1. ‘Ona fetalai mai lea o le ALI‘I ‘iā Mose ‘ua fa‘apea mai:
2. ‘Ia e tautala atu i le fānauga a Isaraelu, ‘ia e ‘aumaia fo‘i mai ‘iā te i latou o to‘oto‘o, ta‘itasi ‘āiga o latou tamā ma le to‘oto‘o; ‘ia e ‘aumai o latou ali‘i sili i ‘āiga o latou tamā, o to‘oto‘o e sefulu ma le lua; ‘ia e tusi fo‘i le igoa o le tagata i lona to‘oto‘o.
3. ‘Ia e tusi fo‘i le igoa o Arona i le to‘oto‘o o Levi; auā e ta‘itasi le to‘oto‘o i matai o ‘āiga o latou tamā.
4. ‘Ia e tu‘u ai fo‘i i le fale fetāfa‘i o le fa‘apotopotoga i luma o le ‘atola‘au o le tulafono, o le mea tatou te fetaia‘i ai ma ‘outou.
5. ‘Ona o‘o ai lea ‘ina fotu mai le to‘oto‘o o le tagata ‘ou te filifilia, ‘ou te fa‘agata fo‘i i o‘u luma o muimuiga a le fānauga a Isaraelu ‘ua latou muimui mai ai ‘iā te ‘oulua.
6. ‘Ua fai atu fo‘i Mose i le fānauga a Isaraelu, ‘ona ‘aumai ai lea ‘iā te ia e o latou ali‘i sili uma lava, e ta‘ito‘atasi le ali‘i sili ma le to‘oto‘o i ‘āiga o latou tamā, o to‘oto‘o e sefulu ma le lua; sa fa‘atasi fo‘i le to‘oto‘o a Arona ma o latou to‘oto‘o.
7. ‘Ona tu‘u ai lea e Mose o to‘oto‘o i luma o le ALI‘I, i le fale fetāfa‘i e i ai le tulafono.
8. ‘Ua o‘o i le aso taeao, ‘ona ulu atu ai lea o Mose i le fale fetāfa‘i e i ai le tulafono, fa‘auta fo‘i ‘ua fotu mai le to‘oto‘o o Arona mo le ‘āiga o Levi; ‘ua fotu mai lava ‘ua matala mai fuga, ‘ua fua mai sekati matutua.
9. ‘Ona ‘ave ai lea e Mose o to‘oto‘o i luma o le ALI‘I i le fānauga o Isaraelu uma lava, ‘ona latou iloilo ai lea, ‘ua latou ta‘ito‘atasi ma ‘ave lona to‘oto‘o.
10. ‘Ona fetalai mai ai la o le ALI‘I ‘iā Mose, “‘Inā toe ‘aumaia ia le to‘oto‘o o Arona i luma o le ‘atola‘au o le tulafono e tu‘u ai, e fai ma fa‘ailoga i tagata fouvale; ‘e te fa‘agata ai o latou muimuiga i o‘u luma, ‘ona lē oti ai lea o i latou.”
11. ‘Ona faia lea e Mose e pei ‘ona poloa‘i mai ai o le ALI‘I ‘iā te ia, ‘ua fa‘apea lava ‘ona fai e ia.
12. ‘Ona fai mai ai lea o le fānauga a Isaraelu ‘iā Mose, ‘ua fa‘apea mai, “Fa‘auta a oti i matou o le a matou fano, o i matou uma lava o le a matou fano.
13. ‘Ai sē fa‘alatalata mai i le malumalu o le ALI‘I e oti lava ia; pe fa‘aumatia ‘ea matou i le oti?”#