1. ‘Ua alu atu Tavita i Nove ‘iā Aimeleka le ositaulaga; a ‘ua fefe Aimeleka ‘ina ‘ua na iloa Tavita; ‘ua fai mai ‘iā te ia, “O le a le mea ‘ua e maliu to‘atasi mai ai oe, ‘ae leai se tasi lua te to‘alua?”
2. ‘Ona fai atu lea o Tavita ‘iā Aimeleka le ositaulaga, “Na fetalai mai le tupu ‘iā te a‘u i le fe‘au, ‘ua fa‘apea mai, ‘‘Aua ne‘i iloa se tasi le fe‘au ‘ou te ‘auina atu ai oe, ma ‘ou fai atu ai ‘iā te oe;’ ‘ua ‘ou fa‘atonu atu fo‘i i ‘au‘auna i le mea latou te o i ai.
3. O lenei, pe se a se mea ‘ua ‘iā te oe? ‘Aumai ‘iā te a‘u ni areto e lima, po o se mea ‘ua e maua.”
4. ‘Ua tali mai le ositaulaga ‘iā Tavita, ‘ua fa‘apea mai, “E leai se areto le sa ‘iā te a‘u, ‘ua na o le areto e sa; ‘āfai lava ‘ua nofo ‘ese taulele‘a ma a latou avā e mafai ai.”
5. ‘Ua tali atu Tavita i le ositaulaga, ‘ua fa‘apea atu ‘iā te ia, “E moni, ‘ua po tolu o nofo ‘ese ai a matou avā ma i matou, talu lo‘u sau; ‘ua pa‘ia fo‘i mea a taulele‘a, ‘ua peiseaī ‘ua lē sa fo‘i le areto, i le ma lea fo‘i ‘ua fa‘apa‘iaina nisi areto i le aso nei i le ipu.”
6. ‘Ona avatu lea e le ositaulaga ‘iā te ia le areto sa; auā e le‘i i ai ni areto, na o areto e laulauina i luma, na ‘ave‘esea nai luma o le ALI‘I e tu‘uina ai areto vevela i le aso e ‘ave ‘ese ai.
7. (Sa i ai i lea aso le tasi ‘au‘auna a Saulo, na tāofia o ia i luma o le ALI‘I; o lona igoa o Toeka le sa Etomā, e pule i leoleo mamoe a Saulo.)
8. ‘Ua fai atu fo‘i Tavita ‘iā Aimeleka, “E le‘i i ai ‘ea ‘iā te oe se tao po o se pelu? auā fo‘i na ‘ou lē ‘aumaia la‘u pelu ma a‘u ‘au‘upega, auā o le fe‘au a le tupu ‘ua fa‘ata‘alise.”
9. ‘Ona fai mai lea o le ositaulaga, “O le pelu a Koliata le Filisitia, na e fasia i le vanu o le tapeneto, fa‘auta, o lo‘o ta‘ata‘aia i le ‘ofu i tua o le efota; ‘āfai ‘e te ‘ave lea, ‘inā ‘ave ia, auā e leai se tasi na o lea.”‘Ona fai atu lea o Tavita, “E leai se tasi e tusa ma lenā; ‘aumai ia ‘iā te a‘u.”
10. ‘Ua tula‘i Tavita, ‘ua sola i lea aso nai ‘iā Saulo; ‘ua o‘o atu ia Akisa le tupu o Kata.
11. ‘Ua fai atu ‘au‘auna a Akisa ‘iā te ia, “E lē o Tavita ‘ea lenei, le tupu o le nu‘u. E lē o lenei ‘ea le tagata na latou lagi fetalia‘i ai ‘iā latou siva, o lo‘o fa‘apea,‘‘Ua fasia e Saulo ana afe,a o Tavita ana sefulu o afe?’”
12. ‘Ua tu‘u e Tavita nei ‘upu i lona loto, ‘ua matuā fefe i luma o Akisa le tupu o Kata.
13. ‘Ua na liliu lana amio i o latou luma, ‘ua fa‘atagā valea i o latou luma; ‘ua ia tusitusi i puipui o le faitoto‘a, ma fa‘asisina lona feanuga i lana ‘ava.
14. ‘Ona fai mai ai lea o Akisa i ana ‘au‘auna, “Fa‘auta, ‘ua ‘outou iloa le tagata, o lo‘o valea; o le a ‘ea le mea ‘ua ‘outou ‘aumai ai o ia ‘iā te a‘u.
15. ‘Ou te oge vale ‘ea a‘u, ‘ua ‘outou ‘aumai ai lenā tagata e fa‘avalevalea i o‘u luma. E sau ‘ea lenā tagata i lo‘u fale?”