1. ‘Ua alu ‘ese Tavita i lea mea, ‘ua sola atu i le ana i Atulama; ‘ua fa‘alogo ai ona uso ‘atoa ma le ‘āiga uma o lona tamā, ‘ona latou ō ifo ai lea ‘iā te ia i lea mea.
2. ‘Ua fa‘apotopoto atu fo‘i ‘iā te ia tagata uma o ē na tigāina, ma tagata uma ē na ‘aitalafu, ma tagata uma o ē ‘ua tigā le loto, sa fai o ia ma ali‘i ‘iā te i latou; sa ‘iā te ia pe ‘atoa se to‘afa galau o tagata.
3. ‘Ua alu atu Tavita nai lea mea i Mesepa o Moapi ‘ua fai atu i le tupu o Moapi, “Se‘i ō mai lo‘u tamā ma lo‘u tinā ‘iā te ‘outou, se‘ia ‘ou iloa pe fa‘apefea se mea e faia e le Atua ‘iā te a‘u.”
4. ‘Ua ia ‘aumai ‘iā te i lā‘ua i luma o le tupu o Moapi, ‘ua latou nonofo ma ia i aso uma na i ai Tavita i le ‘olo.
5. ‘Ua fai mai Kato le perofeta ‘iā Tavita, “‘Aua le nofo i le ‘olo; alu ia, ‘inā e alu atu i le nu‘u o Iuta.” ‘Ona alu ai lea o Tavita, ‘ua o‘o atu i le vao matua o Hareta.
6. ‘Ua fa‘alogo Saulo, ‘ua iloa Tavita ma tagata ‘ua ‘iā te ia; a o nofo Saulo i Kipea i lalo o le la‘au tele i Rama, ma lana tao i lona lima; o ana ‘au‘auna uma fo‘i na tutū i latou i ona luma.
7. ‘Ua fai mai Saulo i ana ‘au‘auna na tutū i ona luma, “Fa‘alogo mai ia o ‘outou sa Peniamina e. E foa‘i atu ‘ea ‘iā te ‘outou ta‘itasi uma e le atali‘i o Iese o fanua ma tōvine? na te tofia ‘ea ‘outou uma e fai ma ali‘i o to‘aafe ma ali‘i o to‘aselau,
8. ‘inā ‘ua ‘outou fōua a‘u e ‘outou uma lava, ma ‘ua lē fa‘aali mai ‘iā te a‘u le feagaiga a lo‘u atali‘i ma le atali‘i o Iese? ‘Ua lē alolofa fo‘i ‘outou ‘iā te a‘u ma fa‘aali mai ‘iā te a‘u ‘ina ‘ua fa‘aoso e lo‘u atali‘i i la‘u ‘au‘auna e ‘ia fasioti ‘iā te a‘u e pei ‘ona fai i lenei aso.”
9. ‘Ona tali atu lea o Toeka le sa Etomā, (o ia fo‘i na tofia e pule i ‘au‘auna a Saulo,) ‘ua fai atu. “Na ‘ou iloa le atali‘i o Iese, ‘ua alu atu i Nove ‘iā Aimeleka le atali‘i o Akitopo;
10. na ia fesili i le ALI‘I mo ia, ma na avatu ‘iā te ia mea e ‘ai, ‘ua avatu fo‘i ‘iā te ia le pelu a Koliata le Filisitia.”
11. ‘Ona ‘auina atu lea nisi e le tupu e ‘a‘ami ‘iā Aimeleka le atali‘i o Akitopo le ositaulaga, ‘atoa ma le ‘āiga uma o lona tamā, o ositaulaga i latou i Nove; ‘ona latou ō uma mai lea i le tupu.
12. ‘Ua fai mai Saulo, “Fa‘alogo mai ia le atali‘i o Akitopo e.”‘Ua fai atu o ia, “Le ali‘i e, o a‘u lava lenei.”
13. ‘Ona fai mai lea o Saulo ‘iā te ia, “O le a ‘ea le mea ‘ua ‘oulua fōua ai a‘u, oe ‘atoa ma le atali‘i o Iese? ‘Ina ‘ua e avatu ‘iā te ia mea e ‘ai ma le pelu ma e fesili atu i le Atua mo ia. ‘Ua fa‘asagatau mai ai o ia ‘iā te a‘u e fia fasioti ‘iā te a‘u, e pei ‘ona fai i lenei aso?”
14. ‘Ona tali atu lea o Aimeleka i le tupu, ‘ua fa‘apea atu, “O ai ‘ea se tasi o au ‘au‘auna uma e tusa ma Tavita ‘ona fa‘amaoni? o lo‘o nofo fo‘i le afafine o le tupu ‘iā te ia, ma ‘ua alu i lau fe‘au, o lo‘o ta‘uleleia fo‘i i lou ‘āiga.
15. Na ‘ou amata ‘ea i lea aso ona fesili i le Atua mo ia? E mamao lava ‘iā te a‘u; ‘aua ne‘i tu‘u mai e le tupu le mea nei i lana ‘au‘auna ma le ‘āiga uma o lo‘u tamā, auā na lē iloa e lau ‘au‘auna se mea itiiti, po o se mea tele o nei mea uma.”
16. ‘Ua fai mai le tupu, “‘E te oti lava Aimeleka o oe ‘atoa ma le ‘āiga uma o lou tamā.”
17. ‘Ona fai mai lea o le tupu i le ‘au e fa‘afeao na tutū i ona luma, “‘Inā liliu atu ia, ma fasioti i ositaulaga a le ALI‘I, auā ‘ua ‘au i latou ma Tavita; auā fo‘i na latou iloa ‘ua sola o ia, ‘ae le‘i ta‘u mai ‘iā te a‘u.” A ‘ua lē mafafai ‘au‘auna a le tupu ‘ona fa‘ao‘o o latou lima e fasi ai i ositaulaga a le ALI‘I.
18. ‘Ona fai mai lea o le tupu ‘iā Toeka, “‘Inā liliu atu ia oe, ma e fasi i ositaulaga.” ‘Ona liliu atu ai lea o Toeka le sa Etoma, ma na fasi i ositaulaga; na ia fasioti ai i lea aso o tagata e to‘avalugafulu ma le to‘alima o ē na ‘o‘ofu i efota o ‘ie lino.
19. O Nove fo‘i le ‘a‘ai o ositaulaga na ia fasi ai i le pelu; o tane ‘atoa ma fafine, o tamaiti ‘atoa ma tama meamea, o povi, ma asini, ‘atoa ma mamoe ‘ua ia fasi i le pelu.
20. A ‘ua sao le tasi atali‘i o Aimeleka le atali‘i o Akitopo o Aviata lona igoa, ‘ua sola atu ‘iā Tavita.
21. ‘Ua ta‘u mai e Aviata ‘iā Tavita, ‘ua fasia e Saulo o ositaulaga a le ALI‘I.
22. ‘Ona fai atu lea o Tavita ‘iā Aviata, “Na ‘ou iloa i lea aso ‘ina ‘ua i ai o Toeka le sa Etoma, na te ta‘ua lava ‘iā Saulo; talu a‘u ‘ua o‘o ai le oti i le ‘āiga uma o lo‘u tamā.
23. ‘Inā tā nonofo ia ma a‘u, ‘aua ‘e te fefe; auā o lē sā‘ili ‘ina ‘ia ‘ou oti, o lo‘o sā‘ili fo‘i o ia ‘ina ‘ia e oti, ‘ae saogalemū oe ‘ina ‘ua tā fa‘atasi ma a‘u.”#