1. ‘Ua fetalai mai fo‘i le ALI‘I ‘iā Mose i le ‘ele‘ele laugatasi o Moapi, e latalata ane i Ioritana, e fesagai ma Ieriko, ‘ua fa‘apea mai:
2. ‘Ia e fai atu i le fānauga a Isaraelu latou te tu‘uina atu i sa Levī, ma le tofi latou te maua, o ‘a‘ai latou te nonofo ai; e tu‘uina atu fo‘i e ‘outou i sa Levī o tuāfanua o ‘a‘ai e si‘osi‘o ai.
3. ‘Ia fai fo‘i o ia ‘a‘ai mo latou, latou te nonofo ai; o latou tuāfanua e fai mo a latou povi, ma a latou mea, ‘atoa ma a latou manu uma.
4. O tuāfanua fo‘i e si‘osi‘o ai ia ‘a‘ai tou te tu‘uina atu i sa Levī, e amata atu i le pā o le ‘a‘ai, e o‘o i le mea e gata mai ai le afe o kupita.
5. Tou te fuafua e amata atu i tua o le ‘a‘ai i le itū i sasa‘e e lua afe o kupita, ma le itū i saute e lua afe o kupita, o le itū fo‘i i sisifo e lua afe o kupita, ma le itū i matū e lua afe o kupita; ‘ae tuloto le ‘a‘ai; o tuāfanua ia o ‘a‘ai mo i latou.
6. O ‘a‘ai fo‘i tou te tu‘uina atu i sa Levī ia i ai ‘a‘ai e ono e fai ma sulufa‘iga, tou te tu‘uina atu ai e sola i ai lē na te fasioti se tasi; tou te fa‘aopoopoina fo‘i i ai o ‘a‘ai e fagafulu ma le lua.
7. O ‘a‘ai uma tou te tu‘uina atu i sa Levī e fagafulu ma le valu ia; o i latou ma o latou tuāfanua.
8. O ‘a‘ai fo‘i tou te tu‘uina atu mai ‘a‘ai o le fānauga a Isaraelu; o ē ‘ua i ai ‘a‘ai e tele tou te vāea mai ia tele, a o ē ‘ua itiiti o latou ‘a‘ai, tou te vāea mai ‘ia itiiti; e ta‘ito‘atasi ma avatu ni ona ‘a‘ai i sa Levī, ‘ia fa‘atatau ma lona tofi ‘ua maua.
9. ‘Ua fetalai mai fo‘i le ALI‘I ‘iā Mose, ‘ua fa‘apea mai:
10. ‘Ia e fai atu i le fānauga a Isaraelu, ‘ia fa‘apea atu ‘iā te i latou, Pe a ‘outou sopo‘ia atu Ioritana i le nu‘u o Kanana,
11. ‘ona tofia lea e ‘outou o ‘a‘ai e fai ma ‘a‘ai o sulufa‘iga ‘iā te ‘outou; ‘ina ‘ia sola i ai o lē fasioti tagata o lē ‘ua pa‘ivalea ai se tasi ‘iā te ia.
12. E fai fo‘i ia ‘a‘ai ma sulufa‘iga ‘iā te ‘outou a‘i lē na te taui ma sui, ‘ina ne‘i oti le fasioti tagata; se‘ia tu mai o ia i luma o le fa‘apotopotoga e fa‘amasinoina ai.
13. O ‘a‘ai fo‘i ia tou te tu‘uina atu, e ono ‘a‘ai e fai ma sulufa‘iga mo ‘outou.
14. Tou te tu‘uina atu ‘a‘ai e tolu i lenei itū o Ioritana, tou te tu‘uina atu fo‘i o ‘a‘ai e tolu i le nu‘u o Kanana, e fai lava ma ‘a‘ai o sulufa‘iga.
15. O ia ‘a‘ai e ono e fai ma sulufa‘iga mo le fānauga a Isaraelu, ma le tagata ‘ese, ‘atoa ma lē ‘ua āumau ‘iā te i latou, ‘ina ‘ia ta‘itasi ma sola atu i ai o lē ‘ua pa‘ivalea se tasi ‘iā te ia.
16. ‘Ae ‘āfai e fasia se tasi e le tasi i se u‘amea e oti ai lava o ia, o le fasioti tagata lava lea; ‘ia matuā fasiotia lava le fasioti tagata.
17. ‘Āfai fo‘i ‘ua lavea se tasi e le tasi i le ma‘a ‘ua togi e mafai ‘ona oti ai o ia, e oti ai fo‘i o ia, o le fasioti tagata lava lea; ‘ia matuā fasiotia lava le fasioti tagata.
18. Po ‘ua lavea se tasi e le tasi i se la‘au i lona lima e mafai ‘ona oti ai o ia, e oti ai fo‘i o ia, o le fasioti tagata lava lea; e matuā fasiotia lava le fasioti tagata.
19. O lē na te tauia ma sui le toto, o ia lava na te fasioti i le fasioti tagata; pe a la fetaia‘i ma ia na te fasioti ‘iā te ia.
20. ‘Āfai e tulei atu se tasi i le tasi i lona ‘ino‘ino i ai; pe lamalama i ai, ma togi atu ai se mea, e oti ai fo‘i o ia.
21. Pe tu‘i atu ‘iā te ia i lona lima i lona ita, ‘ua oti ai fo‘i o ia, e matuā fasiotia lava o lē na tu‘i ‘iā te ia, o le fasioti tagata lava o ia; e fasiotia le fasioti tagata e lē na te tauia ma sui le toto, pe a la fetaia‘i ma ia.
22. ‘Ae ‘āfai ‘ua fa‘afuase‘i ‘ona ia tulei atu ‘iā te ia, ‘ae lē ita; pe na togi atu se mea ‘iā te ia, ‘ae le‘i lamalama;
23. po o se ma‘a e mafai ‘ona oti ai se tasi, a ‘ua na lē iloa o ia ‘ua na togi atu ‘iā te ia e oti ai fo‘i o ia, ‘ae lē sona fili ia, e le‘i loto fo‘i ‘ona ia tigāina o ia;
24. ‘ona fa‘amasino ai lea o le fa‘apotopotoga i lē na fasi tagata, ma lē na te tauia ma sui le toto, e tusa ma ia fa‘amasinoga.
25. E lavea‘iina fo‘i e le fa‘apotopotoga o le fasioti tagata, a‘i le lima o lē na te tauia ma sui le toto; e fa‘afoisia fo‘i o ia e le fa‘apotopotoga i le ‘a‘ai o lona sulufa‘iga na ia sola atu i ai; e nofo ai lava o ia se‘ia oti le ositaulaga sili, o lē na fa‘au‘uina i le suāu‘u pa‘ia.
26. ‘Ae ‘āfai e toe alu atu le fasioti tagata i tua o le tuā‘oi o le ‘a‘ai o lona sulufa‘iga na ia sola atu i ai;
27. a maua fo‘i o ia e lē na te tauia ma sui le toto i tua o le tuā‘oi o le ‘a‘ai o lona sulufa‘iga, a fasiotia fo‘i o le fasioti tagata e lē na te tauia ma sui le toto, e lē sasa‘a le toto ‘ona o ia.
28. A ‘ua lē se‘i nofo pea o ia i le ‘a‘ai o lona sulufa‘iga, se‘ia oti le ositaulaga sili; ‘ae a oti le ositaulaga sili, ‘ona toe fo‘i atu ai lea o le fasioti tagata i lona lava fanua.
29. E fai ia mea ma tulafono e fa‘amasino a‘i ‘iā te ‘outou i o ‘outou augatupulaga, i mea uma tou te nonofo ai.
30. ‘Ai se fasiotia se tasi, e oti lava le fasioti tagata i le mau a ē molimau ‘ae lē oti se tagata i le mau a le molimau e to‘atasi.
31. Tou te lē talia lava se togiola e ola ai le fasioti tagata, o lē ‘ua fa‘asalaina ia oti; ‘ae fasiotia lava o ia.
32. Tou te lē talia fo‘i se togiola mo lē ‘ua sola i le ‘a‘ai o lona sulufa‘iga, ‘ia toe fo‘i mai ai o ia e nofo i le nu‘u, a o le‘i oti le ositaulaga sili.
33. ‘Aua ne‘i leaga ‘iā te ‘outou le lau‘ele‘ele tou te i ai; auā o le toto o le mea lava lea e leaga ai le lau‘ele‘ele; e lē mafai fo‘i ‘ona togiolaina le lau‘ele‘ele a‘i le toto ‘ua fa‘amaligiina i ai, na o le toto lava o lē na na fa‘amaligiina.
34. ‘Aua ne‘i leaga ‘iā te ‘outou le lau‘ele‘ele tou te nonofo ai, ‘ou te mau ai a‘u; auā o a‘u o le ALI‘I, matou te mafuta ma le fānauga a Isaraelu.#