1. Sa i Ikonio i lā‘ua, ‘ua ulufale fa‘atasi i le sunako o tagata Iutaia, o ‘upu fo‘i na la lauga a‘i, ‘ua fa‘atuatua ai Iutaia ma Eleni e to‘atele lava.
2. ‘Ae peita‘i o Iutaia le fa‘alogo, ‘ua latou fa‘aoso atu ma fa‘aita atu i loto o tagata o nu‘u ‘ese i le ‘au uso.
3. O le mea lea ‘ua nonofo loa ai i lā‘ua, ma tautala fa‘amalosi atu i le afioga a le Ali‘i, ‘ua molimau mai o ia i le ‘upu o lona alofa tunoa, ma ‘ua foa‘i ia faia fa‘ailoga ma vāvega i o lā‘ua lima.
4. A ‘ua vaeluaina le motu o tagata i le ‘a‘ai; ‘ua ia Iutaia nisi, ‘ua i ‘aposetolo nisi.
5. ‘Ua taupulepule fo‘i tagata o nu‘u ‘ese, ‘atoa ma Iutaia, ma o latou ali‘i, e fa‘asauā ma fetogi ‘iā te i lā‘ua i ma‘a;
6. ‘ona iloa ai lea o i lā‘ua, ‘ona la sōsōla ai lea i Lusa ma Teipe, o ‘a‘ai ia o Lukaonia, ma nu‘u e vagavagai;
7. ‘ua folafola i ai le tala lelei.
8. Sa nofo fo‘i i Lusa le tasi tagata ‘ua lē lavā i ona vae, ‘ua pipili talu lava ‘ona fānau mai, e le‘i savali lava.
9. ‘Ua fa‘alogo mai lenei tagata ‘iā Paulo o lo‘o tautala; ‘ua pulato‘a atu Paulo ‘iā te ia, ‘ua iloa fo‘i ‘ua ‘iā te ia le fa‘atuatua e mālōlō ai,
10. ‘ua fai atu ma le leo tele, “‘Inā tu sa‘o ia ou vae i luga.” ‘Ona oso lea o ia ma savali.
11. ‘Ua iloa fo‘i e le motu o tagata le mea ‘ua faia e Paulo, ‘ona ‘alalaga lea, i le gagana a Lukaonia, ‘ua fa‘apea ane, “‘Ua afio ifo atua ‘iā te i tatou ‘ua pei ni tagata.”
12. ‘Ua fa‘aigoa atu fo‘i o i latou ‘iā Panapa o Seu; a o Paulo, o Hereme ia, auā o ia o le ‘autū o ‘upu.
13. A o le ositaulaga a Seu, o lē na i luma o la latou ‘a‘ai lona malumalu, ‘ua ‘aumai e ia o povi po‘a ma pale i faitoto‘a, o le a osi taulaga o ia ‘atoa ma le motu o tagata.
14. ‘Ua fa‘alogo i ai ‘aposetolo, o Panapa ma Paulo, ‘ona la saeia lea o lā‘ua ‘ofu, ma feosofi atu i le motu o tagata, o lo‘o ‘alalaga i lā‘ua,
15. ‘ua fa‘apea atu, “Ali‘i e, se a le mea ‘ua ‘outou fai ai na mea? O tagata lava i mā‘ua nei e tutusa ma ‘outou, ‘ua ma folafola atu le tala lelei ‘iā te ‘outou, ia ‘outou lafoa‘i nei mea lē aogā, ma liliu mai i le Atua soifua, o lē na faia le lagi ma le lalolagi, ma le sami, ma mea uma lava o i ai.
16. O lē na tu‘ufaitalia nu‘u uma lava o augatupulaga ‘ua mavae atu, latou te sāvavali i o latou lava ala.
17. E ui lava i lea, ‘ua lē tu‘u e ia o ona fa‘ailoga, i lona agalelei mai, ma foa‘i mai o timu mai le lagi ‘iā te i tatou, ma tausaga o fuata o le tau, ma ‘ua fa‘amalilie i o tatou loto i le mea e ‘ai ma le ‘oli‘oli.”
18. O lo‘o fai atu nei ‘upu, se manū a le mavavao ai i le motu o tagata ia sōia le fai taulaga mai ‘iā te i lā‘ua.
19. A ‘ua ō mai tagata Iutaia mai Anetioka ma Ikonio, ‘ua latou fa‘alalo ane i le motu o tagata, ‘ua uma fo‘i ‘ona fetogi ‘iā Paulo i ma‘a, ‘ona latou toso lea ‘iā te ia i tua o le ‘a‘ai, ‘ua manatu i latou ‘ua oti o ia.
20. ‘Ua vagavagai o ia e le ‘au so‘o, ‘ona tu lea o ia i luga, ‘ua alu i le ‘a‘ai; o le taeao fo‘i ‘ua la ō atu ai ma Panapa i Teipe.
21. ‘Ua uma fo‘i ‘ona folafola e Paulo ma Panapa le tala lelei i lea ‘a‘ai, e to‘atele ‘ua fai ai ma so‘o, ‘ona la toe fo‘i lea i Lusa, ma Ikonio, ma Anetioka,
22. ‘ua fa‘amalosi i loto o le ‘au so‘o, ma apoapoa‘i atu ‘ia tumau i le fa‘atuatua; ‘ua fa‘apea atu fo‘i, “O puapuagā e tele e tatau ‘ona tatou sao atu ai i le mālō o le Atua.”
23. ‘Ua uma ‘ona tofia e i lā‘ua o toeaina mo i latou i lea ekalesia ma lea ekalesia, ‘ua tatalo ma anapopogi, ‘ona la tu‘uina atu lea o i latou i le Ali‘i ‘ua latou fa‘atuatua i ai.
24. ‘Ua uma ‘ona la ui ane i Pisitia, ‘ona o‘o lea i Pafulia.
25. ‘Ua la tautala atu fo‘i i le ‘upu i Pereka, ‘ona la ō ifo lea i Ataleia;
26. ‘ona folau atu ai lea o i lā‘ua nai lea mea i Anetioka sa la ō atu ai ‘ina ‘ua tu‘uina atu ai i lā‘ua i le alofa tunoa o le Atua ‘ona o le galuega sa la faia.
27. ‘Ua o‘o fo‘i i lā‘ua, ‘ona la fa‘apotopotoina lea o le ekalesia, ma fa‘amatalaina atu mea uma na faia e le Atua e i lā‘ua, ma lona fa‘aavanoa le faitoto‘a o le fa‘atuatua mo nu‘u ‘ese.
28. ‘Ua la nonofo ai fo‘i i po e tele fa‘atasi ma le ‘au so‘o.