1. ‘Ua o‘o ifo fo‘i o ia i Teipe ma Lusa; fa‘auta fo‘i sa i ai le tasi so‘o, o Timoteo le igoa, o le tama a le fafine Iutaia e fa‘atuatua a o lona tamā o le Eleni ia;
2. ‘ua ta‘uleleia o ia e le ‘au uso i Lusa ma Ikonio.
3. ‘Ua mana‘o Paulo la te ō ma ia, ‘ona ia peritomeina lea ‘iā te ia, ‘ona o tagata Iutaia o i ia nu‘u; auā ‘ua iloa e i latou uma lava o le Eleni lona tamā.
4. ‘Ua ui ane i latou i ‘a‘ai, ma latou tu‘uina atu ‘iā te i latou i‘ugafono, na tu‘u e le ‘au ‘aposetolo ma toeaina o i Ierusalema, latou te tausia.
5. ‘Ua fa‘amalosia fo‘i ekalesia i le fa‘atuatua, ma ‘ua fa‘ato‘ateleina i lea aso ma lea aso.
6. ‘Ua mavae ‘ona latou ui ane i Ferukia ma le nu‘u o Kalatia, a ‘ua vaoia e le Agaga Pa‘ia ‘aua latou te tautala i le ‘upu i Asia;
7. ‘ua o‘o fo‘i i latou i Musia, ‘ona taumafai ai lea o i latou ‘ona ō atu i Pitunia; a ‘ua lē mafai le Agaga ‘ona latou ō.
8. ‘Ona ui fa‘atafatafa ane lea o i latou i Musia, ‘ua o‘o ifo i Teroa.
9. ‘Ua iloa fo‘i e Paulo le fa‘aaliga i le po; o le tasi tagata Maketonia ‘ua tu mai, ma ‘ai‘oi mai ‘iā te ia, ‘ua fa‘apea mai, “Sau ia i Maketonia, ma fesoasoani mai ‘iā te i matou.”
10. ‘Ua iloa e ia le fa‘aaliga, ‘ona sauni loa lea o i matou e ō atu i Maketonia, ‘ua manatu lava i matou, ‘ua vala‘auina i matou e le Ali‘i e folafola atu le tala lelei ‘iā te i latou.
11. ‘Ona matou tu‘uva‘a ai lea i Teroa, ma folau tonu atu i Samotake, o le taeao fo‘i ‘ua o‘o ai i Neapoli;
12. ‘ona toe o‘o atu ai lea i Filipi, o le mua‘i ‘a‘ai lea o lea itū o Maketonia, o le kolone o Roma; ‘ua matou nonofo fo‘i i lea ‘a‘ai ini nai aso.
13. ‘Ua ō fo‘i i matou i le aso sapati i tua o le ‘a‘ai i le ‘auvai o le vaitafe, o le mea, ‘ua masani ‘ona fai ai o tatalo; ‘ua nonofo fo‘i i matou i lalo, ma tautala atu i fafine ē na potopoto ai.
14. ‘Ua fa‘alogo mai fo‘i ‘iā te i matou le tasi fafine ‘ua mata‘u i le Atua, o Litia le igoa, o le fa‘atau ‘ie pāuli o Tuatira lona nu‘u; ‘ua tatalaina e le Ali‘i lona loto ia naunau i ‘upu na tautala a‘i Paulo.
15. ‘Ua papatisoina o ia ‘atoa ma lona ‘āiga, ‘ona ‘ai‘oi mai lea o ia, ‘ua fa‘apea mai, “‘Āfai ‘ua ‘outou manatu o a‘u o lē fa‘atuatua i le Ali‘i, ō mai ia i lo‘u fale, ma nonofo ai. ‘Ua pulunaunauina fo‘i i matou e ia.”
16. ‘Ua ō atu i matou i le mea e tatalo ai, ‘ona fetaia‘i lea ma i matou le tasi ‘au‘auna teine ‘ua i ai le aitu vavalo ‘ua na maua ‘oloa e tele ma ona ali‘i i ana valo‘aga.
17. ‘Ua femulimulia‘i o ia ‘iā Paulo ma i matou ma ‘alaga, ‘ua fa‘apea ane, “O ‘au‘auna nei tagata a le Atua silisili ‘ese, latou te tala‘i mai ‘iā te i tatou le ala o le ola.”
18. ‘Ua fa‘apea ‘ona fai e ia i aso e tele a ‘ua tigā Paulo, ‘ua fāliu atu, ma ‘ua fai atu i le aitu, “‘Ou te fai atu ‘iā te oe i le suafa o Iesu Keriso, alu ia i fafo ‘iā te ia.” ‘Ona alu ai lea o ia i fafo i lea lava itū aso.
19. ‘Ua iloa fo‘i e ona ali‘i ‘ua alu ‘ese le fa‘atuatuaga e maua ai a latou ‘oloa, ‘ona pupu‘e ai lea e i latou ‘iā Paulo ma Sila, ma fetoso ‘iā te i lā‘ua, i le malae i luma o ali‘i.
20. ‘Ua ta‘ita‘i fo‘i ‘iā te i lā‘ua i fa‘amasino, ‘ua fa‘apea atu, “‘Ua matuā fa‘asoesā mai nei tagata, i lo tatou nu‘u o tagata Iutaia fo‘i i lā‘ua,
21. ‘ua folafola mai fo‘i e i lā‘ua o tu e sa ‘ona talia pe faia e i tatou tagata Roma.”
22. ‘Ua feosofi mai le motu o tagata ‘iā te i lā‘ua, ‘ua saei ‘ese atu e fa‘amasino o lā‘ua ‘ofu, ‘ua fai atu fo‘i ia sasa ‘iā te i lā‘ua i la‘au.
23. ‘Ua latou sasa ‘iā te i lā‘ua, o tele o la ta, ‘ona tu‘u atu lea i le fale puipui, ‘ua fai atu i le leoleo o le fale, ‘ia leoleo lelei ‘iā te i lā‘ua;
24. ‘ua o‘o lea poloa‘iga, ‘ona tu‘u atu lea o ia ‘iā te i lā‘ua i le potu tuloto, ma fa‘amau o la vae i la‘au.
25. O le tulua o po ma ao ‘ua tatalo ai ma pepese o Paulo ma Sila, i le Atua; ‘ua fa‘alogo fo‘i ‘iā te i lā‘ua e ‘ua noanoatia.
26. ‘Ona fa‘afuase‘i mai lea o le mafui‘e tele, ‘ua lūlūina ai fa‘avae o le fale puipui; ‘ua matala mai ai uma faitoto‘a, ‘ua maunuunu ai fo‘i o latou noanoaga uma lava.
27. ‘Ua ala le leoleo o le fale puipui na moe, ‘ua na iloa faitoto‘a o le fale ‘ua avanoa, ‘ona se‘i lea e ia o le pelu, a fasi o ia e ia, ‘ua manatu o ia ‘ua sōsōla ē na noanoatia,
28. A ‘ua ‘alaga Paulo ma le leo tele, ‘ua fa‘apea atu, “‘Aua ne‘i faia e oe se mea e leaga ai oe; auā o ‘i‘inei i matou uma lava.”
29. ‘Ona fai atu lea o ia e ‘aumai ni afi, ‘ona oso mai lea o ia, ma fa‘apa‘ū i luma o Paulo ma Sila ma le gatete.
30. ‘Ua na, ‘aumaia fo‘i i lā‘ua i fafo, ‘ua fa‘apea mai, “Ali‘i e, se a se mea e tatau ‘ona ‘ou faia ‘ina ‘ia fa‘aolaina ai o a‘u?”
31. ‘Ua fai atu i lā‘ua, “‘Inā fa‘atuatua ia i le Ali‘i o Iesu Keriso e ola ai oe ‘atoa ma lou ‘āiga.”
32. ‘Ona la tautala atu lea i le afioga a le Ali‘i ‘iā te ia, ma i latou uma ‘ua i lona fale.
33. ‘Ua na ‘aumai fo‘i ‘iā te i lā‘ua i lea lava itū po ma mulumulu atu o la ta; ‘ona papatisoina loa lea o ia ma lona ‘āiga uma.
34. ‘Ua na ‘aveina a‘e fo‘i ‘iā te i lā‘ua i lona fale, ma laulau atu mea e ‘ai, ‘ua ‘oli‘oli o ia ma lona ‘āiga uma, ‘ua fa‘atuatua i le Atua.
35. ‘Ua ao, ‘ona ‘a‘auina mai lea e fa‘amasino o ‘au‘auna, ‘ua fa‘apea mai, “Tu‘u atu ia o ia tagata ia ō.”
36. ‘Ona fai ane lea o le leoleo o le fale puipui nei ‘upu ‘iā Paulo, “‘Ua ‘a‘auina mai e fa‘amasino ia tu‘uina atu ‘oulua ia ō; o lenei, ō atu ia, ‘inā ō ma le manuia.”
37. A ‘ua fai atu Paulo ‘iā te i latou, “‘Ua sasa mai i latou ‘iā te i maua nei i luma o le nu‘u a o le‘i fa‘asalaina, o i mā‘ua o tagata Roma, ‘ona latou tu‘u mai lea ‘iā i mā‘ua i fale puipui; latou te tu‘u lemū atu nei ‘ea ‘iā te i maua? ‘Aua lava; a o i latou, se‘i ō mai lava i latou e avatu ‘iā te i mā‘ua i fafo.”
38. ‘Ona molia lea e ‘au‘auna o ia ‘upu i fa‘amasino; ‘ona fefefe lea o i latou, ‘ina ‘ua lagona o tagata Roma i lā‘ua.
39. ‘Ona ō mai lea o i latou ma ole mai ‘iā te i lā‘ua, ‘ua avatu fo‘i ‘iā te i lā‘ua i fafo, ma ‘ai‘oi mai ia la ō ‘ese atu i le ‘a‘ai.
40. ‘Ona ō lea o i lā‘ua i fafo o le fale puipui, ‘ua ulufale i sa Litiā; ‘ua feiloa‘i fo‘i ma le ‘au uso, ma la fa‘amafanafana atu ‘iā te i latou, ‘ona ō lea o i lā‘ua.