1. Sa matuā tele lava le lafu manu a le fānauga a Reupena, ma le fānauga a Kato; ‘ua va‘ava‘ai i latou i le lau‘ele‘ele o Iasaru ma le lau‘ele‘ele o Kiliata, fa‘auta fo‘i o le mea e aogā lava i lafu manu.
2. ‘Ona ō mai ai lea o le fānauga a Kato, ma le fānauga a Reupena, ‘ua latou fai mai ‘iā Mose, ma Eleasaro le ositaulaga, ma ali‘i sili o le fa‘apotopotoga, ‘ua fa‘apea mai,
3. “O Atarota, ma Tipona, ma Iasaru, ma Nimara, ma Hesepona, ma Eleale, ma Sepema ma Nepo, ma Peona,
4. o le nu‘u na fasia e le ALI‘I i luma o le fa‘apotopotoga o Isaraelu, o le nu‘u e aogā i lafu manu; o lo‘o i au ‘au‘auna fo‘i o lafu.”
5. ‘Ua latou fa‘apea mai fo‘i, “‘Āfai e alofagia i matou e oe ‘ia tu‘uina mai i au ‘au‘auna o lenei nu‘u e fai mo matou, ‘ae ‘aua ‘e te fa‘ao‘o ‘iā te i matou i tala atu o Ioritana.”
6. ‘Ona fai atu ai lea o Mose i le fānauga a Kato, ma le fānauga a Reupena, “E ō atu ‘ea o ‘outou uso i le tau‘a, ‘ae tou te nonofo ‘ea ‘i‘inei?
7. Se a ‘ea le mea ‘ua ‘outou fa‘avaivai ai loto o le fānauga a Isaraelu ‘ia lē ō atu ai i latou i le nu‘u na tu‘uina mai e le ALI‘I ‘iā te i latou?
8. Sa fa‘apea ‘ona fai e o ‘outou tamā, ‘ina ‘ua ‘ou ‘a‘auina atu i latou mai Katesapanea e asiasi i le nu‘u.
9. Na latou ō a‘e i le alia o Esekolo, ma latou asiasi i le nu‘u, ‘ona latou fa‘avaivai ai lea o loto o le fānauga a Isaraelu ‘ina ‘ia lē ō a‘e i latou i le nu‘u ‘ua tu‘uina mai e le ALI‘I ‘iā te i latou.
10. ‘Ona tupu ai lea o le to‘asā o le ALI‘I i lea lava aso, ‘ona tautō ai lea o ia, ‘ua fa‘apea mai.
11. ‘O tagata na ō a‘e mai Aikupito e āfua mai i ē ‘ua luafulu o latou tausaga, ‘atoa ma ē ‘ua matutua ai, latou te lē iloa lava le nu‘u na ‘ou tautō ai ‘iā Aperaamo, ma Isaako, ma Iakopo; auā ‘ua latou le matuā mulimuli mai ‘iā te a‘u;
12. tau lava o Kalepo le atali‘i o Iefune o le sa Kinasā, ma Iosua le atali‘i o Nuno; auā ‘ua la matuā mulimuli mai i le ALI‘I.’
13. Na tupu fo‘i le to‘asā o le ALI‘I ‘iā Isaraelu, ‘ona fa‘afeoa‘i ai lea o i latou e ia i le vao i tausaga e fagafulu, ‘ina se‘ia fa‘aumatia lea tupulaga ‘atoa na fai mea leaga i luma o le ALI‘I.
14. Fa‘auta mai fo‘i, ‘ua tutupu mai ‘outou o sui o ‘outou tamā, o le tupulaga o tagata agasala, e toe fa‘atele ai le to‘asā mamafa o le ALI‘I ‘iā Isaraelu.
15. Auā ‘āfai tou te liliu ‘ese ‘iā te ia, ‘ona toe tu‘ua lea e ia o i latou i le vao; e fa‘aumatia fo‘i e ‘outou lenei nu‘u uma.”
16. ‘Ona latou fa‘alatalata mai ai lea ‘iā te ia, ma latou fa‘apea mai, “Matou te faia ‘i‘inei o lotoā mamoe ma lo matou lafu manu, ma ‘a‘ai ma o matou tama iti;
17. a o i matou, matou te sauniuni fa‘avave i le tau‘a, e ō atu ai i luma o le fānauga a Isaraelu, se‘ia matou fa‘a‘o‘otia i latou i le mea latou te nonofo ai; a o matou tama iti, latou te nofo ‘olo i ‘a‘ai, auā o tagata o le nu‘u.
18. Matou te lē toe fo‘i mai i o matou ‘āiga se‘ia maua e le fānauga a Isaraelu ta‘itasi ma lona tofi.
19. Auā matou te lē fai lo matou tofi fa‘atasi ma i latou i lelā itū o Ioritana, po o ona tala atu, auā ‘ua maua e i matou lo matou tofi i lenei itū i sasa‘e o Ioritana.”
20. ‘Ona tali atu ai lea o Mose ‘iā te i latou, “‘Āfai tou te faia lenei mea, ‘āfai tou te sauniuni e ō i le tau‘a i luma o le ALI‘I,
21. ma ‘outou sopo‘ia atu Ioritana, o ‘outou uma o sauni i le tau‘a, i luma o le ALI‘I, se‘ia tulia e ia ona fili a‘i ona luma,
22. ma fa‘ato‘ilaloina le nu‘u i luma o le ALI‘I; mulimuli ane tou te toe ō mai, ‘ona māgalo ai lea o ‘outou i luma o le ALI‘I, ‘atoa ma Isaraelu; e faia fo‘i lenei nu‘u mo ‘outou i luma o le ALI‘I.
23. ‘Ae ‘āfai tou te lē fa‘apea ‘ona fai, fa‘auta, e agasala ai ‘outou i le ALI‘I; ‘ia ‘outou iloa fo‘i ‘ua maua lava ‘outou e a ‘outou agasala.
24. ‘Inā faia lava ia e ‘outou o ‘a‘ai mo a ‘outou tama iti, ma lotoā mo a ‘outou mamoe; ma ‘ia ‘outou faia lava le mea ‘ua ‘outou fai mai ai.”
25. ‘Ona fai mai ai lea o le fānauga a Kato, ma le fānauga a Reupena ‘iā Mose, ‘ua fa‘apea mai, “E faia lava e au ‘au‘auna le mea ‘ua fetalai mai ai lo matou ali‘i.
26. O a matou tama iti, o a matou avā, o matou lafu mamoe, ma a matou manu uma e nonofo i latou ‘i‘inā i ‘a‘ai o Kiliata.
27. A o au ‘au‘auna, matou te ō atu i lelā itū e sauni uma lava i luma o le ALI‘I e tau ai i le tau‘a, e pei ‘ona fetalai mai ai o lo matou ali‘i.”
28. O i latou fo‘i ia ‘ua poloa‘i atu ai Mose ‘iā Eleasaro le ositaulaga, ma Iosua le atali‘i o Nuno, ma matai sili o itū‘āiga o le fānauga a Isaraelu,
29. ‘ua fa‘apea atu Mose ‘iā te i latou, “‘Āfai e sopo‘ia atu fa‘atasi ma ‘outou o Ioritana e le fānauga a Kato, ma le fānauga a Reupena, o sauni uma e tau ai le tau‘a i luma o le ALI‘I, ma fa‘ato‘ilaloina ai le nu‘u i o ‘outou luma, ‘ona ‘outou tu‘uina atu ai lea ‘iā te i latou le nu‘u o Kiliata e fai mo latou.
30. ‘Ae ‘āfai latou te lē o fa‘atasi ma ‘outou i lelā itū o sauni i le tau‘a, ‘ona maua ai lea e i latou o latou tofi e fa‘atasi ma ‘outou i le nu‘u o Kanana.”
31. ‘Ona fai mai ai lea o le fānauga a Kato, ma le fānauga a Reupena, ‘ua fa‘apea mai, “O le mea ‘ua fetalai mai ai le ALI‘I i au ‘au‘auna matou te fa‘apea ‘ona faia;
32. matou te ō atu o i matou lava i lelā itū o sauni i le tau‘a i luma o le ALI‘I i le nu‘u o Kanana, ‘ina ‘ia fai ai lo matou tofi i lenei itū o Ioritana.”
33. ‘Ona tu‘uina lea e Mose ‘iā te i latou, o le fānauga a Kato, ma le fānauga a Reupena, ma le tasi vaega o le itū‘āiga o Manase le atali‘i o Iosefa, o le nu‘u o Sekono le tupu o sa Amorī; ma le nu‘u o Oko le tupu o Vasana; o le lau‘ele‘ele, ma ‘a‘ai i ona itū, o ‘a‘ai ‘ua so‘o ai le nu‘u.
34. ‘Ona faia lea e le fānauga a Kato o Tipona, ma Atarota, ma Aroeru,
35. ma Atirota, ma Sofano, ma Iasaru, ma Iakepea,
36. ma Petenimara, ma Petearana, o ‘a‘ai nofo ‘olo; ‘atoa ma lotoā mamoe.
37. ‘Ua faia fo‘i e le fānauga a Reupena, o Hesepona, ma Eleale, ma Kiriataima,
38. ma Nepo, ma Paalameona (‘ua liua o la igoa,) ma Sepema; ‘ua latou fa‘aigoaina fo‘i o ‘a‘ai na latou faia i nisi igoa.
39. ‘Ua ō atu fo‘i i Kiliata le fānauga a Makiro le atali‘i o Manase, ma latou ā‘ea, ‘ua latou tulia fo‘i sa Amorī na i ai.
40. ‘Ona tu‘uina atu lea e Mose o Kiliata ‘iā Makiro le atali‘i o Manase, ‘ona nofo ai lea o ia.
41. ‘Ua alu fo‘i Iairo le atali‘i o Manase, ma na faoa ona faoa ‘a‘ai; ‘ua ia fa‘aigoa fo‘i i ai o Havotaiairo.
42. ‘Ua alu fo‘i Nopa, ma na faoa o Kinata ma ona faoa ‘a‘ai, ‘ua ia fa‘aigoa fo‘i i ai i lona lava igoa, o Nopa.