Le mataupu

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14
  15. 15
  16. 16
  17. 17
  18. 18
  19. 19
  20. 20
  21. 21
  22. 22
  23. 23

Feagaiga Tuai

Feagaiga Fou

1 Samuelu 19 O LE TUSI PA'IA - Ekalesia Katoliko Roma (RSCB)

O le Alofa o Ionatana ‘iā Tavita

1. ‘Ua fai ane Saulo ‘iā Ionatana lona atali‘i, ‘atoa fo‘i ma ana ‘au‘auna uma, ‘ia latou fasioti ‘iā Tavita; a o Ionatana le atali‘i o Saulo, sa tele lava lona alofa ‘iā Tavita.

2. ‘Ua ta‘u mai e Ionatana ‘iā Tavita, ‘ua fa‘apea, “O lo‘o lamalama Saulo lo‘u tamā e fasioti ‘iā te oe; o lenei, ‘ia oe ‘iā te oe se‘ia taeao, ma e nofo i se mea lilo ‘e te lafi ai;

3. a o a‘u, ‘ou te alu atu, ‘ou te tu i tafatafa o lo‘u tamā i le fanua ‘e te i ai; ‘ou te tautala fo‘i i lo‘u tamā ‘iā te oe, ‘ona ‘ou iloa lea pe fa‘apefea; i lo‘u ta‘u atu ai ‘iā te oe.”

4. ‘Ua tautala lelei Ionatana ‘iā Saulo lona tamā ‘iā Tavita; ‘ua fai atu fo‘i ‘iā te ia, “‘Aua ne‘i agaleaga le tupu lana ‘au‘auna o Tavita, auā e le‘i agaleaga o ia ‘iā te oe; a ‘ua agalelei lava o ia ‘iā te oe;

5. Na ia tu‘u fo‘i lona ola i lona lima, ma na fasi le Filisitia, na fai ai fo‘i e le ALI‘I le fa‘aolataga tele mo Isaraelu uma; na e iloa fo‘i, ma fiafia i ai; se a le mea ‘e te agaleaga ai i le tagata e lē sala, ‘ina a e fasioti fua ‘iā Tavita?”

6. ‘Ua fa‘alogo Saulo i le ‘upu a Ionatana ma ‘ua tautō ai Saulo, “O lo‘o soifua le ALI‘I, e lē fasia lava o ia.”

7. ‘Ona vala‘au lea o Ionatana ‘iā Tavita, ‘ua ta‘u atu fo‘i e Ionatana ‘iā te ia i nei ‘upu uma; ‘ona ‘aumai lea o Tavita e Ionatana ‘iā Saulo; ‘ua i ai fo‘i o ia i ona luma pei o anamua.

8. ‘Ua toe tau le tau‘a; ‘ona alu atu ai lea o Tavita, ‘ua tau ma Filisitia, ma na fasi ‘iā te i latou i le fasi tele, ‘ua latou sōsōla i ona luma.

‘Ua toe ita Saulo ‘iā Tavita

9. Sa ‘iā Saulo le agaga leaga mai i le ALI‘I; o lo‘o nofo o ia i lona fale ma lona tao i lona lima, o lo‘o ta fo‘i e Tavita le kitara i lona lima.

10. Na lamalama Saulo e fasioti ‘iā Tavita i le tao, i‘a tuilua o ia ma le pā o le fale; a ‘ua ‘alo ‘ese ia i luma o Saulo, ‘ua taulia le tao i le pā o le fale, a ‘ua sola Tavita, ‘ua sao i lea lava po.

11. ‘Ona ‘a‘au atu lea e Saulo o ‘au‘auna i le fale o Tavita e lamalama ‘iā te ia ma fasioti ‘iā te ia i le taeao; ‘ua ta‘u atu ‘iā Tavita e Mekala lana avā, ‘ua fa‘apea, “‘Āfai ‘e te lē fa‘asao lo‘u ola i le po nei, a taeao ‘ona e oti ai lea o oe.”

12. ‘Ua tu‘utu‘u ifo e Mekala ‘iā Tavita i le fa‘amalama, ‘ua alu o ia, ‘ua sola, ‘ona sao ai lea.

13. ‘Ona tago lea o Mekala i le tupua, ‘ua tu‘u ai i le moega ma le ‘ie fulufulu ‘oti ‘ua ‘ia fa‘aaluga ai lona ulu ma na ufiufi ai i le ‘ie afu.

14. ‘Ua ‘a‘auina atu e Saulo ni ‘au‘auna e pu‘e ‘iā Tavita; ‘ona fai mai ai lea o le fafine, “O lo‘o ma‘i o ia.”

15. ‘Ona ‘a‘au atu lea o Saulo ni ‘au‘auna e va‘ai atu ‘iā Tavita, ‘ua fa‘apea, “‘Ia ‘aumai o ia ‘iā te a‘u i luga o le moega, ‘ina ‘ia fasioti ‘iā te ia.”

16. ‘Ua ō atu ‘au‘auna, fa‘auta, o le tupua o lo‘o i le moega, ma le ‘ie fulufulu ‘oti ‘ua aluga ai.

17. ‘Ona fai mai lea o Saulo ‘iā Mekala, “O le a le mea ‘ua e fa‘apea ai ‘ona pelogia o a‘u? ma e ‘au ‘ese atu i lo‘u fili, ‘ua sao ai o ia?”‘Ua fai atu Mekala ‘iā Saulo, “Na ia fai mai ‘iā te a‘u, ‘‘Ia e tu‘u mai ‘iā te a‘u, ‘ou te alu, se a le mea ‘ou te fasioti ai ‘iā te oe?’”

‘Ua Sola Tavita mai ‘iā Saulo

18. ‘Ua sola Tavita, ‘ua sao, ‘ua o‘o atu ‘iā Samuelu i Rama; ‘ona ta‘u atu ai lea ‘iā te ia o mea uma na faia e Saulo ‘iā te ia; ‘ua la ō ma Samuelu, ‘ua la nonofo i Naiota.

19. ‘Ona ta‘uina atu lea ‘iā Saulo, ‘ua fa‘apea, “Fa‘auta, o lo‘o i ai Tavita i Naiota i Rama.”

20. ‘Ona ‘a‘auina atu ai lea e Saulo o ‘au‘auna e pu‘e ‘iā Tavita. ‘Ua latou iloa le fa‘apotopotoga o perofeta, o lo‘o perofeta ane, ma Samuelu o lo‘o tu ia e pule ‘iā te i latou; ‘ona i ai lea i luga o ‘au‘auna a Saulo le Agaga o le Atua, ‘ua perofeta fo‘i i latou.

21. ‘Ua ta‘uina atu ai ‘iā Saulo, ‘ona ‘a‘auina atu lea e ia nisi ‘au‘auna; ‘ua perofeta fo‘i i latou. ‘Ona toe ‘a‘auina atu lea e Saulo nisi ‘au‘auna, o le atu tolu lea; ‘ua perofeta fo‘i i latou.

22. ‘Ona alu atu lea o ia lava i Rama; ‘ua o‘o atu i le vai‘eli tele, o lo‘o i Seku, ‘ona fesili lea o ia, ‘ua fa‘apea, “Po o fea o i ai Samuelu ma Tavita?” ‘Ua tali mai, “Fa‘auta, o lo‘o i Naiota i Rama.”

23. ‘Ona alu atu ai lea o ia i Naiota i Rama; ‘ona i ai lea i luga ‘iā te ia fo‘i le Agaga o le Atua, ‘ua sāvalivali ma perofeta ane, ‘ua o‘o atu lava o ia i Naiota i Rama.

24. ‘Ua tu‘u ‘ese lava e ia ona ‘ofu, na perofeta ane fo‘i i luma o Samuelu, ‘ua fa‘apa‘ū ‘ua lē ‘ofu, ‘ua ‘atoa lea aso, ‘ua ‘atoa fo‘i le po; o le mea lea ‘ua latou fai ane ai, “‘Ua i ai ‘ea fo‘i Saulo fa‘atasi ma le ‘au perofeta?”#