1. Sa i ai le ‘atola‘au a le ALI‘I i le nu‘u o Filisitia i masina e fitu.
2. ‘Ona ‘a‘ami ai lea e Filisitia o ositaulaga ma taulāitu, ‘ua fa‘apea atu, “Se a se mea matou te faia i le ‘atola‘au a le ALI‘I? ‘Inā ta‘u mai ia, pe fa‘apefea ‘ona matou momoli atu ai i lona nu‘u?”
3. ‘Ona latou fai mai lea, “‘Āfai tou te momoli atu le ‘atola‘au a le Atua o Isaraelu, ‘aua le molifuaina ‘iā te ia, a ‘ia matuā avatu ‘iā te ia se togiola, ‘ona fa‘amālōlōina ai lea ‘outou, e iloa fo‘i e ‘outou po o le a le mea ‘ua lē te‘a ‘ese ai lona ‘a‘ao ‘iā te ‘outou.”
4. ‘Ua fai atu i latou, “O le a le togiola matou te avatu ai ‘iā te ia?”‘Ona fai mai lea o i latou, “O silailalo auro e lima, ma imoa auro e lima, ‘ia tusa ma le faitau o ali‘i Filisitia; auā sa tasi le mala ‘iā te ‘outou uma ma o ‘outou ali‘i.
5. ‘Ia fai fo‘i fa‘atusa o ‘outou silailalo, ma fa‘atusa o ‘outou imoa ‘ua leaga ai lo ‘outou ‘ele‘ele, ma ‘ia avatu le vi‘iga i le Atua o Isaraelu; atonu e fa‘amāmā ai e ia lona ‘a‘ao a‘i o ‘outou luga, ma luga o ‘outou atua, ma luga o lo ‘outou lau‘ele‘ele.
6. Se a fo‘i le mea tou te fa‘ama‘a‘a ai o ‘outou loto, pei o Aikupito ma Farao ‘ona fa‘ama‘a‘a o latou loto? Na latou le tu‘uina atu ‘ea i latou e ō, ‘ina ‘ua uma ‘ona faia e ia o mea mamana ‘iā te i latou, ‘ona latou ō ai lava lea?
7. O lenei, ‘inā fau ia se fata fa‘ata‘avalevale fou, ma avane i ai ni povi fānanau se lua, e le‘i fa‘ae‘e i ai se amo; ‘ia nonoa povi i le fata fa‘ata‘avalevale, ma ‘ia fa‘afo‘i mai i le fale a la fānau nai ‘iā te i lā‘ua.
8. ‘Ona ‘outou ‘ave ai lea o le ‘atola‘au a le ALI‘I, ma fa‘ae‘e atu ai i le fata fa‘ata‘avalevale, ‘atoa ma mea ‘ua fai i auro, o le a ‘outou avatu ‘iā te ia e fai ma togiola, ‘ia fafao i se ‘ato i lona itū, ma tu‘uina atu ai e alu.
9. A ‘ia ‘outou va‘ava‘ai, pe ‘āfai e alu a‘e i le ala o lona nu‘u o Petesemesa, o ia lava ‘ua fa‘ao‘o lenei malaia tele ‘iā te i tatou; ‘ae ‘āfai e leai, ‘ona tatou iloa lea e le‘i pā‘ia tatou i lona ‘a‘ao; o le mea ‘ua tupu fua mai lava ‘iā te i tatou.”
10. ‘Ua fa‘apea lava ‘ona fai e le nu‘u, ‘ua avane povi fānanau e lua, ‘ua latou nonoa ai i le fata fa‘ata‘avalevale, ‘ae pupuni a la fānau i le fale.
11. ‘Ona latou fa‘ae‘e lea o le ‘atola‘au a le ALI‘I i le fata fa‘ata‘avalevale, ‘atoa fo‘i ma le ‘ato, ma imoa auro, ma fa‘atusa o silailalo.
12. ‘Ua ō a‘e povi i le ala e ui ai i Petesemesa, ‘ua savali loa i le ala tele, o lo‘o tagi fano, ‘ae le‘i afe i le itū taumatau po o le itū tauagavale; ‘ua mulimuli atu ‘iā i lā‘ua ali‘i o Filisitia, na o‘o i le tuā‘oi o Petesemesa.
13. O lo‘o fai e Petesemesa le seleselegāsaito i le vanu; ‘ua tetepa a‘e i latou, ‘ona iloa ai lea o le ‘atola‘au, ‘ua latou fiafia ‘ina ‘ua iloa.
14. ‘Ua o‘o le fata fa‘ata‘avalevale i le fanua o Iosua le Petesemesa, ‘ua tu ai. Sa i ai le ma‘a tele; ‘ua latou taisi la‘au o le fata fa‘ata‘avalevale i ma sauni le taulaga mū i le ALI‘I i povi.
15. ‘Ona ‘ave ifo lea e sa Levī le ‘atola‘au a le ALI‘I ma le ‘ato sa i ai, ‘ua i ai mea na fai i auro, ‘ua latou fa‘ae‘e ai i luga o le ma‘a tele. ‘Ua sauni e tagata o Petesemesa i lea aso o taulaga mū, ma latou osi taulaga i le ALI‘I.
16. ‘Ua iloa e ali‘i Filisitia e to‘alima, ‘ona fo‘i ai lea o i latou i Ekerona i lea lava aso.
17. O silailalo auro nei na avatu e Filisitia e fai ma togiola i le ALI‘I, mo Asetota le tasi, mo Kasa le tasi, mo Asekelona le tasi, mo Kata le tasi, mo Ekerona le tasi.
18. O imoa auro fo‘i e tusa ma le faitau o ‘a‘ai uma o Filisitia, o ‘a‘ai o ali‘i e to‘alima, o ‘a‘ai i loto ‘olo, ‘atoa lava ma faoa ‘a‘ai, e o‘o i le ma‘a tele sa fa‘ae‘e i ai le ‘atola‘au a le ALI‘I; ‘ua o‘o i lenei aso o lo‘o i ai lea ma‘a i le fanua o Iosua le Petesemesa.
19. ‘Ua ia fasia tagata o Petesemesa, auā na latou maimoa i totonu o le ‘atola‘au a le ALI‘I; ‘ua ia fasia i lea nu‘u o le to‘afitugafulu o tagata, o tagata e limagafulu o afe. ‘Ua fa‘anoanoa le nu‘u ‘ona ‘ua fasia le nu‘u e le ALI‘I i le fasi tele.
20. ‘Ua fai ane tagata o Petesemesa, “O ai se na te mafaia ‘ona tu i luma o lenei Atua pa‘ia, o le ALI‘I? E ‘ava‘e ‘ea ‘iā te ai le ‘atola‘au ai ‘iā te i tatou?”
21. ‘Ua latou ‘auina atu le sāvali i ē ‘ua nonofo i Kiriata-iarima, ‘ua fa‘apea atu, “‘Ua fa‘afo‘i mai e Filisitia le ‘atola‘au a le ALI‘I ‘inā maliu mai ia e avatu ai ‘iā te ‘outou.”