1. Sa i le ekalesia i Anetioka o nisi perofeta ma a‘oa‘o; o Panapa, ma Simeona ‘ua igoa ‘iā Nikeru, ma Lukio le Kurene, o Manaena sa tausia fa‘atasi o ia ma Herota le tupu, ‘atoa ma Saulo.
2. O latou o ‘au‘auna i le Ali‘i ma anapopogi, ‘ona fetalai mai lea o le Agaga Pa‘ia, “Totofi ia mo a‘u o Panapa ma Saulo i le galuega ‘ua ‘ou vala‘auina ai i lā‘ua.”
3. ‘Ona anapopogi lea o i latou ma tatalo, ma fa‘ae‘e o latou lima ‘iā te i lā‘ua, ‘ona tu‘uina atu lea o i lā‘ua e ō.
4. O lenei, ‘ua ‘a‘auina nei tagata e le Agaga Pa‘ia, ‘ona ō lea o i lā‘ua i Selukeia; ‘ua folau atu nai lea mea i Kuperu.
5. ‘Ua i Salamina, ‘ona la folafola ai lea o le afioga a le Atua i sunako o tagata Iutaia; ‘ua ‘au‘auna fo‘i Ioane Mareko ‘iā te i lā‘ua.
6. ‘Ua latou so‘o i le motu, ‘ua o‘o atu i Pafo, ‘ua iloa ai e i latou le tasi taulāitu, o le perofeta pepelo, o le Iutaia, o Paiesu lona igoa;
7. sa i ai o ia i le suikonesula, o Sekio Paulo, o le tagata fa‘autauta lea; na ‘a‘ami lenei tagata ‘iā Panapa ma Saulo, ‘ua mana‘o i le fia fa‘alogo i le afioga a le Atua.
8. A o Elima le taulāitu, (auā o le uiga lea o lona igoa,) ‘ua tete‘e mai o ia ‘iā te i lā‘ua, ‘ua fia fa‘aliliu ‘ese atu e ia i le suikonesula i le fa‘atuatua.
9. A o Saulo, o Paulo fo‘i lea, ‘ua tumu o ia i le Agaga Pa‘ia, ‘ua pulato‘a ‘iā te ia.
10. ‘Ona fa‘apea atu lea o ia, “O oe na ‘ua tumu i le pepelo uma ma le ulavale uma, o le atali‘i o le tiapolo, o ‘ino‘ino i le amiotonu uma lava; ‘e te lē se‘i sōia ‘ea lou fa‘api‘opi‘o i ala tonu o le Ali‘i?
11. Fa‘auta nei, o le a o‘o ‘iā te oe le ‘a‘ao o le Ali‘i, e tauaso oe, ‘e te lē va‘ai i le lā mo sina taimi.”‘Ona pa‘ū loa lea ‘iā te ia o le popogi ma le pouliuli; ‘ona fealua‘i lea o ia ma sā‘ili ni tagata e ta‘ita‘i ‘iā te ia.
12. ‘Ua iloa fo‘i e le suikonesula le mea na faia, ‘ona fa‘atuatua lea o ia, ‘ua matuā ofo i le a‘oa‘oga a le Ali‘i.
13. ‘Ua tu‘uva‘a atu Paulo ma lana ‘au malaga i Pafo, ‘ua o‘o i latou i Pereka i Pafulia; ‘ua tu‘ua fo‘i i lā‘ua e Ioane, ‘ua toe fo‘i o ia i Ierusalema.
14. ‘Ua tu‘ua fo‘i Pereka e i lā‘ua, ‘ona la o‘o lea i Anetioka i Pisitia, ‘ua ulufale i lā‘ua i le sunako i le aso sapati, ‘ua nonofo i lalo.
15. ‘Ua uma fo‘i ‘ona faitau i le tulafono ma, perofeta, ‘ona ‘a‘au atu lea o ē ‘ua pule i le sunako nisi ‘iā te i lā‘ua, ‘ua fa‘apea atu, “Sema e, le uso e, ‘āfai ‘ua ‘iā te ‘oulua se ‘upu fa‘amafanafana i le nu‘u nei, ‘inā fai mai ia.”
16. ‘Ona tu lea o Paulo i luga, ma tālo atu lona lima, ‘ua fa‘apea atu,“‘Outou Isaraelu e, ma ‘outou o ē matata‘u i le Atua, fa‘afofoga mai ia.
17. O le Atua o lenei nu‘u o Isaraelu na filifilia e ia o tatou tamā, ‘ina ‘ua fa‘aeaina le nu‘u ‘ina o āumau i latou i le nu‘u o Aikupito, ‘ua ia ta‘ita‘i ‘ese atu ai fo‘i ‘iā te i latou i le ‘a‘ao malosi.
18. ‘Ua ia ‘onosa‘i fo‘i ‘iā latou amio i le vao i ona tausaga pe fagafulu.
19. ‘Ua uma fo‘i ‘ona olopalaina e ia o nu‘u e fitu i le lau‘ele‘ele o Kanana, ‘ona tu‘uina atu lea e ia o le lau‘ele‘ele e fai mo o latou tofi i tausaga pe fa o selau ma le limasefulu.
20. ‘Ua mavae fo‘i o ia mea, ‘ona tu‘u atu lea e ia o fa‘amasino mo i latou, e o‘o lava i le perofeta o Samuelu.
21. Mulimuli ane ‘ua latou fa‘atoga i se tupu; ‘ona tu‘u atu lea e le Atua ‘iā te i latou o Saulo, le atali‘i o Kiso, o le tagata o le itū‘āiga o Peniamina i tausaga e fasefulu.
22. ‘Ua na ‘ave ‘ese fo‘i ‘iā te ia, ‘ona fa‘atūina lea e ia o Tavita e fai mo latou tupu; ‘ua ia molitino fo‘i ‘iā te ia, ‘ua fa‘apea ane, ‘‘Ua ‘ou maua Tavita le atali‘i o Iese, o le tagata e tusa ma lo‘u nei loto, na te faia o mea uma lava ‘ou te mana‘o i ai.’
23. O le ‘āiga o lenei tagata ‘ua fa‘atūina ai e le Atua ia Isaraelu le Fa‘aola o Iesu, pei ‘ona folafolaina e ia.
24. A o le‘i maliu mai o ia, ‘ua tala‘i atu e Ioane le papatisoga o le salamō i le nu‘u o Isaraelu uma lava.
25. ‘Ua fai mai Ioane a o fa‘auma e ia lona faiva, ‘O ai ‘ea a‘u nei i o ‘outou manatu? E lē o ia a‘u nei. ‘Ae peita‘i, fa‘auta mai o lo‘o mulimuli mai le tasi, ‘ou te lē aogā ‘ona ‘ou tatala i lona se‘evae.’
26. “Sema e, le ‘au uso e, o fānau a sa Aperaamo, ‘atoa ma ē o matata‘u i le Atua o ‘iā te ‘outou, ‘ua molia mai le ‘upu o lenei olataga ‘iā te ‘outou.
27. Auā o i latou o ē nonofo i Ierusalema, ma o latou ali‘i, ‘ina ‘ua lē iloa e i latou o ia, ma ‘upu a le ‘au perofeta, ‘ua faitauina i lea sapati ma lea sapati, ‘ua taunu‘u ai ‘iā te i latou i lo latou fa‘asala ‘iā te ia.
28. E ui lava ‘ina ‘ua lē maua e i latou se mea e tatau ‘ona oti ai o ia, a ‘ua latou fai atu ‘iā Pilato ia fasiotia o ia.
29. ‘Ua fa‘ai‘u fo‘i e i latou mea uma lava na tusia ‘iā te ia, ‘ona ‘ave ifo lea e i latou ‘iā te ia i le la‘au, ‘ua tu‘u i le tu‘ugamau.
30. Auā ‘ua toe fa‘atū mai e le Atua ‘iā te ia mai ē ‘ua oti;
31. e tele aso na iloa ai o ia e tagata na ō a‘e ma ia nai Kalilaia i Ierusalema; o ana molimau i latou i le nu‘u.
32. ‘Ua ma folafola atu fo‘i le tala lelei ‘iā te ‘outou i le mea na folafolaina atu i o tatou tamā;
33. na fa‘ao‘o lea e le Atua ‘iā te i tatou o a latou fānau, i lona toe fa‘atūina o Iesu; pei ‘ona tusia fo‘i i le salāmo e lua,‘O lo‘u Atali‘i oe,na fānaua oe e a‘u i le aso nei.’
34. ‘Ona ‘ua toe fa‘atūina mai o ia e le Atua nai ē ‘ua oti, ‘ia lē toe fo‘i atu lava i le mea e pala ai, o lea ‘ua fa‘apea ‘ona fetalai mai ai o ia,‘‘Ou te foa‘i atu ‘iā te ‘outou mea pa‘ia a Tavita’‘ua fa‘amaoni lava.
35. O le mea fo‘i lea ‘ua fetalai mai ai o ia i le tasi salāmo, ‘‘E te lē tu‘u atu lou Tagata Pa‘ia ‘ia o‘o i ai le pala.’
36. O Tavita fo‘i, ‘ina ‘ua uma ‘ona ‘au‘auna i le finagalo o le Atua i lona lava tupulaga, ‘ua moe o ia, ma ‘ua fa‘atasiina atu i ona tamā, ‘ua o‘o fo‘i ‘iā te ia le pala.
37. A o lē na toe fa‘atūina mai e le Atua, ‘ua lē o‘o ‘iā te ia le pala.
38. O lenei, sema e, le ‘au uso e, ‘ia ‘outou iloa ‘ua folafolaina ‘iā te ‘outou le fa‘amāgaloina o agasala ‘ona o lenei tagata;
39. o tagata uma fo‘i o ē fa‘atuatua e ta‘uamiotonuina i latou ‘iā te ia i mea uma lava na lē mafai ‘ona ta‘uamiotonuina ai ‘outou i le tulafono a Mose.
40. O lenei, ia ‘outou, ne‘i o‘o ‘iā te ‘outou le mea ‘ua fai mai ai perofeta:
41. ‘O ‘outou o ē ‘ino‘ino, ‘inā va‘ai mai ia, ma ofo, ma mou ia;auā ‘ou te faia lava e a‘u se galuega i ona aso o ‘outou,o le galuega e ui ‘ina fa‘amatalaina ai ‘iā te ‘outou e se tasi, tou te lē talitonu i ai.’”
42. ‘Ua ō i latou i fafo o le sunako o tagata Iutaia, ‘ona fa‘atoga atu lea o le ‘au lotu ‘ina ‘ia folafolaina mai ia ‘upu ‘iā te i latou i le sapati atalī.
43. ‘Ua tu‘ua le fa‘apotopotoga, ‘ona mulimuli lea ia Paulo ma Panapa o tagata o to‘atele o Iutaia ma ē ‘ua lotu ‘ua matata‘u i le Atua; ‘ua la tautala atu, ma apoapoa‘i ‘iā te i latou, ‘ina ‘ia tumau i le alofa tunoa o le Atua.
44. ‘Ua o‘o i le sapati ‘ona tāli ō uma mai lea o le nu‘u e fa‘alogo i le afioga a le Atua.
45. ‘Ua iloa e Iutaia le motu o tagata, ‘ona matuā matatau‘a lea o i latou, ma latou ‘upu ‘ese mai i mea ‘ua fai atu ai Paulo, ‘ua ‘upu ‘ese ma ‘upu leaga ‘iā te ia.
46. ‘Ona fa‘amalosi atu lea o Paulo ma Panapa, ‘ua fa‘apea atu, “‘Ua tatau lava ‘ona mā mua‘i folafolaina atu le afioga a le Atua ‘iā te ‘outou; a ‘ua ‘outou tete‘e mai ai, ma ‘ua ta‘ulēaogāina ‘outou e ‘outou i le ola e fa‘avavau, fa‘auta, o le mea lea ma te liliu atu ai i tagata o nu‘u ‘ese.
47. Auā ‘ua fa‘apea ‘ona poloa‘i mai o le Ali‘i ‘iā te i matou, ‘‘Ua ‘ou tofia oe e fai ma malamalama o nu‘u ‘ese,‘ina ‘ia ‘avea oe ma fa‘aolataga e o‘o i le tulu‘iga o le lalolagi.’”
48. ‘Ua fa‘alogo tagata o nu‘u ‘ese ‘ona ‘oli‘oli ai lea, ma vivi‘i atu i le afioga a le Ali‘i; ‘ua fa‘atuatua fo‘i i latou uma lava ē ‘ua saunia i le ola fa‘avavau.
49. ‘Ua logo atu fo‘i le afioga a le Ali‘i i lea nu‘u uma lava.
50. A ‘ua fa‘alalo ane e Iutaia i fafine e matata‘u i le Atua, ma sa‘o tama‘ita‘i, ma sa‘o ali‘i o le ‘a‘ai, ma latou fa‘atupu le sauāga ‘iā Paulo ma Panapa, ma tutuli atu ‘iā te i lā‘ua i lo latou tuā‘oi.
51. A ‘ua tūtū atu e lā‘ua le ‘ele‘ele nai o lā‘ua vae ‘iā te i latou, ‘ona ō atu ai lea o i lā‘ua i Ikonio.
52. A ‘ua tūtūmu le ‘au so‘o i le ‘oli‘oli ma le Agaga Pa‘ia.