1. ‘Ona fa‘apea mai lea o le ositaulaga sili, “E moni ‘ea, ‘ua fa‘apea na mea?”
2. ‘Ona fai atu lea o ia:“Soma e, le ‘au uso e, ma tama e, ‘inā fa‘afofoga mai ia. Na fa‘aali le Atua e ona le mamalu i lo tatou tamā o Aperaamo, ‘inā ō i Mesopotamia o ia, a o le‘i o‘o i lona nofo i Karana,
3. ‘ua na fetalai mai fo‘i ‘iā te ia, ‘‘Inā tu‘ua ia o lou nu‘u ma lou ‘āiga, a e alu atu i le nu‘u ‘ou te fa‘asino atu ai ‘iā te oe.’
4. ‘Ona tu‘ua lea e ia o le nu‘u o Kaletaia, ‘ae nofo i Karana; ‘ua oti lona tamā, ‘ona ia ‘aumaia lea o ia nai lea mea e nofo i le nu‘u nei, ‘ua ‘outou nonofo ai.
5. ‘Ua na lē avatu fo‘i ‘iā te ia se tofi i ai, e leai lava se mea e tusa ma se tulagāvae; a ‘ua folafola mai, na te avatua ‘iā te ia e fai mōna fanua, ‘atoa ma lana fānau pe a mavae atu o ia, a o leai sana fānau.
6. Na fa‘apea fo‘i ‘ona fetalai mai o le Atua, e āumau lana fānau i le nu‘u ‘ese; latou te fa‘apologaina ma fa‘asaunoa ‘iā te i latou i tausaga e faselau.
7. Na fa‘apea mai fo‘i le Atua, ‘‘Ou te fa‘asala i le nu‘u latou te nofo pologa ai; a mavae fo‘i ia mea e ō mai i latou ma latou ‘au‘auna mai ‘iā te a‘u i lenei nu‘u.’
8. Na ia tu‘uina atu fo‘i ‘iā te ia le feagaiga o le peritome; ‘ona fānau ai lea o lona atali‘i o Isaako ‘ua ia peritomeina ai o ia i le aso valu; o le atali‘i fo‘i o Isaako, o Iakopo; le atali‘i fo‘i o Iakopo e to‘asefulu ma le to‘alua, o tupuga ia.
9. “O le ‘au tupuga fo‘i, ‘ina o matatau‘a ‘iā Iosefa, ‘ua latou fa‘atau atu ‘iā te ia i Aikupito; a ‘ua ‘iā te ia le Atua.
10. ‘Ua na lavea‘i fo‘i ‘iā te ia i ona puapuagā uma lava, ma foa‘i mai ‘iā te ia, ‘ia alofagia ma ta‘upotoina i luma o Farao le tupu o Aikupito; ‘ua na tofia fo‘i o ia e pule i Aikupito, ‘atoa ma lona ‘āiga uma.
11. ‘Ua o‘o le oge ma le puapuagā tele i le nu‘u o Aikupito uma lava ‘atoa ma Kanana; ‘ua lē maua fo‘i ni mea e ‘ai e o tatou tamā.
12. A ‘ua fa‘alogo e Iakopo ‘ua i Aikupito saito, ‘ona ‘a‘au atu lea e ia o tatou tamā, o le mua‘i ō atu lea.
13. O lo latou fo‘i fa‘alua ‘ua fa‘ailoa ai Iosefa i ona uso, ‘ua fa‘aalia fo‘i le ‘āiga o Iosefa ‘iā Farao.
14. ‘Ona fe‘au atu lea e Iosefa, ‘ua ‘a‘ami i lona tamā o Iakopo, ‘atoa ma lona ‘āiga uma lava, e to‘afitugafulu ma le to‘alima o tagata.
15. ‘Ona alu ifo lea o Iakopo i Aikupito, ‘ua oti ai o ia, ‘atoa ma o tatou tamā.
16. ‘Ua molia fo‘i i latou i Sekema, ma ‘ua tu‘uina i le tu‘ugamau na fa‘atau e Aperaamo i le tau ario nai le fānau a Emoro le tamā o Sekema.
17. “A ‘ua latalata le tausaga na folafolaina, sa tautō ai le Atua ‘iā Aperaamo, ‘ona tutupu lea o le nu‘u, ma ‘ua fa‘ato‘ateleina i Aikupito.
18. ‘Ua o‘o i le nofo mai o le tasi tupu, sa lē iloa e ia Iosefa.
19. ‘Ua nā togafitileagaina o tatou ‘āiga, ma fa‘asaunoa atu i o tatou tamā ‘ia tu‘ulafoa‘i a latou tama meamea, ‘ina ne‘i ola i latou.
20. O ona po ia na fānau ai Mose, ‘ua ma‘eu le tino lelei; e tolu masina fo‘i ‘ua tausia ai o ia i le ‘āiga o lona tamā;
21. ‘ua tu‘ulafoa‘iina fo‘i o ia, ‘ua ‘ava‘e e le afafine o Farao, ‘ua na tausi fo‘i ‘iā te ia e fai mana tama.
22. Na a‘oa‘oina fo‘i Mose i le poto uma lava o Aikupito, ‘ua malosi i ana ‘upu ma ana mea na faia.
23. “‘Ua o‘o i le fagafulu o ona tausaga, ‘ona manatu ai loa o ia e asiasi atu i ona uso o le fānauga a Isaraelu.
24. ‘Ua iloa atu fo‘i e ia o le tasi ‘ua agaleagaina, ‘ua na fesoasoani i ai, ma taui atu i lona agaleagaina, ma fasi i le Aikupito.
25. Sa manatu o ia e lē iloa e ona uso e fa‘aola le Atua ‘iā te i latou i lona lima; a ‘ua lē iloa e i latou.
26. O le taeao fo‘i ‘ua tu atu ai o ia i le to‘alua o i latou o tau, ‘ua na pupulu ai ia lelei, ‘ua fa‘apea atu, ‘Soma e, o le uso ‘oulua; se a le mea ‘ua ‘oulua feagaleaga a‘i ai?’
27. A o lē na agaleaga atu i le tasi, ‘ua na tete‘e atu ‘iā te ia, ‘ua fa‘apea mai, ‘O ai ‘ea na fai oe ma ali‘i ma fa‘amasino ‘iā te i mā‘ua?
28. Pe ‘e te fia fasioti ‘ea ‘iā te a‘u, pei ‘ona e fasioti i le Aikupito ananafi?’
29. ‘Ona sola lea o Mose i lea ‘upu, ‘ua āumau ai i le nu‘u o Mitiana, ‘ua fānau ai ona atali‘i e to‘alua.
30. “‘Ua mavae fo‘i tausaga e fasefulu, ‘ona fa‘aali lea ‘iā te ia o le agelu a le Ali‘i i le afi mumū i le la‘au talatala i le vao o le mauga o Sinai.
31. ‘Ua va‘aia e Mose, ‘ona ofo ai lea i le mea ‘ua va‘aia; ‘ua fa‘alatalata atu o ia e matamata i ai, ‘ona tulei mai lea o le si‘ufofoga o le Ali‘i ‘iā te ia:
32. ‘O a‘u o le Atua o ou tamā, o le Atua o Aperaamo, o le Atua fo‘i o Isaako o le Atua fo‘i o Iakopo.’ ‘Ona gatete lea o Mose, ‘ua lē mafai ‘ona fa‘amalosi e matamata i ai.
33. ‘Ona fetalai mai lea o le Ali‘i ‘iā te ia, ‘Tatala ia ou se‘evae; auā o le mea ‘ua e tu ai o le ‘ele‘ele pa‘ia lea.
34. ‘Ua ‘ou matuā va‘ava‘ai i le agaleagaina o lo‘u nu‘u i Aikupito, ‘ua ‘ou fa‘alogo fo‘i i lo latou feoi, ‘ua ‘ou alu ifo fo‘i e lavea‘i ‘iā te i latou, o lenei, sau ia, ‘ou te ‘auina atu oe i Aikupito.’
35. “O Mose lenā sa te‘ena e i latou, sa fa‘apea atu, ‘O ai se na faia oe ma ali‘i ma fa‘amasino?’ Na ‘auina o ia e le Atua e fai ma ali‘i ma fa‘aola, i le lima o le agelu sa fa‘aali ‘iā te ia i le la‘au talatala.
36. O ia lava, na ta‘ita‘iina atu ‘iā te i latou, a ‘ua uma ‘ona fai vāvega ma fa‘ailoga i le nu‘u o Aikupito ma le sami Ulaula, ‘atoa ma le vao i tausaga e fagafulu.
37. O Mose lea, sa fai atu i le fānauga a Isaraelu, ‘E fa‘atūina e le Ali‘i lo ‘outou Atua le perofeta mo ‘outou o so ‘outou uso, pei o a‘u nei, tou te fa‘alogo ‘iā te ia.’
38. O ia sa i le ekalesia i le vao fa‘atasi ma le agelu na fetalai mai ‘iā te ia i le mauga o Sinai, sa fa‘atasi fo‘i ma o tatou tamā; ‘ua na talia fo‘i afioga o le ola e ‘aumai ai ‘iā te i tatou.
39. “‘Ua lē loto o tatou tamā ‘ina ‘ana‘ana ‘iā te ia, a ‘ua tete‘e atu ai, ma toe fo‘i atu i o latou loto i Aikupito,
40. ‘ua fa‘apea atu ‘iā Arona, ‘‘Inā faia ia atua mo i tatou, latou te muamua atu ia i tatou; auā o lenā Mose, sa ta‘ita‘iina i tatou nai le nu‘u o Aikupito, tatou te lē iloa se mea ‘ua o‘o ‘iā te ia.’
41. Na faia fo‘i e i latou i ia ona po le tama‘i povi, na latou fai fo‘i le taulaga i le tupua, ‘ua ‘oli‘oli fo‘i i latou i galuega a o latou lava lima.
42. ‘Ona liliu ‘ese lea o le Atua, ma tu‘u atu ‘iā te i latou e ‘au‘auna i ‘au o le lagi; pei ‘ona tusia i le tusi a le ‘au perofeta,‘Le ‘āiga o Isaraelu e,na ‘outou ‘aumai ‘ea manu ‘ua fasia ma taulaga ‘iā te a‘ui ona tausaga e fagafulu i le vao?
43. Na tau‘ave lava e ‘outou le malumalu o Moloka,ma le fetū o lo ‘outou atua o Refana,o fa‘atusa na ‘outou faia tou te ifo i ai;o le mea lea ‘ou te ‘avea ai ‘outou e nonofo i tala atu o Papelonia.’
44. “Sa i o tatou tamā i le vao le fale fetāfa‘i sa i ai le mau, pei ‘ona poloa‘i mai ai o ia lē na fetalai mai ‘iā Mose, ia faia e ia pei o le fa‘atusa na va‘aia e ia.
45. Na talia lea e o tatou tamā ‘atoa ma Iosua, ma latou ‘aumaia i le lau‘ele‘ele o nu‘u ‘ese, na tulia e le Atua i luma o tatou tamā e o‘o i ona po o Tavita.
46. O ia na alofaina e le Atua, ‘ua na fa‘atoga atu fo‘i ia maua o ia se mea e afio ai le Atua o Iakopo.
47. A ‘ua faia e Solomona le fale mo ia.
48. ‘Ae peita‘i o le Silisili‘ese, e lē afio o ia i malumalu e faia e lima, pei ‘ona fai mai le perofeta,
49. ‘O le lagi o lo‘u nofoāli‘i lea, o le lalolagi fo‘i o le mea e tu ai o‘u vae lea;o lo‘o fa‘apea mai le Ali‘i, po fa‘apefea se fale tou te faia mo a‘u?Po o ifea se mea ‘ou te nofo ai?
50. E lē faia ‘ea, e o‘u lima nei mea uma?’
51. “O ‘outou, ē ‘ua ma‘a‘a ‘ua, ma ‘ua lē peritomeina o loto ma taliga, ‘ua ‘outou tete‘e atu pea lava i le Agaga Pa‘ia; pei o ‘outou tamā ‘ua fa‘apea fo‘i ‘outou.
52. O ai se, o le ‘au perofeta e le‘i sauā i ai o ‘outou tamā? ‘Ua fasiotia fo‘i e i latou ē na mua‘i tala‘i i le afio, mai lē Amiotonu; o ia ‘ua ‘outou fa‘alataina ma fasiotia nei;
53. o ‘outou, ē ‘ua maua le tulafono i sauniga a agelu, a ‘ua lē tāofia.”
54. ‘Ua fa‘alogo i latou i ia ‘upu, ‘ona matuā lotoa lea o i latou; ‘ua lilivau fo‘i o latou nifo ‘iā te ia.
55. A ‘ua tumu o ia i le Agaga Pa‘ia, ‘ua pulato‘a i le lagi, ‘ua iloa atu le pupula o le Atua, ma Iesu o lo‘o tu i le itū taumatau o le Atua, ‘ona fai atu lea,
56. “Fa‘auta, ‘ua ‘ou iloa le lagi ‘ua avanoa, ma le Atali‘i o le tagata o lo‘o tu i le itū taumatau o le Atua.”
57. ‘Ona ‘alalaga lea o i latou ma le leo tele, ‘ua pupuni o latou taliga, ma feosofi mai ‘iā te ia ma le loto gatasi,
58. ‘ua tulei atu fo‘i ‘iā te ia i tua o le ‘a‘ai, ‘ona latou fetogi lea ‘iā te ia i ma‘a; ‘ua tu‘u atu fo‘i e molimau o latou ‘ofu i le taule‘ale‘a, o Saulo le igoa, e leoleo ai.
59. ‘Ua fetogi fo‘i i latou ‘iā Setefano, o vala‘au o, ia, ‘ua fa‘apea atu, “Le Ali‘i e Iesu, ‘ia e talia mai lo‘u nei agaga.”
60. ‘Ua to‘otuli fo‘i o ia, ma ‘alaga atu ma le leo tele, “Le Ali‘i e, ‘aua ‘e te tu‘uina atu lenei agasala ‘iā te i latou.” ‘Ua uma atu lea ‘upu, ‘ona moe ai lea o ia.