1. ‘Ua iloa e Palaamo ‘ua finagalo le ALI‘I e fa‘amanuia atu ‘iā Isaraelu, ‘ona lē toe alu ai lea o ia, e pei ‘ona fai so‘o e sā‘ili togafiti fa‘ataulāitu, a ‘ua fa‘asaga atu o ia i le vao.
2. ‘Ona tepa a‘e lea o Palaamo, ‘ua iloa Isaraelu, o lo‘o nofo a itū‘āiga, ‘ona o‘o lea o le Agaga o le Atua i luga ‘iā te ia.
3. ‘Ona saunia ai lea e ia o lana fa‘ata‘oto, ‘ua fa‘apea atu:“‘Ua fai atu Palaamo le atali‘i o Peoro;‘ua fai atu le tagata ‘ua pupula ona mata.
4. ‘Ua fai atu lē ‘ua fa‘alogo i afioga a le Atua,o lē ‘ua va‘aia mea na fa‘aali mai Lē e ona le malosi uma lava,‘ua pa‘ū, a ‘ua pupula pea ona mata.
5. Iakopo e, ‘ua matuā matagofie ou fale ‘ie ma mea ‘e te nofo ai, Isaraelu e.
6. O lo‘o folasia pei o alia;e pei o fa‘ato‘aga i le ‘auvai o le vaitafe;e pei o aloe fo‘i ‘ua totōina e le ALI‘I,e pei o arasi fo‘i i le ‘auvai.
7. Na te sasa‘aina vai nai ana pakete,e i ai fo‘i ona fua i vai e tele;e sili lona tupu ‘iā Akako,e sili fo‘i lona mālō.
8. ‘Ua ‘aumaia o ia e le Atua nai Aikupito;‘ua ‘iā te ia e peiseaī le tele vave o le rema;e ‘aina e ia o nu‘u ‘ese o ē ita ‘iā te ia;e gauia e ia o latou ivi, o ana ū fanafana e manunu‘a ai i latou.
9. E fa‘apuga o ia, e ta‘oto e pei o se leona,e pei o se leona fafine fo‘i;o ai ‘ea sē na te fa‘alili ‘iā te ia?E manuia lē na te fa‘amanuia atu ‘iā te oe,‘ae fetu‘uina lē na te fetu‘u ‘iā te oe.”
10. ‘Ona tupu ai lea o le ita o Palako ia Palaamo, ‘ua pati ona lima; ‘ua fa‘apea atu fo‘i Palako ‘iā Palaamo, “Na ‘ou ‘amia oe e fetu‘u i o‘u fili, fa‘auta fo‘i, ‘ua atu tolu ‘ona e matuā fa‘amanuia atu ‘iā te i latou.
11. O lenei, ‘inā vave ia oe i le mea ‘ua e mau ai; ‘na fai a a‘u matuā fa‘amaluali‘ia oe;’ ‘ae peita‘i ‘ua tāofia oe e le ALI‘I ne‘i fa‘amaluali‘ia oe.”
12. ‘Ona fai atu ai lea o Palaamo ‘iā Palako, “‘Ou te le‘i fai atu ‘ea i lau sāvali na e ‘a‘auina atu ‘iā te a‘u, ‘ua fa‘apea atu,
13. ‘‘Āfai e foa‘iina mai e Palako ‘iā te a‘u o ario ma auro e tumu ai lona fale, ‘ou te lē mafaia ona soli le afioga a le ALI‘I, e fai se mea lelei po o se mea leaga i lo‘u lava loto; a o le ‘upu e fetalai mai ai le ALI‘I ‘ou te fai atu ai lava.’
14. O lenei, fa‘auta mai, A a‘u alu i lo‘u nu‘u ‘inā maliu mai ia, so‘u fa‘aali atu ‘iā te oe mea e faia e lenā nu‘u i lou nu‘u i ona po amulī.”
15. ‘Ona saunia ai lea e ia o lana fa‘ata‘oto, ‘ua fa‘apea atu,“‘Ua fai atu Palaamo le atali‘i o Peoro;‘ua fai atu le tagata ‘ua pupula ona mata;
16. ‘ua fai atu lē ‘ua fa‘alogo i afioga a le Atua,ma iloa le poto o le Silisili‘ese;‘ua na iloa fo‘i le fa‘aaliga mai Lē e ona le malosi uma lava,‘ua pa‘ū, a ‘ua pupula pea ona mata.
17. ‘Ou te iloa o ia, ‘ae lē o ona po nei;‘ou te va‘ai atu ‘iā te ia,‘ae lē latalata mai;e alu le fetū mai ia Iakopo;e tu mai fo‘i le to‘oto‘o mai ‘iā Isaraelu,na te matuā sasaina itū e lua o Moapi,ma fa‘aumatia le fānauga uma a Seetu.
18. E ‘avea fo‘i Etoma ma tofi,e ‘avea fo‘i Seira ma tofi o ē fai i latou ma fili;‘ae ‘avea lava Isaraelu ma toa.
19. E pule so sa Iakopō,na te fa‘aumatia fo‘i se toe i le ‘a‘ai.”
20. ‘Ua va‘ava‘ai fo‘i o ia i Amaleka,‘ona saunia ai lea e ia o lana fa‘ata‘oto, ‘ua fa‘apea atu:“O Amaleka na muamua ia i nu‘u,a o lona i‘uga e fa‘aumatia e fa‘avavau.”
21. ‘Ua va‘ava‘ai fo‘i o ia i sa Kenī,‘ona saunia ai lea e ia o lana fa‘ata‘oto, ‘ua fa‘apea atu,“E malosi le mea ‘e te mau ai;‘ua e faia fo‘i lou ōfaga i le papa.
22. ‘Ae peita‘i e tauāu ‘ina fa‘aumatia Keni,se‘ia o‘o ‘ina faia oe ma tagata o tau‘a ‘iā Asuria.”
23. ‘Ona saunia ai lea e ia o lana fa‘ata‘oto, ‘ua fa‘apea atu,“Auē! o ai ‘ea se ola pe a faia e le Atua lenei mea?
24. E ō mai va‘a mai le nu‘u o Kitimo,ma latou fa‘asauā ‘iā Asuria,latou te fa‘asauā fo‘i ‘iā Eperu,e fa‘aumatia fo‘i o ia e fa‘avavau.”
25. ‘Ona tula‘i ai lea o Palaamo ‘ua alu, ‘ua toe fo‘i atu i le mea sa nofo ai o ia ‘ua alu fo‘i Palako ia.