1. A o le tasi tagata o Anania lona igoa, ma Safaira lana avā, na ia fa‘atau atu le fanua.
2. ‘Ua tu‘u fa‘ananā fo‘i mā lā‘ua nisi mea o le tau, ‘ua iloa fo‘i e lana avā, ‘ua ‘aumaia fo‘i nisi mea ma tu‘u mai i le ‘au ‘aposetolo e pule.
3. A ‘ua fai atu Peteru, “Anania e, se a le mea ‘ua fa‘atumu ai e Satani lou loto ‘e te pepelo ai i le Agaga Pa‘ia, ma e tu‘u ai ma oe nisi mea o le tau o le fanua?
4. A o tumau e le‘i fa‘atauina, e lē o lou lava ‘ea? ‘Ua uma fo‘i ‘ona fa‘atauina, e le‘i i lau pule ‘ea? Se a le mea ‘ua tu‘u ai lenei mea i lou loto? ‘Ua e lē pepelo i tagata, a o le Atua.”
5. ‘Ua fa‘alogo Anania i ia ‘upu, ‘ona pa‘ū lea o ia i lalo, ‘ua tō lana manava; ‘ona o‘o ai lea o le mata‘u tele ‘iā te i latou uma o ē na fa‘alogo i nei mea.
6. ‘Ona tutū lea i luga o taulele‘a, ‘ua teuteu ‘iā te ia, ma ‘ave i fafo ‘ua tanu ai.
7. ‘Ua mavae atu ona itū aso pe tolu, i le ulufale mai ai lana avā, e le‘i iloa e ia le mea ‘ua faia.
8. ‘Ua fai atu Peteru ‘iā te ia, “Fai mai ‘iā te a‘u, pe na ‘oulua fa‘atau atu ‘ea le fanua i ia lava mea?”‘Ua fai mai o ia, “Ioe, o lea lava.”
9. ‘Ona fai atu lea o Peteru ‘iā te ia, “Se a le mea ‘ua ‘oulua loto gatasi ai e tofotofo i le Agaga o le Ali‘i? Fa‘auta, o tutū mai i le faitoto‘a i latou o ē na tanu lau tane, latou te ‘ave fo‘i ‘iā te oe i fafo.”
10. ‘Ona pa‘ū loa lea o ia i ona vae, ‘ua tō lana manava; ‘ua ulufale mai taulele‘a, ma latou iloa o ia ‘ua oti, ‘ona latou ‘ave lea ‘iā te ia i fafo, ‘ua tanu ai i tafatafa o lana tane.
11. ‘Ua o‘o fo‘i le mata‘u tele i le ekalesia uma lava, ma i latou uma o ē na fa‘alogo i nei mea.
12. ‘Ua faia e lima o le ‘au ‘aposetolo fa‘ailoga ma vāvega e tele i luma o le nu‘u. Sa i le fa‘apaologa o Solomona fo‘i i latou uma lava ma le loto gatasi.
13. A o isi tagata, ‘ua leai so latou ‘ua fa‘amalosi e fa‘atasi ma i latou; a ‘ua vi‘ia i latou e le nu‘u;
14. ‘ua atili ai ‘ona fa‘aopoopoina e le Ali‘i ē ‘ua fa‘atuatua, e to‘atele o tane ‘atoa ma fafine;
15. ‘ua o‘o ‘ina ‘aumai e i latou i ē mama‘i i malae, ma fa‘ata‘o‘oto ai i moega ma fata, tau lava ‘ina ‘ia fa‘apaoloina ai nisi o i latou i le ata o Peteru pe a ui ane o ia.
16. ‘Ua ō mai fo‘i le motu o tagata mai ‘a‘ai ‘ua vagavagai i Ierusalema, ‘ua ‘aumai e i latou lē ‘ua mama‘i ma ē ‘ua tigāina i agaga leaga, ‘ua fa‘amālōlōina i latou uma lava.
17. ‘Ona tutū lea i luga o le ositaulaga sili, ma i latou uma ‘ua ‘iā te ia, o le itū‘āiga lea a le au satukaio, ‘ua matuā matatau‘a lava i latou.
18. ‘Ua latou pupu‘e atu fo‘i i le ‘au ‘aposetolo, ma tu‘u atu ‘iā te i latou i le fale puipui o le nu‘u.
19. A ‘ua tō mai puipui o le fale e le agelu a le Ali‘i i le po, ‘ua na ta‘ita‘i ‘iā te i latou i fafo, ma fa‘apea atu,
20. “‘Inā ō ia ‘outou, ‘inā tutū i le malumalu ma tautala atu i le nu‘u i ‘upu uma lava o lenei Olataga.”
21. ‘Ua fa‘alogo ai i latou, ‘ona latou ulufale lea i le malumalu i le tafa o ata, ma a‘oa‘o ai.‘Ona sau lea o le ositaulaga sili ma i latou sa ‘iā te ia, ‘ua fa‘apotopoto e i latou le fono, ‘atoa ma le taupulega uma lava o le fānauga a Isaraelu, ‘ona ‘a‘au atu lea nisi i le fale puipui e ta‘ita‘i mai ‘iā te i latou.
22. ‘Ua o‘o atu ‘au‘auna, ‘ua latou lē maua ‘iā te i latou i le fale puipui; ‘ona toe fo‘i mai lea, ma tala mai,
23. ‘ua fa‘apea mai, “Na matou iloa le fale ‘ua puipui ma ‘ua mausalī lava, ma leoleo ‘ua tutū i fafo i luma o faitoto‘a; ‘ua matou ō atu, a ‘ua lē maua e i matou se tasi i totonu.”
24. ‘Ua fa‘alogo i nei ‘upu le ositaulaga, ma le ta‘ita‘i o le ‘au o le malumalu ‘atoa ma le ‘au ositaulaga sili, ‘ua latou māsalosalo i nei mea, pe i‘u i ni ā.
25. ‘Ona sau lea o le tasi, ma tala mai ‘iā te i latou, ‘ua fa‘apea mai, “Fa‘auta, o tagata sa ‘outou tu‘u i le fale puipui, o lo‘o i le malumalu i latou, o tutū ma a‘oa‘o atu i le nu‘u.”
26. ‘Ona alu lea o le ta‘ita‘i o le ‘au, o ia ma ‘au‘auna, ‘ua ta‘ita‘i mai ‘iā te i latou, ‘ae le‘i faia ma le fa‘amalosi; auā ‘ua fefefe i latou i le nu‘u, ‘ina ne‘i fetogia i latou i ma‘a.
27. ‘Ua latou ta‘ita‘i mai ‘iā te i latou, ‘ona tu‘u atu ai lea i luma o le fono; ‘ona fesili mai lea o le ositaulaga sili ‘iā te i latou,
28. ‘ua fa‘apea mai, “Pe na matou lē matuā fai atu ‘ea ‘iā te ‘outou ia sōia le toe a‘oa‘o i lenā igoa? Fa‘auta fo‘i, ‘ua ‘outou fa‘atumu i Ierusalema i la ‘outou a‘oa‘oga, ma ‘outou fia fa‘ao‘o mai i luga ‘iā i matou le toto o lenā tagata.”
29. ‘Ona tali atu lea o Peteru ma le ‘au ‘aposetolo ‘ua fa‘apea atu, “E tusa ‘ona sili o lo matou ‘ana‘ana i le Atua i lo matou ‘ana‘ana i tagata.
30. o le Atua o tatou tamā ‘ua na toe fa‘atū mai ‘iā Iesu, lē na fasiotia e ‘outou i lo ‘outou fa‘atautau i le la‘au.
31. O ia ‘ua ‘aveina a‘e e le Atua i lona ‘a‘ao taumatau o le Ali‘i i le ma le Fa‘aola, na te avatua ‘iā Isaraelu le salamō ma le fa‘amāgaloina o agasala.
32. O ana molimau fo‘i i ia mea o i matou, ‘atoa fo‘i ma le Agaga Pa‘ia, lē ‘ua foa‘iina atu e le Atua i ē ‘ana‘ana ‘iā te ia.”
33. ‘Ua fa‘alogo i latou, ‘ona matuā lotoa ai lea, ‘ua latou taupulepule e fasioti ‘iā te i latou.
34. ‘Ona tula‘i lea o le tasi faresaio i le fono, o Kamalielu le igoa, o lo a‘oa‘o i le tulafono, ‘ua vi‘ia e le nu‘u uma lava, ‘ua fai atu o ia: ‘Ia tu‘u atu le ‘au ‘aposetolo i fafo se‘ia toe itiiti ane.
35. ‘Ona fai atu lea o ia ‘iā te i latou, “‘Outou Isaraelu e, ia ‘outou ma mea a ‘outou faia i nei tagata.
36. Auā o aso ‘ua mavae na tu mai ai Tiuta, sa fai atu e sili lava o ia; na pipi‘i fo‘i ‘iā te ia o tagata pe to‘afaselau pe a faitauina; na fasiotia o ia, na ta‘ape‘ape fo‘i ma i‘u vale i latou uma lava ē na ‘ana‘ana ‘iā te ia.
37. ‘Ua mavae lea tagata, ‘ona tu mai lea o Iuta o le Kalilaia i ona po na tusia ai le nu‘u; ‘ua na ta‘ita‘i ‘ese le nu‘u e to‘atele ‘ua mulimuli ‘iā te ia; ‘ua oti fo‘i o ia, ‘ua fa‘asalalauina fo‘i i latou uma lava ē na ‘ana‘ana ‘iā te ia.
38. O lenei, ‘ou te fai atu ‘iā te ‘outou, fa‘amamao ia mai nei tagata, ma ia tu‘u pea ‘iā te i latou; auā ‘āfai na tupu mai tagata lenā sauniga ma lenā galuega, e fa‘aumatia ia.
39. ‘Ae ‘āfai ‘ua tupu mai le Atua, tou te lē mafai ‘ona fa‘aumatia; ‘ina ne‘i iloa ‘ua ‘outou fai tau‘a i le Atua lava.”
40. ‘Ua usiusita‘i i latou ‘iā te ia; ‘ua ‘a‘ami fo‘i le ‘au ‘aposetolo, ‘ua sasa ‘iā te i latou, ma fai atu, ia sōia le tautala i le igoa o Iesu; ‘ona tu‘uina atu lea ‘iā te i latou e ō.
41. ‘Ona ō lea o i latou nai luma o le fono, ‘ua ‘oli‘oli ‘ina ‘ua ta‘uaogāina i latou ia fa‘aleagaina ‘ona o lona suafa.
42. ‘Ua lē mapu fo‘i i latou i aso uma ‘ona a‘oa‘o atu ma tala‘i atu i le malumalu, ma lea fale ma lea fale le tala lelei ‘iā Iesu le Keriso.#