Le mataupu

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14
  15. 15
  16. 16
  17. 17
  18. 18
  19. 19
  20. 20
  21. 21
  22. 22
  23. 23
  24. 24
  25. 25
  26. 26
  27. 27
  28. 28

Feagaiga Tuai

Feagaiga Fou

O Galuega 15 O LE TUSI PA'IA - Ekalesia Katoliko Roma (RSCB)

O le Finauga i le Peritomega

1. Na ō ifo fo‘i nisi tagata mai Iutaia, ma latou a‘oa‘o atu i le ‘au uso, e fa‘apea atu, “‘Āfai e lē peritomeina ‘outou e pei o le tu a Mose, e lē mafai ‘ona fa‘aolaina ‘outou.”

2. Sa tele le ‘upu ‘ese ma le fefinaua‘i o i latou ma Paulo ma Panapa, ‘ona latou totofi lea ‘iā Paulo ma Panapa, ‘atoa ma isi o i latou, ia ō a‘e i le ‘au ‘aposetolo ma toeaina i Ierusalema i lenei finauga.

3. ‘Ua molia fo‘i i latou e le ekalesia, ‘ua ui atu i latou i Foinie ma Samaria, ‘ua fa‘amatalaina atu ai le liliu mai o nu‘u ‘ese; ‘ua fa‘atupu atu fo‘i le ‘oli‘oli tele i le ‘au uso uma lava.

4. ‘Ua o‘o i latou i Ierusalema, ‘ona talia lea o i latou e le ekalesia, ma le ‘au ‘aposetolo, ma toeaina, ‘ua la folafolaina atu mea e tele ‘ua faia e le Atua e i lā‘ua.

5. ‘Ona tutū mai lea o isi o le itū‘āiga o le ‘au faresaio ē ‘ua fa‘atuatua, ‘ua fa‘apea ane, “E tatau ‘ona peritomeina i latou, ma fai atu ‘iā te i latou, ia tausi le tulafono a Mose.”

6. ‘Ona fa‘apotopoto lea o le ‘au ‘aposetolo ma toeaina e filifili i lenei mea.

7. ‘Ua tele le fefīnaua‘i, ‘ona tu lea o Peteru i luga, ‘ua fa‘apea atu ‘iā te i latou, “Le ‘au uso e, ‘ua ‘outou iloa ‘ua leva ‘ona filifili e le Atua so tatou, ‘ia lagona mai e tagata o nu‘u ‘ese le ‘upu o le tala lelei i lo‘u nei gutu, ma latou talitonu i ai.

8. O le Atua fo‘i o lē silafia loto, ‘ua molimau o ia ‘iā te i latou i lona foa‘i atu o le Agaga Pa‘ia ‘iā te i latou, pei o i tatou nei.

9. ‘Ua na lē fa‘a‘ese‘eseina fo‘i o i tatou ma i latou i lona fa‘amamāina o latou loto i le fa‘atuatua.

10. O lenei, se a le mea tou te fa‘a‘ono‘ono atu ai i le Atua i lo ‘outou fa‘ae‘e atu i ua o le ‘au so‘o le amo ‘ua lē lavā tau‘ave e o tatou tamā po o i tatou nei?

11. ‘Ae peita‘i ‘ua tatou tāofi, o le alofa tunoa o le Ali‘i o Iesu Keriso e fa‘aolaina ai i tatou, fa‘apei o i latou lava.”

12. ‘Ona fa‘alologo lea o le to‘atele uma lava, ma fa‘alogologo mai ia Panapa ma Paulo, o lo‘o fa‘amatalaina atu o fa‘ailoga ma vāvega e tele ‘ua faia e le Atua i nu‘u ‘ese e i lā‘ua.

13. ‘Ua uma a la ‘upu, ‘ona fai mai lea o Iakopo, ‘ua fa‘apea mai, “Sema e, le ‘au uso e, fa‘alogo mai ia ‘iā te a‘u;

14. ‘ua talaina mai e Simona i le ulua‘i silasila o le Atua i nu‘u ‘ese e maua ai se nu‘u mo lona suafa.

15. ‘Ua ‘au fa‘atasi fo‘i ma lenei ‘upu a le ‘au Perofeta, pei ‘ona tusia,

16. ‘A mavae nei mea ‘ou te fo‘i atu,ma ‘ou toe fai le fale ‘ie o Tavita ‘ua pa‘ū,ma ‘ou toe ati a‘e mea lepetia o i ai, ma, toe fa‘atūina.

17. ‘Ina ‘ia sā‘ili atu i le Ali‘i tagata ‘ua totoe, ma nu‘u uma lava o ē ‘ua fa‘aigoaina i lo‘u igoa.‘Ua fetalai mai ai le Ali‘i, o lē na te faia nei mea uma.

18. ‘Ua silafia e le Atua ana galuega uma lava talu mai le vavau.’

19. O lenei, o lo‘u lea manatu, ia sōia le fa‘alavelave i tagata o nu‘u ‘ese ‘ua liliu mai i le Atua;

20. a ‘ia tusi atu ‘iā te i latou, ia taumamao i latou i mea leaga e fasia mo tupua, ma faita‘aga, ma mea titina, ma le toto.

21. Auā talu o tupulaga anamua ‘ua ia Mose ē ‘ua tala‘i ‘iā te ia i lea ‘a‘ai ma lea ‘a‘ai, o faitauina i sunako i sapati uma lava.”

O le Tusi i Tagata o Nu‘u ‘Ese o ē ‘ua Fa‘atuatua

22. ‘Ona lelei ai lea i le ‘au ‘aposetolo, ma toeaina ‘atoa ma le ekalesia uma o filifili ma ‘a‘auina atu i Anetioka, fa‘atasi ma Paulo ma Panapa, ni o latou tagata, o Iuta e igoa ‘iā Pasapa ‘atoa ma Sila, o tagata, ‘ua ta‘ua i le ‘au uso;

23. ‘ua tusi atu nei ‘upu ia ‘ave e i latou, “O lo‘o alolofa atu le ‘au ‘aposetolo, ma toeaina ‘atoa ma le ‘au uso i le ‘au uso o tagata o nu‘u ‘ese o i Anetioka, ma Suria, ma Kilikia.

24. ‘Ua matou fa‘alogo atu, ‘ua fa‘atupuina lo ‘outou atuatuvale e nisi o ē na ō atu sa ‘iā te i matou, ‘iā latou ‘upu matou te le‘i poloa‘i atu ai ma latou fa‘aliliu ‘ese o ‘outou loto.

25. O le mea lea ‘ua lelei ai ‘iā i matou nei ‘ua fa‘apotopotoina ma le loto gatasi, e filifili ma ‘a‘auina atu ‘iā te ‘outou tagata fa‘atasi ma o matou uso pele o Panapa ma Paulo,

26. o tagata ia ‘ua tu‘ulafoa‘iina o lā‘ua ola ‘ona o le suafa o lo tatou Ali‘i o Iesu Keriso.

27. O le mea lea ‘ua matou ‘a‘au atu ai ‘iā Iuta ma Sila, la te ta‘u atu fo‘i ‘iā lā‘ua ‘upu i ia lava mea.

28. Auā ‘ua lelei i le Agaga Pa‘ia ma i matou nei, ‘ia lē fa‘ae‘e atu se tasi avega ‘iā te ‘outou, na o nei mea e tatau;

29. ‘ia fa‘amamao ‘outou i mea o fasia mo tupua, ma le toto ma mea titina, ma le faita‘aga; ‘āfai tou te taumamao ma nei mea e lelei ai ‘outou. ‘Ia ‘outou manuia.”

30. ‘Ua tu‘uina atu i latou e ō, ‘ona o‘o atu lea o i latou i Anetioka, ‘ua fa‘apotopoto mai fo‘i o i latou le motu o tagata, ‘ua tu‘u atu ai le tusi.

31. ‘Ua latou faitauina, ‘ona ‘oli‘oli lea o i latou ‘ona o le fa‘amafanafanaga.

32. O Iuta fo‘i ma Sila, auā o Perofeta i lā‘ua ‘ua la fa‘amafanafana atu, ma fa‘amalosi atu i le ‘au uso i ‘upu e tele.

33. ‘Ua la fai po ai, ‘ona tu‘uina atu lea o i lā‘ua e le ‘au uso ia ō ma le manuia, i ē na ‘a‘auina mai i lā‘ua.

35. O Paulo fo‘i ma Panapa ‘ua nonofo i lā‘ua i Anetioka, ma isi fo‘i e to‘atele, ‘ua a‘oa‘o ma folafola atu le afioga a le Ali‘i.

Paulo ma Sila, Panapa ma Ioane Mareko

36. ‘Ua mavae isi aso, ‘ona fai atu lea o Paulo ‘iā Panapa, “‘Inā tā fo‘i atu ia, tā asiasi atu i o tā uso i ‘a‘ai uma lava sa tā tala‘i i ai le afioga a le Ali‘i, pe fa‘apefea i latou.”

37. A ‘ua loto Panapa ‘ia latou ō ma Ioane, o lē ‘ua igoa ‘iā Mareko.

38. A ‘ua manatu Paulo, e lē tatau ‘ona latou ō ma lē na alu ‘ese ‘iā te i lā‘ua i Pafulia, ma ‘ua lē ō ma i lā‘ua i le galuega.

39. ‘Ona tigā, tele lea o loto, ‘ua te‘a ‘ese‘ese ai i lā‘ua; ‘ona ō lea o Panapa ma Mareko ‘ua folau atu i Kuperu.

40. A ‘ua filifilia e Paulo ‘ia Sila, ma alu atu, ‘ua tu‘uina atu o ia o le ‘au uso i le alofa tunoa o le Atua.

41. ‘Ua ui ane o ia i Suria ma Kilikia, ‘ua fa‘amalosi i ekalesia.