1. O ona po ia na pupu‘e ai e le tupu o Herota nisi o le ekalesia ‘ina ‘ia fa‘asauā i ai.
2. ‘Ua na fasioti fo‘i ‘iā Iakopo le uso o Ioane i le pelu.
3. ‘Ua iloa fo‘i e ia ‘ua fiafia ai Iutaia, ‘ona fa‘asosolo ai lea ‘ona pu‘e ‘iā Peteru lava. (O ona aso ia o areto e lē fa‘afefeteina)
4. ‘Ua pu‘e ‘iā te ia ‘ona tu‘u ai lea i le fale puipui, ma tu‘uina atu i tagata tau e ta‘ito‘afa i vasega e fa e leoleo ‘iā te ia; ‘ua manatu ia e ta‘ita‘i ane ‘iā te ia i le nu‘u pe a mavae le paseka.
5. O lenei, ‘ua leoleoina Peteru i le fale puipui; a ‘ua faia le tatalo fa‘atauānau i le Atua e le ekalesia mo ia.
6. ‘Ua o‘o ‘ina a ta‘ita‘i o Herota ‘iā te ia i fafo, o lea lava po na moe ai Peteru i le vā o tagata tau e to‘alua, ‘ua noanoatia o ia i maea u‘amea e lua; o leoleo fo‘i i luma o le faitoto‘a, ‘ua leoleo i latou i le fale puipui.
7. Fa‘auta fo‘i, o le agelu a le Ali‘i ‘ua tu mai, ‘ua pupula mai fo‘i le malamalama i le fale; ‘ua na tā ‘iā Peteru i lona itū, ma fafagu ‘iā te ia, ‘ua fa‘apea atu, “‘Inā tu ia i luga, ia vave.” ‘Ona pa‘u‘ū ifo lea o maea u‘amea nai ona lima.
8. ‘Ua fai atu le agelu ‘iā te ia, “Fusi ia ou ‘ofu, ma fa‘amau ifo ou se‘evae.” ‘Ua fa‘apea fo‘i ‘ona faia e ia. ‘Ua na fai atu fo‘i ‘iā te ia, “‘Inā pulupulu ia lou ‘ofu, ma mulimuli mai ‘iā te a‘u.”
9. ‘Ona alu lea o ia i fafo, ‘ua mulimuli atu ‘iā te ia; ‘ua lē iloa e ia ‘ua moni le mea ‘ua faia e le agelu; sa manatu o ia ‘ua va‘aia se fa‘aaliga.
10. ‘Ua mavae i tua ‘iā te i lā‘ua le mua‘i leoleoga ma lona lua, ‘ona o‘o lea o i lā‘ua i le puipui u‘amea e ō atu ai i le ‘a‘ai; ‘ua matala fua lea ‘iā te i lā‘ua; ‘ona la ō atu lea i fafo, ma savali atu i le ala, e tasi; ‘ona tu‘ua loa lea o ia e le agelu.
11. ‘Ua fa‘ato‘ā mau manatu ai Peteru, ‘ona fa‘apea lea o ia, “‘Ua ‘ou iloa nei, e moni, ‘ua ‘auina mai e le Ali‘i lana agelu, ma na lavea‘i mai o ia ‘iā te a‘u a‘i le lima o Herota, ma le fa‘atuatuaga uma lava o le nu‘u o Iutaia.”
12. ‘Ua mafaufau ai o ia, ‘ona alu lea i le fale o Maria le tinā o Ioane ‘ua igoa ‘iā Mareko; e to‘atele sa fa‘apotopotoina ai, ma latou tatalo.
13. ‘Ua tu‘itu‘i atu fo‘i Peteru i faitoto‘a o le fale, ‘ona sau lea o le tasi teine, o Rosa lona igoa, na te asia mai.
14. ‘Ua iloa fo‘i e ia le leo o Peteru, ‘ua lē tatalaina le faitoto‘a ‘ona o le ‘oli‘oli, a ‘ua momo‘e i le fale, ma fai atu ‘ua tu mai Peteru i le faitoto‘a.
15. ‘Ua fai mai latou ‘iā te ia, “‘Ua e valea.” A ‘ua finau atu pea o ia, e moni lava. ‘Ona fa‘apea mai lea o i latou, “O lana agelu ia.”
16. A ‘ua tu‘itu‘i atu pea Peteru; ‘ona tatala lea e i latou, ‘ua iloa atu ‘iā te ia, ‘ona matuā ofo ai lea o latou.
17. A ‘ua tālo atu o ia i lona lima ‘iā te i latou sōia le tautala, ‘ona fa‘amatala atu lea e ia ‘iā te i latou lona ta‘ita‘iina mai e le Ali‘i nai le fale puipui. ‘Ua na fai atu fo‘i, “‘Ia ‘outou tala atu ia mea ‘iā Iakopo ma le ‘au uso.” ‘Ona alu atu lea o ia i fafo, ‘ua alu i le tasi mea.
18. ‘Ua ao, ‘ona tele ai lea o le atuatuvale o tagata tau, pe na fa‘apefea Peteru.
19. ‘Ua sā‘ili fo‘i e Herota ‘iā te ia, ‘ua lē maua, ‘ona fa‘amasino lea o ia i leoleo, ma fai atu ‘ia ta‘ita‘iina i latou ia oti.‘Ona alu lea o ia nai Iutaia i Kaisareia, ‘ua nofo ai.
20. ‘Ua ita tele Herota ‘iā Turo ma Saitonu; a ‘ua latou ō mai ‘iā te ia ma le loto gatasi, ‘Ua latou fa‘aoleole atu fo‘i ‘iā Pāso le leoleo i le tofaga o le tupu, ‘ona latou ole atu lea ia toe lelei ma ia; auā na fagaina lo latou nu‘u e le nu‘u o le tupu.
21. O le aso fo‘i na ‘atofaina, ‘ua ‘ofu ai Herota i ona ‘ofu fa‘atupu, ma nofo i le nofoāli‘i, ‘ua lauga atu ‘iā te i latou.
22. ‘Ona ‘alalaga lea o le nu‘u, “O le si‘ufofoga o se atua, ‘ae lē se leo o se tagata.”
23. ‘Ona taia loa lea o ia e le agelu a le Ali‘i, auā ‘ua lē avatu o ia le vi‘iga i le Atua; ‘ona ‘ati olaina lea o ia i anufe ‘ua oti ai.
24. A ‘ua tupu le afioga a le Atua ma ‘ua fa‘ateleina.
25. ‘Ua toe fo‘i mai Panapa ma Saulo nai Ierusalema, ma ‘ua uma o la la fe‘au, ‘ua latou ō mai ma Ioane ‘ua igoa ‘iā Mareko.