; auā e lē faigatā i le ALI‘I ‘ona fa‘aola e le to‘atele po o le to‘aitiiti.”
7. ‘Ona fai mai lea ‘iā te ia o lona soātau, “‘Inā fai ia o mea uma ‘e te finagalo i ai, fa‘auta, o mea ‘e te finagalo i ai o a‘u lava lea.”
8. ‘Ua fai atu Ionatana, “Fa‘auta, o le a tā ō atu i le nu‘u, tā fa‘aali atu i tā‘ua ‘iā te i latou.
9. ‘Āfai latou te fa‘apea mai ‘iā te i tā‘ua, ‘Tutū ia ‘i‘inā, se‘ia matou ō atu ‘iā te ‘oulua;’ ‘ona tā tutū ai lea i lalo ma tā le ō a‘e ‘iā te i latou.
10. ‘Ae ‘āfai latou te fa‘apea mai, ‘‘Inā ō a‘e ia ‘oulua i luga nei ‘iā te i matou;’ ‘ona tā ō a‘e ai lea, auā ‘ua tu‘uina mai i latou e le ALI‘I i o tā lima; e fai fo‘i lenei mea ma fa‘ailoga ‘iā te i tā‘ua.”
11. ‘Ua fa‘aali i lā‘ua i le leoleoga a Filisitia; ‘ona fai ane lea o Filisitia, “Fa‘auta, ‘ua ō mai Eperu nai ana sa latou lalafi ai.”
12. ‘Ua fai mai tagata o le leoleoga ‘iā Ionatana ma lona soātau, ‘ua fa‘apea mai, “Ō a‘e ia i luga nei ‘iā te i matou, matou te fa‘ailoa atu se mea ‘iā te ‘oulua.”‘Ona fai atu lea o Ionatana i lona soātau, “Mulimuli a‘e ia ‘iā te a‘u, auā ‘ua tu‘uina mai i latou e le ALI‘I i lima o Isaraelu.”
13. ‘Ona tausili a‘e lea o Ionatana ‘ua mulimuli a‘e ‘iā te ia lona soātau; ‘ona fasia lea o i latou e Ionatana ‘ae mulimuli atu ‘iā te ia lona soātau ma fa‘aoti ‘iā te i latou.
14. O le lua‘i fasi na fasia ai e Ionatana ma lona soātau, pe to‘aluafulu tagata i si fasi fanua e tusa ma le vaeluagalemū o le suataga, o le galuega lea a povi e lua.
15. ‘Ua o‘o le mata‘utuia i ē sa i le togālauapi ma le fanua, ‘atoa ma le nu‘u uma; o le leoleoga ma ē fa‘atafuna ‘ua mata‘utuia fo‘i i latou; ‘ua gatete fo‘i le ‘ele‘ele, sa i ai le mata‘utuia mai le Atua.
16. ‘Ua iloa atu e tagata va‘ai o Saulo sa i Kipea o Peniamina, fa‘auta i le vao tagata, ‘ua tauāu ‘ina fa‘aumatia ma taia pea lava i latou.
17. ‘Ua fai atu Saulo i le nu‘u sa ‘iā te ia, “‘Inā faitau ia se‘ia iloa po o ai ‘ua alu ‘ese ‘iā te i tatou;” ‘ua faitau, fa‘auta, e le‘i i ai Ionatana ma lona soātau.
18. ‘Ona fai atu lea o Saulo ‘iā Akia, “‘Aumai ia ‘i‘inei le ‘atola‘au a le Atua.” (Auā sa i ai le ‘atola‘au a le Atua i le fānauga a Isaraelu i nā ona aso.)
19. O lo‘o tautala Saulo ma le ositaulaga, ‘ua tuputupu pea le vāvāō sa i le togālauapi a Filisitia, ‘ua tele lava. ‘Ona fai atu lea o Saulo i le ositaulaga, “‘Inā tu‘u ia i lalo lou lima.”
20. ‘Ua fa‘apotopoto Saulo ma le nu‘u uma sa ‘iā te ia, ‘ona latou ō ai lea i le tau‘a; fa‘auta, ‘ua ta‘itasi ma fa‘ao‘o lana pelu i le tasi; sa matuā tele le fa‘anunununu.
21. O Eperu fo‘i sa mua‘i i ai ‘iā Filisitia, na ō a‘e ma i latou i le togālauapi mai itū uma, ‘ua liliu mai fo‘i i latou e ‘au ma Isaraelu sa ‘iā Saulo ma Ionatana.
22. O tagata Isaraelu uma sa lalafi i le mauga o Efaraima, ‘ua fa‘alogo i latou ‘ua sōsōla Filisitia, o i latou fo‘i ‘ua latou tuliloa ‘iā te i latou i le tau‘a.
23. ‘Ua fa‘aola e le ALI‘I ‘iā Isaraelu i lea aso; ‘ua o‘o ane le tau‘a i Petavene.
24. Sa tigāina tagata Isaraelu i lea aso, auā na fai atu Saulo i le nu‘u ‘ia tautō, o lo‘o fa‘apea, “‘Ia malaia le tagata na te ‘ai se mea se‘ia o‘o i le po, ‘ina ‘ia ‘ou taui atu i o‘u fili;” ‘Ona lē ‘ai lava lea se mea e le nu‘u uma.
25. ‘Ua o‘o le nu‘u uma i le vao, sa i ai le meli vao i luga o le ‘ele‘ele.
26. ‘Ua o‘o le nu‘u i le vao, fa‘auta, ‘ua sosolo ifo le meli vao, a o le‘i tu‘u a‘e le lima o se tasi i lona gutu, auā ‘ua matata‘u le nu‘u i le tautō.
27. A ‘ua lē lagona e Ionatana le tautoga a lona tamā na fai atu ai i le nu‘u, ‘ua na tu‘u atu le pito to‘oto‘o sa i lona lima, ‘ua fufui i le meli vao, ‘ua tu‘u atu ai lona lima i lona gutu, ‘ona malamalama ai lea ona mata.
28. ‘Ona fai mai lea o le tasi tagata, ‘ua fa‘apea, “‘Ua matuā tautō mai lou tamā i le nu‘u, ‘ua fa‘apea, ‘‘Ia malaia le tagata na te ‘ai se mea i le asō;’ ‘ua lailoa ai le nu‘u.”
29. ‘Ona fai atu ai lea o Ionatana, “‘Ua fa‘atigāina le nu‘u e lo‘u tamā; fa‘auta mai, ‘ua malamalama o‘u mata ‘ina ‘ua ‘ou ‘ai sina mea itiiti o lenei meli vao;
30. ‘ai lava ana matuā ‘a‘ai le nu‘u i lenei aso i mea a le itūtau‘a na latou maua, po o pēnei ‘ua fa‘atele lava se fasi o Filisitia.”
31. ‘Ua latou fafasi i lea aso ‘iā Filisitia, e āfua mai i Mekemase ‘ua o‘o i Ailona; a ‘ua matuā lailoa le nu‘u.
32. ‘Ua feosofi le nu‘u i mea a le itūtau‘a; ‘ua pupu‘e i mamoe, ma povi, ma tama‘i povi, ‘ua latou fafasi ai i luga o le ‘ele‘ele; ‘ona ‘a‘ai ai lea o le nu‘u ma le toto.
33. ‘Ua latou tala atu ‘iā Saulo, ‘ua fa‘apea, “Fa‘auta, ‘ua agasala le nu‘u i le ALI‘I ‘ina ‘ua latou ‘a‘ai ma le toto.”‘Ona fai mai lea o ia, “‘Ua ‘outou faia le mea pepelo; fulifuli mai nei lava ‘iā te a‘u se ma‘a tele.”
34. ‘Ona fai mai lea o Saulo, “‘Ia feoa‘i solo ‘outou i le nu‘u ma fai atu ‘iā te i latou; ‘‘Ia ta‘itasi ma ‘aumai ‘iā te a‘u lana povi po o lana mamoe, ma ‘outou fafasi ai i le mea nei, ma ‘a‘ai ai; ‘aua le agasala i le ALI‘I i le ‘ai ma le toto.’” ‘Ona ta‘itasi ai lea o le nu‘u uma ma ‘aumai lana povi i lea lava po; ‘ua latou fafasi ai i lea mea.
35. ‘Ua faia e Saulo le fatafaitaulaga i le ALI‘I; o lona lea fa‘ato‘ā fai fatafaitaulaga i le ALI‘I.
36. ‘Ua fai mai fo‘i Saulo, “Tatou ō ifo ia ‘iā Filisitia i le po nei, tatou te fafasi ‘iā te i latou se‘ia malama a‘e le taeao, ‘aua le toe se tagata e to‘atasi o i latou.”‘Ona fai atu lea o i latou, “O mea uma ‘e te finagalo i ai, ‘inā fai ia o lea.”‘Ua fai ane le ositaulaga, “‘Ia tatou fa‘alatalata atu i le Atua ‘i‘inei.”
37. ‘Ona fesili atu lea o Saulo i le Atua, “‘Ou te alu ifo ‘ea ‘iā Filisitia? ‘E te tu‘uina mai ‘ea i latou i lima o Isaraelu?” A ‘ua lē tali mai o ia ‘iā te ia i lea aso.
38. ‘Ua fai mai Saulo, “‘Ia fa‘alatalata mai ‘i‘inei ‘outou ali‘i uma o le nu‘u, ‘ina ‘ia tatou iloa, ma ‘ia tatou va‘ai, po o le a lenei agasala i le aso nei.
39. Auā ‘ua soifua le ALI‘I o lē fa‘aola ‘iā Isaraelu, e ui lava ‘ina i ai ‘iā Ionatana lo‘u atali‘i e oti lava o ia.” A ‘ua leai so le nu‘u uma na tali atu ‘iā te ia.
40. ‘Ona fai mai lea o ia ‘iā Isaraelu uma, “O ‘outou, tou te i le tasi itū, a o a‘u ma Ionatana lo‘u atali‘i ma te i le tasi itū.”‘Ua fai atu le nu‘u ‘iā Saulo, “O le mea ‘e te finagalo i ai, ‘inā fai ia o lea.”
41. ‘Ua fai atu Saulo i le ALI‘I le Atua o Isaraelu, “‘Ia e tu‘u mai le tonu ‘ona maua lea o Saulo ma Ionatana, a ‘ua sao le nu‘u.”
42. ‘Ona fai mai lea o Saulo, “‘Inā fai ia la mā‘ua vili ma Ionatana lo‘u atali‘i;” ‘ona maua lea e Ionatana.
43. ‘Ua fai mai Saulo ‘iā Ionatana, “‘Inā ta‘u mai ia ‘iā te a‘u pe se a le mea ‘ua e faia?”‘Ua ta‘u atu Ionatana ‘iā te ia, ‘ua fa‘apea, “Na ‘ou ‘aina sina meli vao itiiti nai le pito to‘oto‘o i lo‘u lima, fa‘auta fo‘i, o le a a‘u oti ai.”
44. ‘Ona fai mai lea o Saulo, “‘Ia fa‘apea ‘ona faia e le Atua ‘iā te a‘u ma ‘ia fa‘aopoopo i ai, pe ‘āfai ‘e te lē oti lava oe Ionatana.”
45. ‘Ona fai atu lea o le nu‘u ‘iā Saulo, “E maliu ‘ea Ionatana na na faia lenei fa‘aolataga tele mo Isaraelu? ‘Ia mamao lava; o lo‘o soifua le ALI‘I, e lē pa‘ū i le ‘ele‘ele se lau ao o lona ao, auā na galulue fa‘atasi o ia ma le Atua i lenei aso.” ‘Ua lavea‘i le nu‘u ‘iā Ionatana, ‘ia lē oti o ia.
46. ‘Ona alu a‘e lea o Saulo, ‘ua lē toe tuliloa ‘iā Filisitia; ‘ua ō fo‘i Filisitia i o latou nu‘u.
47. ‘Ua faia e Saulo le mālō o Isaraelu; ‘ua tau fo‘i o ia ma ē na ita mai uma lava i itū uma o Moapi, ma le fānauga a Amoni, ma Etoma, ma tupu o Sopa, ma Filisitia; o nu‘u uma na ia fa‘asaga atu i ai, ‘ua manumālō ai o ia.
48. ‘Ua fa‘amalosi o ia, ma ‘ua fasi ‘iā Ameleka, ma na lavea‘i ‘iā Isaraelu a‘i lima o ē na vete mea.
49. O atali‘i nei o Saulo, o Ionatana ma Iesivi, ma Makisua, o igoa fo‘i o ona afafine e to‘alua, o le igoa o le matua o Merapa, a o le igoa o lē itiiti o Mekala.
50. O le igoa o le avā a Saulo o Ainoama le afafine o Aimaasu; o le igoa o le pule i ana ‘au, o Apineru le atali‘i o Neru le uso o le tamā o Saulo.
51. O Kiso o le tamā ia o Saulo, o Neru le tamā ia o Apineru, o ia o le atali‘i o Apielu.
52. Sa tele lava tau‘a ma Filisitia i aso uma o Saulo; a va‘ai Saulo i se tagata malosi, po o se tagata fitafita ‘ua na fa‘aopoopoina mai lea ‘iā te ia.#