1. ‘Ona ‘alalaga ai lea o le fa‘apotopotoga uma, ‘ua fētāgisi fo‘i le nu‘u i lea po.
2. ‘Ua muimui fo‘i le fānauga a Isaraelu uma lava ‘iā Mose ma Arona, ‘ua fai mai fo‘i le fa‘apotopotoga uma ‘iā te i lā‘ua, “E! ‘ana matou oti i le nu‘u o Aikupito. E! ana matou oti i lenei vao.
3. Se a ‘ea le mea ‘ua ‘aumai ai e le ALI‘I ‘iā te i matou i lenei nu‘u ‘ia oti i le pelu, e ‘avea fo‘i o matou fafine ma o matou tamaiti o tagata o tau‘a? E lē lelei ‘ea ‘ona matou toe fo‘i atu i Aikupito?”
4. ‘Ona latou fetautalatala‘i ai lea, “Se‘i tatou tofia so tatou ta‘ita‘i ma tatou fo‘i atu i Aikupito.”
5. ‘Ona fa‘apa‘u‘ū faō ai lea o Mose ma Arona i luma o tagata uma o le fa‘apotopotoga o le fānauga Isaraelu.
6. O Iosua fo‘i le atali‘i o Nuno, ma Kalepo le atali‘i o Iefune, o i lā‘ua sa i le asiasiga o le nu‘u, ‘ua la saeia o la ‘ofu;
7. ‘ua la fai ane fo‘i i le fa‘apotopotoga uma o le fānauga a Isaraelu, ‘ua fa‘apea atu, “O le nu‘u na matou ui ai e asiasi ai, o le nu‘u e matuā lelei tasi lava ia.
8. ‘Āfai e finagalo alofa mai le ALI‘I ‘iā te i tatou, na te fa‘a‘o‘otia lava i tatou i lenā nu‘u, ma foa‘i mai ai ‘iā te i tatou; o le nu‘u lava ‘ua tafe ai le suāsusu ma le meli.
9. ‘Ae ‘aua lava ne‘i ‘outou fouvale i le ALI‘I, ‘aua fo‘i tou te matata‘u i tagata o le nu‘u, auā e faia lava i latou ma mea e ‘ai ma tatou; ‘ua mavae lo latou mamalu ‘iā te i latou, a o lo‘o ‘iā te i tatou le ALI‘I; ‘aua tou te matata‘u ‘iā te i latou.”
10. A ‘ua fai ane le fa‘apotopotoga uma e fetogi ‘iā te i lā‘ua i ma‘a. ‘Ona fa‘aali mai ai lea o le pupula o le ALI‘I i le fale fetāfa‘i o le fa‘apotopotoga i luma o le fānauga a Isaraelu uma lava.
11. ‘Ona fetalai mai ai lea o le ALI‘I ‘iā Mose, “E ‘ino‘ino mai lenei nu‘u ‘iā te a‘u se‘ia afea? E ui lava i fa‘ailoga uma ‘ua ‘ou faia ‘iā te i latou, ‘ae latou te lē fa‘atuatua lava ‘iā te a‘u se‘ia afea?
12. ‘Ou te taia i latou i le fa‘ama‘i, ‘ou te fa‘aumatia fo‘i i latou, ‘ou te faia fo‘i oe ma tupuga o le nu‘u e tele ma le malosi, e sili ‘iā te i latou.”
13. ‘Ona fai atu ai lea o Mose i le ALI‘I, “E fa‘alogo mai i ai o Aikupito. (auā na e ‘aveina a‘e lenei nu‘u i lou mana nai ‘iā te i latou;)
14. latou te ta‘u atu ai fo‘i i ē o nonofo i le nu‘u nei; auā ‘ua latou fa‘alogo lava, o oe lava, le ALI‘I e, o lo‘o e afio i totonu o lenei nu‘u, o oe fo‘i le ALI‘I o lo‘o iloa oe ‘ua fa‘afeagai lava; o le ao fo‘i mai ‘iā te oe o lo‘o tu i o latou luga, o lo‘o e afio fo‘i i luma ‘iā te i latou i le ao fa‘aniutū ‘ina o ao, ma le afi fa‘aniutū ‘ina o po.
15. O lenei, ‘āfai ‘e te fasiotia lenei nu‘u, e pei o se tagata e to‘atasi, ‘ona tautala ane ai lea o nu‘u ‘ese o ē ‘ua iloa le logo ‘iā te oe, e fa‘apea ane,
16. ‘E lē mafaia e le ALI‘I ‘ona fa‘ao‘o lenei nu‘u i le nu‘u na tautō ai o ia ‘iā te i latou, o le mea lava lea ‘ua na fasia ai i latou i le vao.’
17. O lenei, ‘ou te ‘ai‘oi atu ‘iā te oe, ‘ia tele le mamana o lo‘u Ali‘i, e pei ‘ona e fetalai mai ai, ‘ua fa‘apea,
18. ‘O le ALI‘I e telegese lona to‘asā,e tele fo‘i le alofa,e fa‘amāgalo atu i le agasala ma le solitulafono,‘ae lē fa‘asaoina lava o ē agasala,e tauia e ia le agasala a mātua i le fānaue o‘o i le tolu ma le fa o tupulaga.’
19. ‘Ou te ‘ai‘oi atu lava, ‘ia e fa‘amāgalo le agasala a lenei nu‘u, ‘ia tusa ma le tele o lou alofa, e pei na e fa‘amāgaloina atu fo‘i i lenei nu‘u talu ‘ona ō mai i Aikupito ‘ua o‘o lava i ona po nei.”
20. ‘Ona fetalai mai ai lea o le ALI‘I, “‘Ua ‘ou fa‘amāgaloina atu e tusa ma lau ‘upu;
21. ‘ae peita‘i, o lo‘o ola a‘u, e fa‘atumuina lava le lalolagi uma lava i le mamalu o le ALI‘I;
22. auā o na tagata uma o ē na iloa lo‘u mamalu ma ‘ou fa‘ailoga na ‘ou faia i Aikupito ma le vao, ma na tofotofo fa‘asefulu lava ‘iā te a‘u, ma latou lē fa‘alogo i lo‘u leo;
23. latou te lē iloa lava le nu‘u na ‘ou tautō ai i o latou tamā, e leai lava so latou o ē ‘ino‘ino mai ‘iā te a‘u e va‘ai i ai.
24. A o la‘u ‘au‘auna o Kalepo, ‘ona ‘ua ‘iā te ia le loto e ‘ese i o latou, ‘ua na matua mulimuli mai lava ‘iā te a‘u, o le mea lea ‘ou te fa‘ao‘o ai ‘iā te ia i le nu‘u na ia alu atu i ai, e fai fo‘i lea mo lana fānau.
25. (Sa nonofo sa Amaleka ma sa Kananā i le vanu.) A taeao ia ‘outou liliu ane, ma ō atu i le vao, i le ala i le sami Ulaula.”
26. ‘Ua fetalai mai fo‘i le ALI‘I ‘iā Mose ma Arona, ‘ua fa‘apea mai:
27. ‘Ou te fa‘apalepale ‘ea se‘ia afea i lenei fa‘apotopotoga leaga, o i latou lava o ē muimui mai ‘iā te a‘u? ‘Ua ‘ou lagona lava i muimuiga a le fānauga a Isaraelu na latou muimui mai ai ‘iā te a‘u.
28. ‘Ia e fai atu ‘iā te i latou, “O lo‘o ola a‘u,” o lo‘o fai mai le ALI‘I, “‘Ou te faia lava ‘iā te ‘outou e pei o a ‘outou ‘upu ‘ua o‘o mai i o‘u taliga:
29. e oti o ‘outou tino i lenei lava vao; o ‘outou uma lava na faitaulia, e tusa ma le faitau aofa‘i o ‘outou uma, e āfua mai i ē ‘ua luafulu o latou tausaga ‘atoa ma ē ‘ua matutua ai, o ē na muimui mai ‘iā te a‘u;
30. tou tō lē o‘o atu lava i le nu‘u na ‘ou tautō ai tou te nonofo ai, na o Kalepo le atali‘i o Iefune, ma Iosua le atali‘i o Nuno.
31. A o ‘outou tamaiti na ‘outou fai mai ai, E fai i latou ma tagata o tau‘a, ‘ou te fa‘ao‘o ‘iā te i latou, latou te iloa lava le nu‘u ‘ua ‘inosia e ‘outou.
32. A o ‘outou, e oti o ‘outou tino i lenei lava vao.
33. O a ‘outou fānau fo‘i latou te feoa‘i i le vao e fagafulu o tausaga, o tau‘ave fo‘i e i latou a ‘outou mulilulua, se‘ia fa‘aumatia o ‘outou tino i le vao.
34. E fa‘atatau i le faitau o po ‘ua ‘outou asiasi ai le nu‘u, e fagafulu o po, o le po e tasi o le fa‘atatau lea o le tausaga e tasi, e fagafulu o tausaga lava tou te tau‘ave ai a ‘outou agasala, ‘ona ‘outou iloa ai lea o lo‘u lafoa‘iina a ‘outou.”
35. O a‘u lava o le ALI‘I, ‘ua ‘ou fai atu, ‘ou te matua faia lava i lenei fa‘apotopotoga leaga uma lava o ē ‘ua fa‘apotopotoina e tete‘e mai ‘iā te a‘u; e fa‘aumatia i latou i lenei lava vao, ma latou oti ai lava.
36. O tagata fo‘i na ‘a‘auina e Mose e asiasi i le nu‘u, ma latou toe fo‘i mai, ma fa‘atupuina le muimui o le fa‘apotopotoga uma ‘iā te ia i lo latou fai tala leaga i le nu‘u,
37. o ia lava tagata na fai tala leaga i le nu‘u, ‘ua oti lava i latou i le mala i luma o le ALI‘I.
38. A o Iosua le atali‘i o Nuno, ma Kalepo le atali‘i o Iefune na ola i lā‘ua a‘i ia tagata na ō e asiasi i le nu‘u.
39. ‘Ua talatalaina atu e Mose ia ‘upu i le fānauga a Isaraelu uma lava, ‘ona matuā tele ai lea o le fa‘anoanoa o le nu‘u.
40. ‘Ona latou usuusu ai lea i le taeao, ma ō a‘e i le tumutumu mauga, ‘ua fa‘apea ane, “Fa‘auta, o i matou nei, matou te ō a‘e i le mea na fetalai mai ai le ALI‘I; auā ‘ua matou agasala.”
41. A ‘ua fai atu Mose, “Se a le mea tou te soli ai le afioga a le ALI‘I? ‘ae lē manuia lava lea mea.
42. ‘Aua lava tou te ō a‘e, auā e lē o ‘iā te ‘outou le ALI‘I; ‘ina ne‘i fasia ‘outou i luma o ē fai ‘outou ma fili.
43. Auā o i ai i o ‘outou luma o sa Amalekā ma sa Kananā, e oti lava ‘outou i le pelu; auā ‘ua ‘outou liliu ‘ese i le ALI‘I, o le mea lea e lē i ai le ALI‘I ‘iā te ‘outou.”
44. A ‘ua latou o fa‘amaualuga i le tumutumu mauga; a o le ‘atola‘au o le feagaiga a le ALI‘I ma Mose e le‘i te‘a ‘ese ia ma le toagalauapi.
45. ‘Ona ō ifo ai lea o sa Amalekā ma sa Kananā o ē na mau i lenā mauga, ma latou fasia i latou, ma tutuli ‘iā te i latou ‘ua o‘o lava i Horema.