1. ‘Ua fa‘alogo le tupu o Arata, o le sa Kananā, sa nofo i le itū i saute, ‘ua ō mai Isaraelu i le ala o Atarima, ‘ona tau ai lea o ia ma Isaraelu, ‘ua na ‘ave fo‘i nisi o i latou fa‘atagataotau‘a.
2. ‘Ona faia lea e Isaraelu o lana tautō i le ALI‘I, ‘ua fa‘apea atu, “‘Āfai ‘e te tu‘uina mai lava lenei nu‘u i lo‘u lima, ‘ona ‘ou matuā fa‘aumatia ai lea o a latou ‘a‘ai.”
3. ‘Ua fa‘afofoga le ALI‘I i le ‘upu a Isaraelu, ‘ua tu‘uina atu e ia o sa Kananā, ‘ona latou matuā fa‘aumatia ai lea o i latou, ‘atoa ma a latou ‘a‘ai; ‘ona fa‘aigoa ai lea e ia o lea mea o Horema.
4. ‘Ona ō lea o i latou a‘i le mauga o Horo i le ala i le sami Ulaula, ‘ina ‘ia fa‘ata‘amilo i le nu‘u o Etoma; ‘ona tigā lea o loto o le nu‘u ‘ona o le ala.
5. ‘Ona fai ‘upu ai lea o le nu‘u i le Atua ma Mose, ‘ua fa‘apea, “Se a ‘ea le mea na ‘oulua ‘aveina a‘e ai i matou nai Aikupito e oti ai i le vao? auā e leai ni mea e ‘ai, e leai fo‘i ni vai, o lo‘o ‘ino‘ino fo‘i o matou loto i nei mea e ‘ai fa‘atauva‘a.”
6. ‘Ona ‘auina mai ai lea e le ALI‘I o gata uogo i le nu‘u, ‘ua feutia ai le nu‘u, ‘ona oti ai lea o tagata e to‘atele o Isaraelu.
7. ‘Ona ō mai ai lea o le nu‘u ‘iā Mose, ‘ua latou fa‘apea mai, “‘Ua matou agasala, auā ‘ua matou fai ‘upu i le ALI‘I ‘atoa fo‘i ma oe; ‘ia e tatalo atu i le ALI‘I ‘ia ‘ave ‘ese e ia ia gata ‘iā te i matou.” ‘Ona tatalo ai lea o Mose mo le nu‘u.
8. ‘Ona fetalai mai ai lea o le ALI‘I ‘iā Mose, “‘Ia e faia se gata uogo, ma tu‘u a‘e i luga i se la‘au, ‘ona ta‘itasi ai lea ma ola o ē ‘ua utia pe a va‘ava‘ai atu i ai.”
9. ‘Ona faia lea e Mose o le gata ‘apamemea, ma tu‘u a‘e i luga i se la‘au; ‘ona fa‘apea ai lea, ‘āfai ‘ua utia se tasi e se gata, pe a va‘ai o ia i le gata ‘apamemea ‘ua ola lava ia.
10. ‘Ona ō atu ai lea o le fānauga a Isaraelu, ma latou tolauapi i Opoto.
11. ‘Ona ō atu lea o i latou a‘i Opoto, ma latou tolauapi i Ieaperima i le vao, o lo‘o feagai ma Moapi, i le itū e alu a‘e ai le la.
12. ‘Ua ō atu i latou a‘i lea mea, ma latou tolauapi i le alia o Sareta.
13. ‘Ona ō atu lea o i latou a‘i lea mea, ma latou tolauapi i tala atu o Arinona, o lo‘o i le vao e alu atu i le tuā‘oi o sa Amorī; auā o Arinona o le tuā‘oi lea o Moapi i le vā o Moapi ma sa Amorī.
14. O le mea lea ‘ua fai mai ai i le tusi o tau‘a a le ALI‘I, “O Vaepa i Sufo, ma alia i Arinona;
15. o le tafe fo‘i o alia o lo‘o alu ifo i le mea e i ai Aro, tafe ane i le tuā‘oi o Moapi.”
16. ‘Ona latou ō atu lea ai lea mea, ‘ua o‘o i Pere; o le vai‘eli lea na fetalai mai ai le ALI‘I ‘iā Mose, ‘ua fa‘apea mai, “‘Inā fa‘apotopoto mai ia le nu‘u, ‘ona ‘ou foa‘i atu ai lea o le vai ‘iā te i latou.”
17. ‘Ona pepese ai lea o Isaraelu i lenei pese,“Le vai‘eli e, ‘inā e puna a‘e ia;‘ia ‘outou tali atu i ai.
18. O le vai‘eli na ‘elia e ali‘i,na ‘elia e ali‘i o le nu‘u,‘atoa ma le faipule,i o latou to‘oto‘o.”‘Ona ō lea o i latou a‘i vao, ‘ua o‘o atu i Matana.
19. ‘Ona ō lea o i latou a‘i Matana, ‘ua o‘o atu i Nalielu. ‘Ona ō lea o i latou a‘i Nalielu, ‘ua o‘o atu i Pamota.
20. ‘Ona latou ō atu lea a‘i Pamota i le vanu i le lau‘ele‘ele o Moapi, ‘ua o‘o atu i le tumutumu o Peseka, e fesagai ma le vao.
21. ‘Ona ‘a‘auina atu lea e Isaraelu o le sāvali ‘iā Sekono le tupu o sa Amorī; ‘ua fa‘apea atu,
22. “Se‘i ‘ou ui atu i lou nu‘u matou te lē afe ane i fanua po o tōvine; matou te lē feinu fo‘i i vai‘eli; na o le ala tele o le tupu matou te ui atu ai, se‘ia matou tuana‘i atu le tuā‘oi o lou nu‘u.”
23. ‘Ua lē mafai Sekono ‘ona ui atu o Isaraelu i lona nu‘u; a ‘ua fa‘apotopotoina e Sekono lona nu‘u uma, ‘ua alu atu fo‘i o ia e tete‘e ‘iā Isaraelu i le vao; ‘ua o‘o atu ‘iā i Iaesa, ‘ua tau ai ma Isaraelu.
24. ‘Ona fasia lea o ia e Isaraelu i le pelu, ‘ua fai fo‘i mo latou lona nu‘u, e amata i Arinona e o‘o atu i Iapoka, e o‘o atu lava i le nu‘u o le fānauga a Amoni; auā sa faigatā le tuā‘oi o le fānauga a Amoni.
25. ‘Ua ā‘ea fo‘i e Isaraelu ia ‘a‘ai uma, ‘ua mau fo‘i Isaraelu i ‘a‘ai uma o sa Amorī; o Hesepona ma ona faoa ‘a‘ai uma lava.
26. Auā o Hesepona o le ‘a‘ai lea o Sekono le tupu o sa Amorī; o ia fo‘i sa mua‘i tau ma le tupu o Moapi, ma faoa lona nu‘u uma ‘ua pa‘i atu i Arinona.
27. O le mea lea ‘ua fa‘apea mai ai o ē fai fa‘ata‘oto,“‘Inā ō mai ia i Hesepona, se‘i atiina a‘e,ma teuteua le ‘a‘ai o Sekono.
28. Auā ‘ua alu atu le afi nai Hesepona,o le afi mumū nai le ‘a‘ai o Sekono,‘ua susunuina ai Aro o Moapi,o ali‘i o mea maualuluga i Arinona.
29. ‘Oi talofa ‘iā te oe, Moapi e,‘ua fano oe, le nu‘u o Kimosa;‘ua tu‘uina e ia ona atali‘i na sao,ma ona afafine e fai ma tagata o tau‘a ‘iā Sekono le tupu o sa Amorī.
30. Sa matou fanafana atu ‘iā te i latou;‘ua fano Hesepona e o‘o i Tipona;sa matou fa‘atafuna ‘iā te i latou ‘ua pa‘i atu i Nofa, e tuā‘oi ma Metepa.”
31. ‘Ua mau Isaraelu i le nu‘u o sa Amorī;
32. ‘Ona ‘a‘auina atu ai lea e Mose nisi e asiasi i Iasaru ‘ua faoa fo‘i e i latou ona faoa ‘a‘ai, ma latou tutuli‘eseina sa Amorī na i ai.
33. ‘Ona latou liliu ane lea, ma ō a‘e i le ala i Vasana; ‘ona alu atu ai lea o Oko le tupu o Vasana e tete‘e ‘iā te i latou, o ia ‘atoa ma lona nu‘u uma e tau ai le tau‘a i Eterei.
34. ‘Ona fetalai mai ai lea o le ALI‘I ‘iā Mose, “‘Aua ‘e te fefe ‘iā te ia; auā ‘ua ‘ou tu‘uina atu i lou lima o ia, ma lona nu‘u uma, ma lona lau‘ele‘ele; ‘e te faia fo‘i ‘iā te ia e pei ‘ona e faia ‘iā Sekono le tupu o sa Amorī; o lē na mau i Hesepona.”
35. ‘Ona latou fafasi ai lea ‘iā te ia, ma ona atali‘i, ‘atoa ma lona nu‘u uma, ‘ua lē toe i ai se to‘atasi ‘iā te ia; ‘ona latou fai ai lea o lona lau‘ele‘ele mo i latou.#