1. ‘Ua fai mai so‘o o le ‘au perofeta ‘iā Elisaia, “Fa‘auta mai, o le mea tatou te mau ai nei ma oe, ‘ua fetina‘i ai tatou.
2. Se‘i matou ō ia i Ioritana ma ta‘itasi le tagata ma ‘ave ai lana la‘au matou te fai a‘i i lea mea se fale tatou te mau ai.”‘Ona tali atu ai lea o ia, “‘Inā ō ia.”
3. ‘Ona fai mai lea o le tasi, “Se‘i tatou ō ma i matou o au ‘au‘auna.”‘Ona fai atu lea o ia, “Tatou te ō lava.”
4. ‘Ona latou ō ai lea ma ia. ‘Ua o‘o fo‘i i latou i Ioritana, ‘ona latou ta la‘au ai lea.
5. ‘Ua ta e le tasi le la‘au, ‘ona pa‘ū ‘ese lea o le uluto‘i i le vai; ‘ona ‘alaga lea o ia, ‘ua fa‘apea mai, “Auē! le ali‘i e; auā o le mea nonō.”
6. ‘Ona fai atu ai lea o le tagata o le Atua, “Pe na pa‘ū ifea?”‘Ona fa‘asino mai ai lea e ia o le mea. ‘Ona vavae mai ai lea e ia o se la‘au, ‘ua lafo atu i ai; ‘ona opeopea ai lea o le uluto‘i.
7. ‘Ona fai atu ai lea o ia, “‘Inā ‘ava‘e ia.” ‘Ona ‘a‘apa atu ai lea o ia lona lima, ‘ua tago i ai.
8. ‘Ua si‘i mai e le tupu o Suria le tau‘a ‘iā Isaraelu, ‘ua latou filifili, o ia ma ana ‘au‘auna, ‘ua fa‘apea, “O lea mea ma lea mea e fai ai le toagalauapi.”
9. ‘Ona avatu lea o le fe‘au a le tagata o le Atua i le tupu o Isaraelu, ‘ua fa‘apea atu, “‘Ia oe, ne‘i e ui ane i lea mea, auā ‘ua ō ifo i ai Suria.”
10. ‘Ona ‘a‘auina lea nisi e le tupu o Isaraelu i le mea na fai atu ai le tagata o le Atua ma fa‘asino atu ‘iā te ia; ‘ua fa‘aola ai o ia e ia i lea mea, e lē na o le atu tasi pe atu lua.
11. O le mea lea ‘ua atuatuvale tele ai le loto o le tupu o Suria; ‘ona vala‘au ai lea o ia i ana ‘au‘auna, ‘ua fa‘apea atu ‘iā te i latou, “Tou te lē fa‘aali mai ‘ea ‘iā te a‘u po o ai so tatou e ‘au ma le tupu o Isaraelu?”
12. ‘Ona fai mai ai lea o le tasi ana ‘au‘auna, “Le ali‘i e, le tupu, e leai lava; a o Elisaia le perofeta o i Isaraelu, o ia na te fa‘aalia i le tupu o Isaraelu mea ‘e te fetalai i lou tofaga.”
13. ‘Ona fai atu ai lea o ia, “‘Inā ō ia, ia iloilo le mea e i ai o ia, ‘ou te ‘a‘auina atu nisi e pu‘e ‘iā te ia.”‘Ona ta‘ua mai ai lea ‘iā te ia, ‘ua fa‘apea mai, “Fa‘auta, e i Totana o ia.”
14. ‘Ona ‘a‘auina atu ai lea e ia i lea mea o solofanua ma kariota ma ‘au e tele. ‘Ua latou o‘o po atu, ‘ona latou si‘o lea o le ‘a‘ai.
15. ‘Ua tula‘i le ‘au‘auna a le tagata o le Atua i le taeao lava, ‘ua alu i fafo, fa‘auta, o ‘au ‘ua si‘o le ‘a‘ai ma a latou solofanua ma kariota. ‘Ona fai mai ai lea o lana ‘au‘auna ‘iā te ia, “Auē! le ali‘i e, pe fa‘apefea se mea tatou te fai a‘i?”
16. ‘Ona tali atu ai lea o ia, “‘Aua ‘e te fefe, auā e to‘atele ‘ua ‘iā te i tatou i ē ‘ua ‘iā te i latou.”
17. ‘Ona tatalo ai lea o Elisaia, ‘ua fa‘apea atu, “Le ALI‘I e, ‘ia e fa‘apupula i ona mata ‘ina ‘ia na iloa.” ‘Ona fa‘apupulaina lea e le ALI‘I o mata o le taule‘ale‘a, ‘ona iloa ai lea e ia, fa‘auta fo‘i, ‘ua tumu le mauga i solofanua ma kariota afi, ‘ua latou vagavagai ‘iā Elisaia.
18. ‘Ua ō ifo ‘au ‘iā te ia, ‘ona tatalo atu ai lea o Elisaia i le ALI‘I, ‘ua fa‘apea atu, “‘Ia e fa‘atauasoina nei tagata.” ‘Ona fa‘atauasoina lea e ia o i latou, e tusa ma le ‘upu a Elisaia.
19. ‘Ona fai atu lea o Elisaia ‘iā te i latou, “E lē o le ala lenei, e lē o le ‘a‘ai fo‘i lenei; mulimuli mai ia ‘iā te a‘u, ‘ou te ta‘ita‘i ‘iā te ‘outou i le tagata tou te sā‘ilia na.” A ‘ua na ta‘ita‘i ‘iā te i latou i Samaria.
20. ‘Ua o‘o atu i latou i Samaria, ‘ona fa‘apea atu ai lea o Elisaia, “Le ALI‘I e, ‘ia e fa‘apupulaina mata o nei tagata ‘ina ‘ia latou iloa.” ‘Ona fa‘apupulaina ai lea e le ALI‘I o latou mata, ‘ona latou iloa ai lea, fa‘auta fo‘i, ‘ua latou i totonu o Samaria.
21. ‘Ua iloa mai i latou e le tupu o Isaraelu, ‘ona fai mai ai lea o ia ‘iā Elisaia, “Sena e, a a‘u fasia ‘ea, a a‘u fasia?”
22. ‘Ona tali atu ai lea o ia, “‘Aua ‘e te fafasi; ‘e te fasia ‘ea i latou na e fa‘atagataotau‘aina i lau pelu ma lau ‘aufana? ‘Inā laulau atu ia i o latou luma ni mea e ‘ai ma ni vai, latou te ‘a‘ai ma feinu ai, i le latou o ai i lo latou ali‘i.”
23. ‘Ona sauni ai lea e ia o mea e ‘ai e tele mā latou; ‘ua latou ‘a‘ai ma feinu, ‘ona tu‘uina atu lea o i latou e ia, ‘ua latou o i lo latou ali‘i. ‘Ona lē toe ō mai ai lea o ‘au a Suria i le nu‘u o Isaraelu.
24. ‘Ua mavae nei mea, ‘ona fa‘apotopoto ai lea e Peniata le tupu o Suria o ana ‘au uma, ‘ua alu a‘e, ‘ua vagaia Samaria.
25. ‘Ona tele ai lea o le oge i Samaria; fa‘auta fo‘i, ‘ua latou vagaia, ‘ua i‘u ‘ina fa‘ataulia le ulu o le asini i tupe e valugafulu ma le vaefāgalemū o le kape o kirio i tupe e lima.
26. ‘Ua ui ane le tupu o Isaraelu i luga o le pā, ‘ona vala‘au lea o le tasi fafine ‘iā te ia, ‘ua fa‘apea atu, “Le ali‘i e, le tupu, fesoasoani mai ia.”
27. ‘Ona tali mai ai lea o ia, “A le fesoasoani le ALI‘I ‘iā te oe, ‘ou te fesoasoani ‘iā te oe i ni ā? ai le mea e soli ai saito ‘ea, pe mai le tu‘ugāuaina?”
28. ‘Ua fai mai fo‘i le tupu ‘iā te ia, “O le a ‘ea?”‘Ona tali atu ai lea o ia, “Na fai mai le fafine nei ‘iā te a‘u, ‘‘Ia e ‘aumaia lau tama tane, tā te ‘aina i le aso, ‘ae tā ‘aina la‘u tama taeao.’
29. ‘Ona mā tunu ai lea o la‘u tama, ‘ua ma ‘aina. ‘‘Ona ‘ou fai atu ai lea ‘iā te ia i le tasi aso, ‘ia e ‘aumai lau tama tā te ‘aina.’ A ‘ua nanā e ia lana tama.”
30. ‘Ua fa‘alogo le tupu i ‘upu a le fafine, ‘ona saei lea e ia ona ‘ofu, ‘ona savali ane lea i luga o le pā, ‘ona iloa ai lea e le nu‘u, fa‘auta, o le ‘ie talatala i totonu, ‘ua aupito i lona tino.
31. ‘Ona fa‘apea ane lea o ia, “‘Ia fa‘apea ‘ona faia mai e le Atua ‘iā te a‘u ma ia fa‘aopoopo i ai, pe ‘āfai ‘ae po le asō o tumau le ulu o Elisaia le atali‘i o Safata ‘iā te ia.”
32. A ‘ua nofo Elisaia i lona fale, o lo‘o latou o nonofo ai ma toeaina.‘Ona ‘auina lea e le tupu o le tagata nai ona luma; a o le‘i o‘o mai ‘iā te ia lē na ‘auina, na ia fai atu i toeaina, “‘Ua ‘outou iloa ‘ea ‘ua ‘auina mai se tasi e lenā atali‘i o le fasioti tagata e tutū i lo‘u ulu? Va‘ai ia ‘outou, pe a sau lē ‘ua ‘auina mai, ‘ia ‘outou pupuni le faitoto‘a ma ‘ia ‘outou tāofi mau ‘iā te ia i le faitoto‘a; e lē mulimuli mai ‘ea ‘iā te ia le pa‘u‘ū mai o vae o lona ali‘i?”
33. E le‘i uma atu ana ‘upu ‘iā te i latou, fa‘auta, ‘ua o‘o mai ‘iā te ia o lē na ‘auina mai. ‘Ona fai ane lea o ia, “Fa‘auta, mai i le ALI‘I lenei mala; se a se mea ‘ou te toe fa‘atali atu ai i le ALI‘I?”#