Le mataupu

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14
  15. 15
  16. 16
  17. 17
  18. 18
  19. 19
  20. 20
  21. 21
  22. 22
  23. 23
  24. 24
  25. 25
  26. 26
  27. 27
  28. 28

Feagaiga Tuai

Feagaiga Fou

O Galuega 25 O LE TUSI PA'IA - Ekalesia Katoliko Roma (RSCB)

O le Moliaga o Paulo i luma o Feso

1. ‘Ua o‘o fo‘i Feso i lona itū mālō ‘ua mavae aso e tolu, ‘ona alu a‘e lea o ia nai Kaisareia i Ierusalema.

2. ‘Ona fa‘ailoa atu lea ‘iā te ia e le ositaulaga sili ma ali‘i o Iutaia ‘iā Paulo, ‘ua ole atu fo‘i i latou ‘iā te ia,

3. ma latou ‘ai‘oi ia alofa mai ma ‘a‘ami atu ‘iā te ia e sau i Ierusalema; o lamalama i latou e fasioti ‘iā te ia i le ala.

4. A ‘ua tali mai Feso, e leoleoina Paulo i Kaisareia, a o ia, e lē pine ‘ona alu atu i ai.

5. ‘Ua na fai atu fo‘i, “‘Ia ō ifo ni o ‘outou ali‘i, ma latou molia lenei tagata, pe ‘āfai o i ai se mea.”

6. ‘Ua nofo fo‘i o ia ‘iā te i latou i aso o sefulu ma ‘ona tupu, ‘ona alu ifo lea i Kaisareia; o le taeao ‘ua nofo ai o ia i le nofoa fa‘amasino, ma fai atu ia ta‘ita‘iina mai Paulo.

7. ‘Ua o‘o mai o ia, ‘ona vagavagai ai lea o Iutaia o ē na ō mai i Ierusalema, ‘ua molia Paulo i mea e tele ma le mamafa, ‘ua latou lē mafaia ‘ona fa‘amaoni.

8. ‘Ua fai atu Paulo i lana fa‘amatalaga, “‘Ua ‘ou lē agasala lava i le tulafono o Iutaia, po o le malumalu po o Kaisara.”

9. A o Feso, ‘ua loto o ia e fa‘afiafia atu i tagata Iutaia, ‘ua fai mai ai o ia ‘iā Paulo, “‘Ua e loto ‘ea ‘ina e alu a‘e i Ierusalema, ia fa‘amasinoina ai oe i nei mea i o‘u luma?”

10. ‘Ona fai atu lea o Paulo, “O lo‘o tu‘u nei a‘u i luma o le nofoa fa‘amasino o Kaisara, e tatau ‘ona fa‘amasinoina ai o a‘u; ‘ua ‘ou lē faia lava se mea lē tonu ‘iā Iutaia, ‘ua e matuā silafia lava.

11. Auā ‘āfai ‘ua ‘ou amioleaga, po ‘ua ‘ou faia se mea e tatau ‘ona ‘ou oti ai, ‘ou te lē musu lava ‘ina ‘ou oti; ‘ae ‘āfai e lē moni se tasi o ia mea ‘ua latou molia ai a‘u, e lē mafaia ‘ona tu‘uina atu o a‘u e se tasi ‘iā te i latou. ‘Ou te vala‘au ia Kaisara.”

12. ‘Ua fetautalatala‘i Feso ma ē pule, ‘ona tali mai lea o ia, “‘Ua e vala‘au ‘ea ‘iā Kaisara? ‘e te alu lava ‘iā Kaisara.”

O Paulo i luma o Akeripa ma Perenike

13. ‘Ua mavae isi aso, ‘ona ō mai lea o le tupu o Akeripa ma Perenike i Kaisareia e fealofani ma Feso.

14. ‘Ua tele aso o nonofo ai i lā‘ua, ‘ona fa‘ailoa atu lea e Feso i le tupu le tala ‘iā Paulo, na fa‘apea atu, “‘Ua tu‘u e Filiki le tasi tagata o fusifusia;

15. sa a‘u i Ierusalema fo‘i, na fa‘ailoa mai ai e le ‘au ositaulaga sili ma le ‘au toeaina o Iutaia, sa fa‘atoga mai fo‘i ia fa‘asala ‘iā te ia.

16. ‘Ona ‘ou tali atu ai lea ‘iā te i latou, e lē o le tu lea a Roma e tu‘u atu se tasi tagata ‘ia oti, se‘ia fesagai lē ‘ua molia ma ē na momoli ‘iā te ia, ma ‘ia faitalia o ia ‘ona fai mai o lana fa‘amatalaga i le mea ‘ua molia ai o ia.

17. ‘Ua o‘o mai fo‘i i latou ‘i‘inei ‘ua ‘ou lē fa‘atuai lava, ‘ua ‘ou nofo i le taeao i le nofoa fa‘amasino, ma fai atu ia ta‘ita‘iina mai le tagata.

18. Na tutū mai ē na molia o ia, ‘ua lē molimau mai e i latou se tasi o ia mea na ‘ou manatu i ai;

19. a ‘ua molia o ia e i latou i nisi su‘ega i la latou tapua‘iga, ma le tasi tagata e igoa ‘iā Iesu, ‘ua oti, ‘ua fai mai Paulo ‘ua ola o ia.

20. Na ‘ou masalo pe fa‘apefea le su‘ega i lea mea, ‘ona ‘ou fesili atu lea, po ‘ua loto o ia ‘ina alu atu i Ierusalema, ia fa‘amasinoina ai o ia i ia mea.

21. ‘Ona vala‘au atu lea o Paulo ia tāofia o ia ‘ina ‘ia fa‘amasinoina e Aokuso; ‘ona ‘ou fai atu lea ia leoleoina o ia, se‘ia ‘ou ‘auina atu o ia ‘iā Kaisara.”

22. ‘Ona fai mai lea o Akeripa ‘iā Feso, “‘Ou te fia fa‘alogo atu fo‘i a‘u i lenā tagata.”‘Ua fai atu o ia, “A taeao ‘e te fa‘afofoga ai ‘iā te ia.”

23. O le taeao fo‘i, ‘ua o‘o mai ai Akeripa ma Perenike, ma le fa‘alialia tele, ‘ua ulufale i le mea e fa‘alogo ai, ‘atoa ma ali‘i e pule i ‘au, ma ali‘i o le ‘a‘ai, ‘ona fai atu lea o Feso, ‘ona ta‘ita‘iina mai ai lea o Paulo.

24. ‘Ona fai atu lea o Feso, “Le tupu e Akeripa, ‘atoa ma ‘outou ali‘i uma o tatou o fa‘atasi nei, ‘ua ‘outou silasila i lenei tagata, ‘ua ‘ai‘oi mai ai ‘iā te a‘u le nu‘u uma o Iutaia i Ierusalema, ‘atoa fo‘i ma ‘i‘inei, ‘ua ‘alalaga mai e lē tatau ‘ona toe ola o ia.

25. A o a‘u ‘ou te lē iloa se mea ‘ua na faia e tatau ai le oti, ‘ua vala‘au fo‘i e ia nei lava ia Aokuso, ‘ua ‘ou manatu ai e momoli atu ‘iā te ia.

26. ‘Ua leai fo‘i se mea ‘ua ‘ou mautinoa ‘iā te ia e tusi atu ai i le ali‘i. O le mea lea ‘ua ‘ou ta‘ita‘i mai ai ‘iā te ia i o ‘outou luma, ‘ae maise oe na le tupu o Akeripa, ‘ina ‘ia ‘ou maua se mea e tusi atu ai, pe a uma ‘ona fa‘amasinoina.

27. Auā o lo‘u manatu e lē tusa ‘ona momoli atu o se tagata o fusifusia, ‘ae lē fa‘ailoa atu o mea ‘ua molia ai o ia.”