1. ‘Ua matou te‘a ma i latou, ‘ona tu‘uva‘a atu lea ma folau tonu atu i Ko, o le taeao fo‘i ‘ua o‘o ai i Roto, ‘ona toe ō atu ai lea i Patara.
2. ‘Ua maua fo‘i le va‘a o le a folau atu i Foinie, ‘ona matou ō ai lea, ‘ua tu‘uva‘a atu.
3. ‘Ua matou iloa atu Kuperu, ma tuana‘i ane i ai i le itū tauagavale, ‘ona folau atu lea i Suria, ma matou ō a‘e i uta i Turo; auā e ‘ava‘e ai le uta a le va‘a.
4. ‘Ua maua fo‘i e i matou nisi so‘o, ‘ona matou nonofo ai lea i aso e fitu; ‘ua latou fai mai ‘iā Paulo i le Agaga, ‘aua ne‘i alu a‘e i Ierusalema.
5. ‘Ua uma ia aso ‘iā te i matou, ‘ona matou ō lea, ma ō atu; ‘ua momoli i matou e i latou uma, ‘atoa ma avā ma fānau, ‘ua o‘o i tua o le ‘a‘ai; ‘ona to‘otuli lea o i matou i le matāfaga, ‘ua tatalo.
6. ‘Ua uma ‘ona taumāvae, ‘ona ō a‘e lea o i matou i le va‘a; a ‘ua toe fo‘i atu i latou i ō latou.
7. ‘Ua matou ō mai i Turo ‘ua o‘o i Tolumai, ‘ua gata ai la matou folauga, ‘ona matou fealofani lea ma le ‘au uso, e tasi lo matou aso sa nonofo ai ma i latou.
8. O le taeao ‘ua ō atu ai i matou o le ‘au malaga a Paulo, ‘ua o‘o i Kaisareia; ‘ua matou ulu atu i le fale o Filipo lē folafola le tala lelei, o le tasi o ia o le to‘afitu; ‘ua matou nonofo fo‘i ‘iā te ia.
9. Sa i lenei tagata afafine e to‘afa, o taupou, o ē perofeta.
10. ‘Ua tele aso o matou o nonofo ai, ‘ona sau lea o le tasi perofeta mai Iutaia, o Akapo le igoa.
11. ‘Ua o‘o mai o ia ‘iā te i matou, ‘ona tō a‘e lea o le fusi o Paulo, ma fusifusi ifo i ona lava lima ma vae, ‘ua fai mai, “O lo‘o fa‘apea mai le Agaga Pa‘ia, ‘E fa‘apea ‘ona fusifusi i Ierusalema e Iutaia le tagata e ona lenei fusi, ma latou tu‘u atu ‘iā te ia i lima o nu‘u ‘ese.’”
12. ‘Ua fa‘alogo atu i matou i na ‘upu, ‘ona ‘ai‘oi atu lea o i matou, ‘atoa ma i latou o lea nu‘u, e ‘aua le alu a‘e o ia i Ierusalema.
13. A ‘ua tali mai Paulo, “Tou te fētāgisi ma fa‘atigā tele mai lo‘u loto i se a? Auā ‘ua ‘ou sauni lava a‘u e le gata ‘ina fusifusia, a ‘ia ‘ou oti lava i Ierusalema, ‘ona o le suafa o le Ali‘i o Iesu.”
14. ‘Ua lē mafaia o ia, ‘ona fa‘alologo lea o i matou, ‘ua fa‘apea ane, “‘Inā faia ia le finagalo o le Ali‘i.”
15. ‘Ua mavae ia aso, ona taoso lea o i matou, ma ō a‘e i Ierusalema.
16. ‘Ua ō fo‘i ma i matou nisi so‘o mai Kaisareia; ‘ua ‘aumai ma i latou le tasi tagata Kuperu, o Nasona, o le so‘o mai anamua, matou te api ma ia.
17. ‘Ua o‘o fo‘i i matou i Ierusalema, ‘ona talia mai lea o i matou e le ‘au uso ma le fiafia.
18. O le taeao ‘ua ō atu ai Paulo ma i matou ‘iā Iakopo; ‘ua i ai fo‘i toeaina uma.
19. ‘Ua fealofani o ia ma i latou, ‘ona laulau tasi atu lea e ia mea uma lava na faia e le Atua i nu‘u ‘ese i lana galuega.
20. ‘Ua fa‘alogo ai i latou, ‘ona vivi‘i lea o i latou i le Ali‘i; ‘ua fai atu fo‘i ‘iā te ia, “Lo matou uso e, ‘ua e iloa ia mano e tele o Iutaia ‘ua fa‘atuatua; o lo‘o mā‘elegā fo‘i uma lava i latou i le tulafono.
21. ‘Ua talaina oe ‘iā te i latou, ‘ua e a‘oa‘o atu ‘iā Iutaia uma i nu‘u ‘ese ia latou lafoa‘i ‘iā Mose, ‘ua e vavao le peritomega o a latou fānau, ma le ‘ana‘ana i ia tu.
22. O lenei, pe fa‘apefea? e fa‘apotopoto mai lava le to‘atele; auā o le a fa‘alogo i latou ‘ua e sau.
23. O lenei, ‘e te faia lenei mea matou te fai atu ai ‘iā te oe; o lo‘o ‘iā i matou tagata e to‘afa ‘ua fai la latou tautoga;
24. ia ē fa‘atasi mai ‘iā te i latou, ma ia ē fa‘amamā ‘iā te oe fa‘atasi ma i latou, ma ē avane ni ‘oloa mo i latou, ‘ina ‘ia latou tafi i o latou lauulu, e iloa ai e tagata uma e lē moni se tasi mea o ia mea ‘ua talaina ai oe ‘iā te i latou; a ‘ua tusa lau lava amio ma le tulafono.
25. ‘Ae peita‘i o nu‘u ‘ese ē ‘ua fa‘atuatua, ‘ua matou tusi i ai ‘ua pule atu, ‘aua le ‘ana‘ana i latou i se mea fa‘apea, tau lava ‘ona ia mamao i latou i taulaga i tupua, ma le toto, ma mea ‘ua titina, ma le faita‘aga.”
26. ‘Ona ‘ave lea e Paulo o ia tagata, i le taeao fo‘i ‘ua fa‘amamāina ai o ia fa‘atasi ma i latou ‘ua ulufale atu i le malumalu, ‘ua fa‘ailoa atu le fa‘ai‘uina o aso o le fa‘amamāga se‘ia, fai ni taulaga mo i latou, o le tagata ma lana taulaga.
27. ‘Ua tali uma ona aso e fitu, ‘ua va‘ava‘ai Iutaia ma Asia ‘iā te ia i le malumalu, ‘ona ului atu lea o i latou i le motu o tagata uma ma latou pu‘e ‘iā te ia,
28. ‘ua ‘alalaga, “Sema e, o ‘outou Isaraelu e, fesoasoani mai ia o le tamaloa lenei, na te a‘oa‘o atu i tagata uma i mea uma lava ia liliu ‘ese i lenei nu‘u, ma le tulafono, ma lenei mea; ma ‘ua ‘au mai Eleni i le malumalu, ma ‘ua soli e ia lenei mea pa‘ia.”
29. Auā na mua‘i iloa e i latou ‘iā Tofimo le Efeso sa fa‘atasi ma ia i le ‘a‘ai, sa manatu i latou ‘ua ‘aumaia o ia e Paulo i le malumalu.
30. ‘Ua vevesi fo‘i le ‘a‘ai uma lava, ‘ua tamomo‘e mai ai le nu‘u; ‘ua pu‘e fo‘i i latou ‘iā Paulo ma toso ‘iā te ia i fafo o le malumalu; ‘ona punitia loa lea o faitoto‘a.
31. O lo‘o naunau i latou e fasioti ‘iā te ia, a ‘ua logo a‘e i le ali‘i e pule i ‘au, ‘ua matuā lolofi mai Ierusalema uma lava.
32. ‘Ona ‘aumai loa lea e ia o ‘au ma ta‘ita‘i o to‘aselau, ‘ua momo‘e ifo ‘iā te i latou; ‘ua latou iloa atu fo‘i le ali‘i e pule i ‘au ma ‘au ‘ona tu‘u lea e i latou o lo latou taufaitu‘i ‘iā Paulo.
33. ‘Ona fa‘alatalata mai lea o le ali‘i e pule i ‘au, ‘ua pu‘e mai ‘iā te ia ma fai ane ia fusifusia o ia i maea u‘amea se lua; ‘ua fesili mai po o ai o ia, pe se a fo‘i le mea ‘ua na faia.
34. ‘Ua ‘alalaga mai fo‘i nisi o le motu o tagata i le tasi mea, ma nisi i le tasi mea; ‘ua lē mafai ‘ona iloa e ia le tonu ‘ona o le ta‘alili vale, ‘ona fai ane lea o ia ‘ia ‘ave ‘iā te ia i le ‘olo.
35. ‘Ua o‘o fo‘i o ia i le ala fa‘a‘apefa‘i, ‘ua i‘u ‘ina ‘ava‘e o ia e le ‘au, ‘ona o le fa‘amalosi mai o le motu o tagata.
36. Auā ‘ua mulimuli mai le motu o tagata, ma ‘alalaga mai, “‘Ave‘ese ‘iā te ia.”
37. O le a ta‘ita‘iina Paulo i le ‘olo, ‘ua fai atu o ia i le ali‘i e pule i ‘au, “Pe tusa ‘ona ‘ou fai atu se ‘upu ‘iā te oe?”‘Ua fai mai o ia, “‘Ua e iloa ‘ea le ‘upu Eleni?
38. E lē o oe ‘ea lea tagata Aikupito, lē na fa‘atupu le fouvale i ona po ‘ua mavae, ma ta‘ita‘i tagata fa‘asauā e to‘afa afe i le vao?”
39. A ‘ua fai atu Paulo, “O a‘u lava o le tagata Iutaia, o le Taso i Kilikia, e lē se nu‘u fa‘atauva‘a lo‘u nu‘u; ‘ou te ‘ai‘oi atu fo‘i ‘iā te oe, ‘ia e tu‘u mai ‘iā te a‘u so‘u tautala atu i le nu‘u.”
40. ‘Ua tu‘u mai fo‘i e ia ‘iā Paulo, ‘ona tu lea o Paulo i le ala fa‘a‘apefa‘i, ‘ua tālo atu lona lima i le nu‘u. ‘Ua matuā fa‘alologo ‘ona tautala atu lea o ia i le ‘upu Eperu, ‘ua fa‘apea atu.