1. ‘Ua fetalai mai fo‘i le ALI‘I ‘iā Mose, ‘ua fa‘apea mai:
2. ‘Ia e poloa‘i atu i le fānauga a Isaraelu, ‘ia fa‘apea atu ‘iā te i latou, A ‘outou o‘o atu i le nu‘u o Kanana, o le nu‘u lava lea e maua e ‘outou e fai mo ‘outou tofi, o le nu‘u o Kanana ma ona itū;
3. o lo ‘outou itū i le itū i saute, e gata mai i le vao o Tisina i tafatafa o le tuā‘oi o Etoma, o lo ‘outou tuā‘oi fo‘i i le itū i saute o le pito i le sami ‘o‘ona lea i sasa‘e.
4. E afe ane fo‘i lo ‘outou tuā‘oi a‘i le itū i saute i le ā‘ega o Akarava, ‘ae ui atu i Tisina; o lona alu atu ai le itū i saute e o‘o i Katesapanea, e alu atu fo‘i i Hasaratara, ‘ae ui atu i Asemoni.
5. E afe ane fo‘i le tuā‘oi a‘i Asemoni i le alia o Aikupito, o lona gata‘aga o le sami lea.
6. O le tuā‘oi fo‘i i sisifo, e fai mo o ‘outou tuā‘oi le sami tele; o lo ‘outou tuā‘oi lea i sisifo.
7. O lenei fo‘i lo ‘outou tuā‘oi i le itū i matū; tou te fuafuatia mo ‘outou a‘i le sami tele e o‘o atu i le mauga o Horo.
8. Tou te fuafua fo‘i a‘i le mauga o Horo e o‘o i le mea e ui atu ai i Amato; o le gata‘aga fo‘i o le tuā‘oi e o‘o atu i Setata.
9. E alu atu fo‘i le tuā‘oi i Seferona, o lona gata‘aga fo‘i e o‘o i Hasarenana; o lo ‘outou tuā‘oi lea i le itū i matū.
10. Tou te fuafua fo‘i lo ‘outou tuā‘oi i sasa‘e mai Hasarenana e o‘o atu i Sefama.
11. E alu ifo fo‘i le tuā‘oi mai Sefama e o‘o atu i Ripelu, i ona sasa‘e o Aino; e alu ifo le tuā‘oi e o‘o atu lava i le itū i sasa‘e o le vai o Kinereta.
12. E alu ifo le tuā‘oi i Ioritana, o lona gata‘aga fo‘i o le sami ‘o‘ona lea.O lo ‘outou lau‘ele‘ele lea ma ona tuā‘oi e si‘osi‘o ai.
13. ‘Ua fai atu Mose i le fānauga a Isaraelu, ‘ua fa‘apea atu: O le lau‘ele‘ele lava lea e fai ai mo ‘outou tofi i le vili, na poloa‘i mai ai le ALI‘I e tu‘uina atu i itū‘āiga e iva ma le vaega o le tasi itū‘āiga.
14. Auā ‘ua maua lo latou tofi e le itū‘āiga o le fānauga a sa Reupenā e fa‘atatau i le ‘āiga o latou tamā, ma le itū‘āiga o le fānauga a sa Katō e fa‘atatau i le ‘āiga o latou tamā; ‘atoa ma le vaega o le itū‘āiga o Manase, ‘ua maua lava e i latou o latou tofi.
15. ‘Ua maua e itū‘āiga e lua ma le vaega o le tasi itū‘āiga o latou tofi i lenei itū i sasa‘e o Ioritana, e fesagai ma Ieriko, i le mea e alu a‘e ai le lā.
16. ‘Ua fetalai mai fo‘i le ALI‘I ‘iā Mose, ‘ua fa‘apea mai:
17. O igoa ia o tagata latou te totofi le lau‘ele‘ele mo ‘outou, O Eleasaro le ositaulaga, ma Iosua le atali‘i o Nuno.
18. Tou te ‘ave fo‘i ali‘i sili ‘ia ta‘itasi i itū‘āiga e fa‘asoa tofi i le lau‘ele‘ele.
19-28. O igoa fo‘i ia o tagata. Itū‘āiga Ali‘i sili Iuta o Kalepo le atali‘i o Iefune Simeona o Semueli le atali‘i o Ameuta Peniamina o Elitata le atali‘i o Kiselona Tanu o Puki le atali‘i o Iakeli Manase o Hanieli le atali‘i o Efota Efaraima o Kimueli le atali‘i o Sefatana Sepulona o Elisafano le atali‘i o Parenaka Isakara o Paletieli le atali‘i a Asani Asera o Aiuta le atali‘i o Selomi Nafatali o Petaeli le atali‘i o Ameuta.
29. O i latou ia na poloa‘i mai ai le ALI‘I ‘ia latou fa‘asoa tofi o le fānauga a Isaraelu i le nu‘u o Kanana.