1. O ona po ia ‘ua fa‘ato‘ateleina ai le ‘au so‘o, ‘ua tupu ai le muimui o Elenisi ‘iā Eperu auā ‘ua galo o latou fafine ‘ua oti a latou tane i le tufatufaina o mea i aso fai so‘o.
2. ‘Ona tala‘iina lea e le to‘asefulu ma le to‘alua o le to‘atele o le ‘au so‘o ‘ua fa‘apea atu, “E lē tatau ‘ona matou tu‘ua o le afioga a le Atua, ‘ae tufatufa i ‘oloa.
3. O lenei, le ‘au uso e, ‘inā filifili ia ni o ‘outou se to‘afitu e ta‘uleleia, e tūtūmu i le Agaga Pa‘ia ma le poto, ‘ia matou tofia i latou i lenei faiva.
4. A o i matou, matou te finafinau i le talotaloga ma le ‘au‘auna i le ‘upu.”
5. ‘Ua lelei fo‘i le ‘upu i le to‘atele uma lava; ‘ona filifili lea e i latou ‘iā Setefano, o le tagata ‘ua tumu i le fa‘atuatua ma le Agaga Pa‘ia ma Filipo, ma Pokoro, ma Nikanora, ma Timona, ma Pamena, ma Nikolao o le Anetioka sa lotu i le lotu a sa Iuta.
6. ‘Ua latou tu‘u atu ‘iā te i latou i luma o le ‘au ‘aposetolo; ‘ona tatalo lea ma fa‘ae‘e o latou lima i o latou luga.
7. ‘Ua tupu fo‘i le afioga a le Atua; ‘ua matua fa‘ato‘ateleina le ‘au so‘o i Ierusalema; ‘ua ‘ana‘ana fo‘i ositaulaga e to‘atele lava i le fa‘atuatua.
8. A o Setefano, ‘ua tumu o ia i le fa‘atuatua ma le mana, ‘ua na faia vāvega ma fa‘ailoga tetele i luma o le nu‘u.
9. ‘Ona tutū mai lea o isi o le sunako e tā‘ua o le sunako o tagata sa‘oloto, o Kurene fo‘i, ma Alesania, ma i latou mai Kilikia ma Asia, ‘ua fefinaua‘i ma Setefano.
10. ‘Ua lē mafaia fo‘i e i latou ‘ona tete‘e atu i le poto ma le Agaga ‘ua na tautala ai.
11. ‘Ona latou fai lemū atu lea i tagata, ‘ia latou molia o ia, ‘ia fa‘apea, “‘Ua matou fa‘alogo atu ‘iā te ia ‘ua fai ‘upu leaga ‘iā Mose ‘atoa ma le Atua.”
12. ‘Ua latou fa‘aoso i le nu‘u ma toeaina, ma le ‘au tusi‘upu; ‘ona tutū mai lea o i latou, ‘ua pu‘e ma ta‘ita‘i ane ‘iā te ia i le fono.
13. ‘Ua tu‘u atu fo‘i e i latou molimau pepelo, latou te fa‘apea atu, “E lē mapu lava lenā tagata i le fai ‘upu leaga i lenei mea pa‘ia ma le tulafono.
14. Auā ‘ua matou fa‘alogo ‘iā te ia, ‘ua fa‘apea mai, e fa‘aumatia e lenā Iesu o le Nasareta lenei mea, ma fa‘aliliu e ia tu sa tu‘uina mai e Mose ‘iā te i tatou.”
15. ‘Ua pulato‘a ‘iā te ia o i latou uma ‘ua nonofo i le fono, ‘ua iloa e i latou ona mata, ‘ua peiseaī o fofoga o se agelu.