1. ‘Ua o‘o ‘ina toeaina o Samuelu, ‘ona tofia ai lea e ia o ona atali‘i e fai ma fa‘amasino ‘iā Isaraelu.
2. O le igoa o lona atali‘i ulumatua o Ioelu, a o le igoa o lē aupito ane i ai o Avia; ‘ua fai i lā‘ua ma fa‘amasino i Peresepa.
3. A ‘ua lē sāvavali ona atali‘i i lona ala, ‘ua la ō ‘ese ai i le fia fai ‘oloa, ‘ua tali fo‘i i mea alofa ma fa‘api‘opi‘o i le fa‘amasinoga.
4. ‘Ona fa‘apotopoto ai lea o toeaina uma lava o Isaraelu, ‘ua latou ō atu ‘iā Samuelu i Rama.
5. ‘Ua latou fai mai fo‘i ‘iā te ia, “Fa‘auta, ‘ua e toeaina oe, o ou atali‘i fo‘i la te lē sāvavali i lou ala; o lenei, ‘ia e tofia se tupu mo i matou e fa‘amasino ‘iā te i matou, pei o nu‘u uma.”
6. A ‘ua leaga ‘iā Samuelu le ‘upu sa latou fai mai, “‘Aumai se tupu ‘iā te i matou e fa‘amasino ‘iā i matou;” ‘ona tatalo ai lea o Samuelu i le ALI‘I.
7. ‘Ua fetalai mai le ALI‘I ‘iā Samuelu, “Usiusita‘i ia i le ‘upu a le nu‘u i mea uma latou te fai mai ai ‘iā te oe; auā e lē o oe ‘ua latou lafoa‘iina, a ‘ua latou lafoa‘iina o a‘u, ‘ia lē fai a‘u ma tupu ‘iā te i latou;
8. pei o mea uma ‘ua latou faia talu le aso na ‘ou ‘aveina a‘e ai i latou nai Aikupito, e o‘o i le aso nei, ‘ua latou tu‘ulafoa‘i mai ‘iā te a‘u, ‘ae ‘au‘auna i atua ‘ese, e fa‘apea fo‘i ‘ona latou faia nei ‘iā te oe.
9. O lenei, usiusita‘i ia ‘iā latou ‘upu; tau lava ‘ina e matuā ta‘utino ‘iā te i latou, ma fa‘asino atu ‘iā te i latou le amioga a le tupu e pule ‘iā i latou.”
10. ‘Ona ta‘u atu lea e Samuelu o ‘upu uma a le ALI‘I i le nu‘u na fa‘atoga mai ‘iā te ia i se tupu;
11. ‘ua fai atu, “O lenei le amioga a le tupu o le a pule ‘iā te ‘outou; o ‘outou atali‘i e ‘avea i latou e ia e fai mōna i ona kariota, e fai fo‘i māna ‘au e ti‘eti‘e i solofanua; latou te taufetuli fo‘i i luma o ona kariota.
12. E tofi fo‘i e ia ‘iā te i latou e pule i ‘au e ta‘ito‘aafe ma pule i ‘au e ta‘ito‘alimagafulu; ma ‘ia suatia lona fanua, ma selesele i lana seleselegāsaito; latou te gaosi fo‘i ana ‘au‘upega o le tau‘a, ma mea e teu ai ona kariota.
13. O ‘outou afafine fo‘i, e ‘ave ai latou e ia e fai mea manogi, e fai umu ma fai areto.
14. O ‘outou fanua fo‘i ma ‘outou tōvine, ma ‘outou tōolive e sili ‘ona lelei, e ‘ave e ia, ma foa‘i atu i ana ‘au‘auna.
15. O a ‘outou fua ma ‘outou tōvine, e ‘ave mea e sefulua‘i ma foa‘i atu i ana ‘au‘auna sili ma ana ‘au‘auna.
16. O a ‘outou ‘au‘auna tane ma a ‘outou ‘au‘auna fafine, ma o ‘outou taulele‘a ‘aulelei, ‘atoa fo‘i ma ‘outou asini, e ‘ave e ia e fai a‘i lana galuega.
17. E ‘ave mea e sefulua‘i a ‘outou mamoe; o ‘outou fo‘i, e fai ‘outou ma ana ‘au‘auna.
18. E ‘alalaga ‘outou i lea aso ‘ona o lo ‘outou tupu na ‘outou filifilia mo ‘outou, ‘ae lē fa‘afofoga mai le ALI‘I ‘iā te ‘outou i lea aso.”
19. ‘Ae lē mafafai le nu‘u ‘ona fa‘alogo i le ‘upu a Samuelu, ‘ua latou fai mai, “E leai lava, ‘ae fai lava so matou tupu;
20. ‘ia pei o nu‘u uma i matou, ‘ia fa‘amasino mai lo matou tupu ‘iā te i matou; ‘ia alu atu fo‘i o ia i o matou luma, ma ‘ia tau i o matou tau‘a.”
21. ‘Ua fa‘alogo Samuelu i ‘upu uma a le nu‘u, ‘ona ta‘u atu ai lea e ia i fofoga o le ALI‘I.
22. ‘Ona fetalai mai ai lea o le ALI‘I ‘iā Samuelu, “Usiusita‘i ia ‘iā latou ‘upu ma ‘ia e tofia se tupu mo i latou.” ‘Ua fai atu Samuelu i tagata o Isaraelu, “‘Ia ta‘itasi ma alu i lona nu‘u.”#