1. ‘Ua fetalai mai fo‘i le ALI‘I ‘iā Mose, ‘ua fa‘apea mai:
2. ‘Ia e fai atu i le fānauga a Isaraelu, ‘ia fa‘apea atu ‘iā te i latou, o le tane po o le fafine o lē na te vavae mai o ia e ia o tautō i le tautoga o le naseri, ‘ina ‘ia vavae mai o ia e ia mo le ALI‘I.
3. ‘Ia sa lava ‘iā te ia le uaina ma le ‘ava, ‘aua ne‘i inu le vineka e faia i le uaina po o le vineka e faia i le ‘ava ‘aua ne‘i inu fo‘i le sua o le fua o le vine, ‘aua ne‘i ‘ai fo‘i o ia le fua o le vine pe mata pe mago.
4. O ona po uma lava e fai ai o ia ma naseri ‘aua ne‘i ‘ai lava ia se mea e tasi e faia i le vine e fai a‘i le uaina, o fatu ‘atoa ma pa‘u.
5. O ona po uma lava o lona tautoga fa‘anaseri e lē o‘o lava se tafi i lona ulu; e pa‘ia lava o ia, se‘ia uma ona po e vavae mai ai o ia e ia mo le ALI‘I, ‘ia tutupu pea ona fuafuati lauulu.
6. O ona po uma fo‘i o vavae mai ai o ia e ia mo le ALI‘I, ‘aua ne‘i papa‘i atu o ia i se tagata oti.
7. ‘Aua ne‘i leaga o ia ‘ona o lona tamā, po o lona tinā, po o lona uso, po o lona tuafafine, pe a latou oti; auā o lo‘o i luga o lona ulu le fa‘anaseri mo lona Atua.
8. O ona po uma e fai ai o ia ma naseri e pa‘ia lava o ia mo le ALI‘I.
9. ‘Āfai fo‘i e oti fa‘afuase‘i se tasi tagata i ona tafatafa, ma ‘ua leaga ai lona ulu fa‘anaseri, ‘ona tafi ai lea e ia o lona ulu i le aso o lona fa‘amamāina, o le aso fitu na te tafi ai.
10. O le aso valu fo‘i na te ‘aumai ai le uluga manutagi, po o tama‘i lupe e lua fua i le ositaulaga i le faitoto‘a o le fale fetāfa‘i o le fa‘apotopotoga;
11. ‘ona osia ai lea e le ositaulaga, o le tasi e fai ma taulaga mo le agasala, ma le tasi e fai ma taulaga mū na te faia fo‘i le togiola mo ia, ‘ina ‘ua agasala o ia ‘ona o le tagata oti, e fa‘apa‘iaina fo‘i e ia lona ulu i lea lava aso.
12. ‘Ona fa‘asā ai lea e ia mo le ALI‘I o po e fai ai o ia ma naseri, e avatu fo‘i e ia o le tama‘i mamoe e tasi lona tausaga e fai ma taulaga mo le sesē; a o po na muamua e lē taulia lava ia, auā ‘ua leaga lona naseri.
13. O le tulafono lenei o le naseri: O le aso e ‘atoa ai po sa fai ai o ia ma naseri e ‘aumai ai o ia i le faitoto‘a o le fale fetāfa‘i o le fa‘apotopotoga;
14. ‘ona avatu ai lea e ia o lana taulaga i le ALI‘I, o le tama‘i mamoe po‘a e tasi, e tasi lona tausaga, e sao ‘ona lelei, e fai ma taulaga mū; o le tama‘i mamoe fafine fo‘i e tasi, e tasi lona tausaga, e sao ‘ona lelei, e fai ma taulaga mo le agasala; o le mamoe po‘a fo‘i e tasi, e sao ‘ona lelei, e fai ma taulaga fa‘afetai.
15. O le ‘ato fo‘i o areto e le‘i fa‘afefeteina, o pōtoi falaoa lelei ‘ua palua ma le u‘u, o fa‘apāpā fo‘i o areto e le‘i fa‘afefeteina ‘ua nini i le u‘u, o la latou o taulaga fo‘i i mea e ‘ai ma la latou taulaga i mea e inu.
16. E ‘aveina atu ai fo‘i e le ositaulaga i luma o le ALI‘I, na te fai ai fo‘i lana taulaga mo le agasala, ma lana taulaga mū;
17. o le mamoe po‘a fo‘i na te fai a‘i le taulaga fa‘afetai i le ALI‘I, e fa‘atasi ma ‘ato o areto e le‘i fa‘afefeteina; e faia fo‘i e le ositaulaga lana taulaga i mea e ‘ai, ma lana taulaga i mea e inu.
18. ‘Ona tafi ai lea e le naseri o lona ulu fa‘anaseri i le faitoto‘a o le fale fetāfa‘i o le fa‘apotopotoga, e ‘ave fo‘i e ia le lauulu o lona ulu fa‘anaseri, ma tu‘u ai i le afi o lo‘o i lalo o le taulaga fa‘afetai.
19. ‘Ona tago ai lea o le ositaulaga i le ālagalima o le mamoe po‘a ‘ua tunu, ma le pōtoi areto e lē fa‘afefeteina e tasi nai le ‘ato, ma le fa‘apāpā e lē fa‘afefeteina e tasi, na te fa‘ae‘e ai fo‘i i alofilima o le naseri, pe a uma ‘ona tafi o lona ulu fa‘anaseri.
20. ‘Ona lūlūina ai lea e le ositaulaga, o le taulaga lūlū lea i luma o le ALI‘I; o le mea pa‘ia lea mā le ositaulaga, i le ma le fatafata e lūlūina ‘atoa ma le ālagalima e si‘itia; e mulimuli ane ‘ona mafai lea ‘ona inu uaina e le naseri.
21. O le tulafono lea i le naseri o lē ‘ua tautō, ma lana taulaga i le ALI‘I ‘ona o lona fa‘anaseri, e fa‘aopoopoina ia mea i le mea e maua e ia; e tusa ma lana tautoga na ia tautō ai, ia fa‘apea lava ‘ona faia e ia e tusa ma le tulafono i lona fa‘anaseri.
22. ‘Ua fetalai mai fo‘i le ALI‘I ‘iā Mose, ‘ua fa‘apea mai:
23. ‘Ia e fai atu ‘iā Arona ma ona atali‘i, ‘ia fa‘apea atu, ‘Ia fa‘apenei ‘ona ‘outou fa‘amanuia atu i le fānauga a Isaraelu, ‘ia fa‘apea atu ‘iā te i latou,
24. ‘Ia fa‘amanuia oe e le ALI‘I, ma ‘ia na tausi ‘iā te oe;
25. ‘ia fa‘amalamalamaina e le ALI‘I ona fofoga i luga ‘iā te oe, ma alofa atu ‘iā te oe;
26. ‘ia fa‘asaga mai le ALI‘I ona fofoga ‘iā te oe ma tu‘uina atu ‘iā te oe le manuia.
27. Latou te ta‘u atu fo‘i lo‘u igoa i luga o le fānauga a Isaraelu; o a‘u fo‘i ‘ou te fa‘amanuia atu ‘iā te i latou. #