1. ‘Ua fetalai mai fo‘i le ALI‘I ‘iā Mose i le vao o Sinai, i le masina muamua o le tausaga e lua talu ‘ona latou ō mai mai le nu‘u o Aikupito, ‘ua fa‘apea mai:
2. ‘Ia faia e le fānauga a Isaraelu le paseka i ona po ‘ua tu‘upoina ai.
3. o le aso e sefulu ma le fa o lenei masina i le afiafi tou te fai ai i ona po ‘ua tu‘upoina ai; tou te fai ai e tusa ma ana tulafono uma ma ana tu uma.
4. ‘Ona fai atu ai lea o Mose i le fānauga a Isaraelu ‘ia latou faia le paseka.
5. ‘Ona latou faia lea o le paseka i le aso e sefulu ma le fa o le masina muamua i le afiafi i le vao o Sinai; e tusa ma mea uma na poloa‘i mai ai le ALI‘I ‘iā Mose, e fa‘apea lava ‘ona faia e le fānauga a Isaraelu.
6. Na i ai fo‘i nisi tagata sa leaga i le tino o le tagata oti, ‘ua latou lē mafai ai ‘ona fai o le paseka i lea aso; ‘ona latou ō mai ai lea i luma o Mose ma luma o Arona i lea aso;
7. ‘ona fai mai ai lea o ia tagata ‘iā te ia, “‘Ua leaga i matou i le tino o le tagata oti; se a le mea ‘ua tāofia ai i matou ‘ia matou lē faia le taulaga i le ALI‘I i ona po ‘ua tu‘upoina ai fa‘atasi ma le fānauga a Isaraelu?”
8. ‘Ona fai atu ai lea o Mose ‘iā te i latou, “‘Inā fa‘atali ia se‘i ‘ou iloa le mea e fetalai mai ai le ALI‘I ‘iā te ‘outou.”
9. ‘Ona fetalai mai ai lea o le ALI‘I ‘iā Mose, ‘ua fa‘apea mai:
10. ‘Ia e fai atu i le fānauga a Isaraelu, ‘ia fa‘apea atu: ‘Ai se tasi e ‘iā te ‘outou po o a ‘outou tupulaga amulī e leaga i le tagata oti, po o se tagata e mamao i se malaga, e fai pea e ia le paseka i le ALI‘I.
11. O le masina e lua i lona aso e tasi le sefulu ma le fa i le afiafi latou te fai ai, latou te ‘a‘ai ai ma areto e lē fa‘afefeteina ma la‘au ‘o‘ona.
12. ‘Aua ne‘i latou fa‘atoe se mea e o‘o i le taeao, ‘aua fo‘i ne‘i latou gagau sona ivi; e tusa ma tulafono uma i le paseka ‘ia latou faia.
13. A o le tagata o lo‘o mamā, ‘ua lē alu fo‘i o ia i se malaga, a ‘ua na lē faia le paseka, e vavae‘eseina lea tagata i lona nu‘u; auā e le‘i ‘aumaia e ia le taulaga i le ALI‘I i ona po ‘ua tu‘upoina ai; e nofo sala lea tagata.
14. ‘Āfai fo‘i e āumau ‘iā te ‘outou se tagata ‘ese ‘ae fia fai e ia le paseka i le ALI‘I, e faia lava e ia e tusa ma le tulafono o le paseka, e tusa fo‘i ma ona tu; e tasi lava le tulafono ‘iā te ‘outou, e o‘o i le tagata ‘ese ‘atoa ma le tagata lava o le nu‘u.
15. O le aso na fa‘atūina ai le malumalu na ufitia le malumalu e le ao, o le fale fetāfa‘i lea ‘ua i ai le tulafono; o le afiafi fo‘i sa i luga o le malumalu o le mea ‘ua tino mai peiseaī o le afi, ‘ua o‘o i le taeao.
16. Sa fa‘apea lava pea; o le ao na ufitia ai ‘ina o ao, ma le mea ‘ua tino mai peiseaī o le afi ‘ina o po.
17. A si‘itia fo‘i le ao a‘i luga o le fale fetāfa‘i, e mulimuli ane ‘ona ō lea o le malaga a le fānauga a Isaraelu; o le mea fo‘i e nofo ai le ao o le mea lava lea e tolauapi ai le fānauga a Isaraelu.
18. O le afioga lava a le ALI‘I na ō malaga ai le fānauga a Isaraelu, o le afioga fo‘i a le ALI‘I ‘ua latou tolauapi ai. O aso uma ‘ua nofo ai le ao i luga o le malumalu ‘ua latou nonofo pea ai i lo latou toagalauapi.
19. A tele aso o i ai pea le ao i luga o le malumalu, ‘ona tausi ai lea e le fānauga a Isaraelu le sauniga a le ALI‘I, ‘ua latou le ō malaga lava.
20. Na fa‘apea fo‘i, a itiiti nai po ‘ua i ai le ao i luga o le malumalu; o le afioga lava a le ALI‘I ‘ua latou tolauapi ai, o le afioga fo‘i a le ALI‘I ‘ua latou ō malaga ai.
21. Na fa‘apea fo‘i, a o i ai le ao e āfua mai i le afiafi e o‘o i le taeao, ma ‘ua si‘itia le ao i taeao, ‘ona latou ō malaga ai lea; po o le ao po o le po ‘ua si‘itia ai le ao, ‘ona ō malaga ai lea o i latou.
22. ‘Āfai fo‘i o po e lua, po o se masina ‘atoa, po o se tausaga o i ai pea le ao i luga o le malumalu, ma nofo ai i ona luga, ‘ua nonofo ai pea i le toagalauapi le fānauga a Isaraelu, ‘ua latou le ō malaga lava; ‘ae ‘āfai ‘ua si‘itia ia, ‘ona latou ō malaga ai lea.
23. O le afioga a le ALI‘I ‘ua latou tolauapi ai, o le afioga fo‘i a le ALI‘I ‘ua latou ō malaga ai; na latou tausia le sauniga a le ALI‘I e tusa ma le afioga a le ALI‘I ‘iā Mose.#