Le mataupu

  1. 1
  2. 2
  3. 3
  4. 4
  5. 5
  6. 6
  7. 7
  8. 8
  9. 9
  10. 10
  11. 11
  12. 12
  13. 13
  14. 14
  15. 15
  16. 16
  17. 17
  18. 18
  19. 19
  20. 20
  21. 21
  22. 22
  23. 23
  24. 24
  25. 25
  26. 26
  27. 27
  28. 28
  29. 29
  30. 30
  31. 31
  32. 32
  33. 33
  34. 34
  35. 35
  36. 36

Feagaiga Tuai

Feagaiga Fou

Numera 11 O LE TUSI PA'IA - Ekalesia Katoliko Roma (RSCB)

O le Muimui a Isaraelu

1. ‘Ua muimui le nu‘u, ‘ua leaga fo‘i lea mea i fofoga o le ALI‘I; auā ‘ua fa‘afofoga i ai le ALI‘I, ‘ona tupu ai lea o lona to‘asā; ‘ona mū ai lea o le afi mai le ALI‘I ‘iā te i latou, ‘ua fa‘aumatia ai pito toagalauapi.

2. ‘Ona tagi atu ai lea o le nu‘u ‘iā Mose; ‘ua tatalo fo‘i Mose i le ALI‘I, ‘ona pe ai lea o le afi.

3. ‘Ua fa‘aigoa fo‘i e ia lenā mea o Tapara; auā na mū ai le afi mai le ALI‘I ‘iā te i latou.

‘Ua Tofia e Mose o Faipule e To‘afitusefulu

4. ‘Ua tu‘inanau lava le vao tagata ‘ese sa ‘ia te i latou, ‘ua toe tagi fo‘i le fānauga a Isaraelu, ma latou fai ane, “O ai ‘ea e fafaga ‘iā te i tatou i manu?

5. ‘Ua tatou manatu i i‘a na tatou sa‘oloto ‘ona ‘a‘ai ai i Aikupito; o kukuma fo‘i, ma meleni, ma liki, ma aniani, ma kalika;

6. a o ona po nei ‘ua ‘o‘ole o tatou tino; ‘ua leai lava se mea e va‘ai i ai ‘ua na o lenei manai.”

7. O le manai fo‘i e pei o le fatu koriano ia, ma lona lanu e pei o le lanu o le petala.

8. Na feoa‘i le nu‘u ma fa‘aputu ai, ‘ona latou olo ai lea i ma‘aolo, pe tu‘i i le tanoa, ‘ona latou tunu ai lea i pani, ma fai a‘i pōtoi; o lona nanamu e pei o le nanamu o le pōtoi ‘ua palua ma le u‘u.

9. ‘Ua totō ifo le sau i le toagalauapi i le po, ‘ona totō lea i ai o le manai.

10. ‘Ua fa‘alogo Mose i le fētāgisi o le nu‘u i o latou ‘āiga, e ta‘ito‘atasi le tagata i faitoto‘a o latou fale ‘ie; ‘ona matuā tupu tele ai lea o le to‘asā o le ALI‘I, ‘ua leaga fo‘i i le manatu o Mose.

11. ‘Ona fai atu ai lea o Mose i le ALI‘I, “Se a le mea ‘ua e agaleaga mai ai i lau ‘au‘auna se a fo‘i le mea ‘ua lē alofagia ai a‘u i ou luma, ‘ina ‘ua e fa‘ae‘e mai le avega o lenei nu‘u uma i luga ‘iā te a‘u?

12. Na tō ‘ea a‘u i lenei nu‘u uma? pe na ‘ou fānauina i latou, ‘ina ‘ua e fetalai mai ai ‘iā te a‘u, ‘‘Ia e ‘ave ‘iā te i latou i lou lava fatafata, e pei o le tausi tama ‘ona ‘ave i le tama meamea,’ se‘ia latou o‘o i le lau‘ele‘ele na e tautō ai i o latou tamā?

13. ‘Ou te maua ‘ea i fea manu ‘ou te avatu ai i lenei nu‘u uma auā latou te fētāgisi mai ‘iā te a‘u, ‘ua fa‘apea mai, ‘‘Inā ‘aumai ia ‘iā te i matou o manu, matou te ‘a‘ai ai.’

14. ‘Ou te lē lavā lava e a‘u e to‘atasi ‘ona ‘ave i le avega o lenei nu‘u uma, auā e mafatia ai a‘u.

15. ‘Āfai fo‘i ‘e te fai fa‘apea ‘iā te a‘u, ‘ou te ‘ai‘oi lava, ‘āfai ‘ua alofagia a‘u e oe ‘ia e fasioti lava ‘iā te a‘u, ‘ae ‘aua ‘ou te iloa lo‘u puapuagā.”

16. ‘Ona fetalai mai ai lea o le ALI‘I ‘iā Mose, “‘Ia fa‘apotopoto mai ia ‘iā te a‘u o tagata e to‘afitugafulu, o toeaina o Isaraelu, o ē ‘ua e iloa lava o toeaina i latou o le nu‘u ma o latou faipule; ‘ia e ‘aumai fo‘i ‘iā te i latou i le fale fetāfa‘i o le fa‘apotopotoga, ‘ina ‘ia latou tutū ai fa‘atasi ma oe.

17. ‘Ona ‘ou alu ifo ai lea tā te tautala ma oe i lea mea; ‘ou te ‘avea fo‘i nisi o le agaga o lo‘o ‘iā te oe, ma ‘ou tu‘uina atu ‘iā te i latou; ‘ona latou tau‘ave ai lea fa‘atasi ma oe le avega o le nu‘u, ‘ina ‘ia e lē ‘avea to‘atasi.

18. ‘Ia e fai atu fo‘i i le nu‘u; ‘Inā fa‘apa‘iaina ‘outou e ‘outou, auā o a taeao, ‘ona ‘outou ‘a‘ai ai lea o manu; auā ‘ua ‘outou fētāgisi i fofoga o le ALI‘I, o lo‘o fa‘apea mai, ‘O ai sē na te ‘aumaia ‘iā te i matou o manu matou te ‘a‘ai ai? auā sa lelei i matou ‘ina o i Aikupito.’ O lea, e avatu ai e le ALI‘I o manu ‘iā te ‘outou tou te ‘a‘ai ai.

19. E lē na o le aso e tasi tou te ‘a‘ai ai, po o aso e lua, po o aso e lima, po o po e sefulu, po o le luafulu o po;

20. ‘ae se‘ia ‘atoa le masina, se‘ia alu ifo ia i o ‘outou isu, ma ‘avea ma mea e ‘inosia e ‘outou; auā ‘ua ‘outou ‘ino‘ino i le ALI‘I o lo‘o ‘iā te ‘outou, ‘ua ‘outou fētāgisi fo‘i i ona luma, o lo‘o fa‘apea mai. ‘Se a fo‘i le mea na matou ō mai ai nai Aikupito.’”

21. ‘Ona fai atu ai lea o Mose, “O le nu‘u matou te fa‘atasi ma i latou e ono selau o afe o tagata ia e ō i tau‘a, a ‘ua e fetalai mai, ‘‘Ou te foa‘iina atu ‘iā te i latou o manu latou te ‘a‘ai ai e ‘atoa le masina.’

22. E fasia ‘ea mo i latou o lafu mamoe ‘atoa fo‘i ma lafu povi ‘ina ‘ia latou mā‘o‘ona ai? pe fa‘apotopotoina ‘ea mo i latou o i‘a uma o le sami ‘ina ‘ia latou mā‘o‘ona ai?”

23. ‘Ona fetalai mai ai lea o le ALI‘I ‘iā Mose, “‘Ua fa‘apu‘upu‘uina ‘ea le lima o le ALI‘I? O lenei, ‘e te iloa lava pe taunu‘u ‘iā te oe la‘u ‘upu pe leai.”

24. ‘Ona alu atu ai lea o Mose, ma fai atu i le nu‘u fetalaiga a le ALI‘I; ‘ua ia fa‘apotopoto fo‘i i toeaina o le nu‘u, o tagata e to‘afitugafulu, ‘ua ia fai atu, ‘ia tutū i latou e fa‘ata‘ali‘oli‘o i le fale fetāfa‘i.

25. ‘Ona afio ifo ai lea o le ALI‘I i le ao, ma fetalai mai ‘iā te ia, ‘ua ia ‘avea fo‘i nisi o le agaga na ‘iā te ia, ma na tu‘uina atu i toeaina e to‘afitugafulu; ‘ua nofo le agaga i luga ‘iā te i latou, ‘ona latou perofeta ane ai lea, ‘ua gata i lea aso.

26. A ‘ua nonofo tagata o latou e to‘alua i le toagalauapi, o le igoa o le tasi o Elitato, ma le igoa o le isi o Metato; ‘ua nofo fo‘i le agaga i luga ‘iā te i lā‘ua, (o isi fo‘i i lā‘ua o ē na tusia, ‘ona ‘ua la le ō atu i le fale fetāfa‘i,) ‘ona la perofeta ane ai lea i le toagalauapi.

27. ‘Ona tamo‘e mai ai lea o le tasi taule‘ale‘a, ma ta‘u mai ‘iā Mose, ‘ua fa‘apea mai, “O Elitato ma Metato o lo‘o perofeta ane i lā‘ua i le toagalauapi.”

28. ‘Ona fai mai ai lea o Iosua le atali‘i o Nuno, o le ‘au‘auna a Mose o le tasi o ona taulele‘a, ‘ua fa‘apea mai, “Le ali‘i e, Mose, ‘ia e vavao ‘iā te i lā‘ua.”

29. ‘Ona fai atu ai lea o Mose ‘iā te ia, “‘Ua e mata‘u‘a ‘ea ‘ona o a‘u? ‘ou te mana‘o lava ‘ia fai ma perofeta le nu‘u uma o le ALI‘I, ma ‘ia foa‘iina atu e le ALI‘I lona Agaga ‘iā te i latou.”

30. ‘Ona alu atu ai lea o Mose i le toagalauapi, o ia ma toeaina o Isaraelu.

‘Ua ‘Auina mai e le ALI‘I o Salu mai le Sami

31. ‘Ona agi mai ai lea o le matagi mai i le ALI‘I, ‘ua ‘aumai ai fo‘i salu mai le sami, ‘ua tu‘u ai i le toagalauapi, e tusa ma le sāvaliga o le aso e tasi i lea itū ma le sāvaliga o le aso e tasi i lea itū ‘ua pau mai ia, ‘ua si‘osi‘oina ai lava le toagalauapi, e lua kupita fo‘i i luga o le fogā‘ele‘ele.

32. ‘Ona tutū ai lea o le nu‘u i lea aso uma, ma le po uma, i le ma lona aso lua uma, ‘ua latou fa‘apotopoto ai salu; o lē na itiiti ana mea na fa‘apotopoto e sefulu ana somera; ‘ua latou folasia ai fo‘i mo i latou, ‘ua si‘osi‘oina ia lava le toagalauapi.

33. Sa u i latou i manu ‘ae le‘i lamuina, ‘ona tupu ai lea o le to‘asā o le ALI‘I i le nu‘u, ‘ua fasia fo‘i e le ALI‘I o le nu‘u i le fasiga e matuā tele lava.

34. Na fa‘aigoa fo‘i e ia le igoa o lea mea o Kiperota-atava, auā o lea mea na latou tanumia ai le nu‘u na tu‘inanau.

35. ‘Ona malaga ai lea o le nu‘u a‘i Kiperota-atava i Haserota; ‘ua latou nonofo fo‘i i Haserota.