1. ‘Ua tuana‘i Amefipoli ma Apolonia, ‘ona o‘o lea o i lā‘ua i Tesalonia, ‘ua i ai le sunako o tagata Iutaia.
2. ‘Ua ulufale fo‘i Paulo, ‘iā te i latou, o lana lea masani, e tolu fo‘i sapati ‘ua lauga atu o ia ‘iā te i latou i Tusi,
3. ‘ua fa‘amatala ma fa‘asino atu, na tatau ‘ona tigā o le Keriso, ma toetū mai i ē ‘ua oti; ma ‘ua fa‘apea atu, “O Iesu lenei ‘ou te folafola atu ai ‘iā te ‘outou, o le Keriso ia.”
4. ‘Ua talitonu mai fo‘i nisi o i latou, ma ‘ua fa‘aopoopoina i latou ia Paulo ma Sila; o Eleni fo‘i o ē matata‘u i le Atua e to‘atele lava, sa‘o tama‘ita‘i e to‘atele fo‘i.
5. A o Iutaia e lē fa‘alogo ‘ua matatau‘a i latou, ‘ua fa‘atasi mai ‘iā te i latou nisi tagata leaga o ē tafafao vale, ‘ona fa‘anunununu lea e i latou, ma fa‘apisapisaō i le ‘a‘ai; ‘ona feosofi lea i le fale o Iasona, ‘ua sā‘ili ‘iā te i lā‘ua ia ta‘ita‘iina i fafo i le nu‘u.
6. E le‘i maua i lā‘ua, ‘ona fetoso mai lea e i latou ia Iasona ma nisi o le ‘au uso i le ‘au faipule o le nu‘u, o lo‘o ‘alalaga atu, “O tagata nei o ē ‘ua fa‘atupu le fouvale i le lalolagi uma, ‘ua latou o‘o mai fo‘i ‘i‘inei;
7. ‘ua talia i latou e Iasona. ‘Ua fa‘atu‘i‘ese fo‘i latou nei uma lava i poloa‘iga a Kaisara, ‘ua fai mai, o Iesu o le tasi lea tupu.”
8. ‘Ua latou fa‘atupu ai le atuatuvale i le motu o tagata ‘atoa ma le ‘au faipule o le nu‘u, o ē ‘ua fa‘alogo i nei mea.
9. ‘Ua tu‘utotogi i latou ia Iasona ma nisi, ‘ona tu‘u atu lea ‘iā te i latou e ō.
10. ‘Ona momoli atu loa lea o le ‘au uso ia Paulo ma Sila i le po i Perea; ‘ua o‘o i ai i lā‘ua, ‘ona la ulufale lea i le sunako o tagata Iutaia.
11. ‘Ua sili ‘ona amio lelei o i latou nei i tagata Tesalonia; auā ‘ua latou talia le ‘upu ma le fiafia tele, ‘ua sā‘ili i Tusi i lea aso ma lea aso, pe moni ia mea.
12. O le mea lea ‘ua talitonu ai i latou e to‘atele lava, ma sa‘o tama‘ita‘i Eleni, ‘atoa ma tane e to‘atele.
13. A ‘ua iloa e tagata Iutaia o i Tesalonia, ‘ua folafolaina le afioga a le Atua e Paulo i Perea, ‘ona ō atu ai lea o i latou, ma fa‘aoso i le motu o tagata i lea mea.
14. ‘Ona ‘a‘au atu loa lea e le ‘au uso ia Paulo, a latou ō ifo i tai; a ‘ua nonofo ai pea o Sila ma Timoteo.
15. O ē na momoli fo‘i ia Paulo ‘ua latou ō ma ia i Atenai; ‘ua poloa‘i mai fo‘i ‘iā te i latou e fai atu ia Sila ma Timoteo, ia vave mai lava i lā‘ua ‘iā te ia; ‘ona latou fo‘i lea.
16. ‘Ua fa‘atali atu Paulo ‘iā te i lā‘ua i Atenai, ‘ua tigā tele lona loto, o matamata o ia i le ‘a‘ai ‘ua tumu i tupua.
17. ‘Ua ia lauga fo‘i i le sunako ia Iutaia ma ē o matata‘u i le Atua, ‘ua tautala fo‘i ma ē na feiloa‘i ma ia i le malae i aso fai so‘o.
18. ‘Ona finafinau mai lea o isi o le ‘au fiapopoto o le itū‘āiga o Epikuro, ma le itū‘āiga o Setoiko; ‘ua fai mai fo‘i nisi, “Pe ala i se a le fai mai o lenei tagata si‘i i le lau?”A ‘ua fai mai isi, “‘Ai sē folafola mai i atua ‘ese; auā ‘ua na folafola atu ‘iā te i latou le tala lelei ia Iesu ma le toetū mai.”
19. ‘Ua ‘ave i latou ‘iā te ia, ‘ua ta‘ita‘i atu i Areopako, ‘ua fa‘apea mai, “Se‘i matou iloa pe se a lenei a‘oa‘oga fou ‘ua e tautala a‘i?
20. Auā ‘ua e molia mai nisi mea ‘ese i o matou nei taliga; o lea ‘ua matou fia iloa ai pe se a le uiga o nei mea.”
21. Auā ‘ua leai se isi mea ‘ua faia e tagata Atenai uma ‘atoa ma tagata ‘ese e āumau ai, na ‘ona tala atu ma fa‘alogo mai i sina tala fou.
22. ‘Ona tu atu ai lea o Paulo i Areopako, ‘ua fa‘apea atu o ia, “O ‘outou Atenai e, ‘ua ‘ou iloa i mea uma lava ‘ua sili la ‘outou tapua‘i i atua.
23. Auā na ‘ou ui ane, ma ‘ou matamata ‘iā ‘outou mea pa‘ia, ‘ona ‘ou iloa atu lea o fata ‘ua tusi i ai, ‘MO LE ATUA E LĒ ILOA.’ O lenei, o ia ‘ua ‘outou tapua‘i i ai ma le lē iloa, ‘ou te fa‘ailoa atu ai ‘iā te ‘outou.
24. O le Atua na faia le lalolagi ma mea uma lava o i ai, ‘ona o le Ali‘i o ia o le lagi ma le lalolagi, e lē afio o ia i malumalu o faia e lima;
25. e lē o lima o tagata e ‘au‘auna ai ‘iā te ia, peiseaī ‘ua mativa o ia i se mea e tasi; o lo‘o foa‘i mai e ia le ola, ma le mānava, ma mea uma lava i le vao mea ‘atoa;
26. ‘ua faia fo‘i o ia nu‘u uma o tagata i le toto e tasi, ia nonofo i le fogā‘ele‘ele uma lava, ‘ua na tu‘u fo‘i tausaga na tofia anamua, ma tuā‘oi o mea latou te nonofo ai;
27. ‘ina ‘ia latou sā‘ili i le Ali‘i, pe mafai ‘ona latou tautāgotago ma latou iloa o ia; ‘ae peita‘i e lē mamao o ia ma i tatou ta‘ito‘atasi.
28. Auā ‘O ia o lo‘o ola ai i tatou, ma gāoioi ai, o lo‘o i ai fo‘i i tatou ‘ona o ia;’ pei ‘ona fai mai fo‘i e isi o ‘outou fatu pese,‘Auā o lana fānau i tatou.’
29. O lenei, ‘ona o fānau a le Atua i tatou, e lē tatau ‘ona tatou manatu ‘ua tusa le Atua i se auro, po o se ario, po o se ma‘a, ‘ua talaiia i le faiva ma le fuafua o le tagata.
30. Na fa‘apalepale le Atua i ona po o le valea; a o lo‘o fetalai mai nei i tagata uma i nu‘u uma lava ia salamō;
31. auā ‘ua fa‘atūina e ia le aso e fa‘amasinoina ai le lalolagi ma le tonu, e le tagata ‘ua tofia e ia; o lo‘o fa‘amaoni mai ai e ia i tagata uma lava i lona toe fa‘atū mai ‘iā te ia i ē ‘ua oti.”
32. ‘Ua fa‘alogo i latou i le toetū mai o ē ‘ua oti, ‘ona tauemu mai ai lea o isi, a ‘ua fai mai isi, “Matou te toe fia fa‘alogo atu ‘iā te oe i lenā ‘upu.”
33. ‘Ona alu atu lea o Paulo nai o latou luma.
34. A ‘ua pipi‘i mai nisi tagata ‘iā te ia, ma ‘ua talitonu mai; e i ai Taionusio le Areopako, ma le fafine ‘ua igoa ia Tamari, o isi fo‘i fa‘atasi ma i lā‘ua.