1. O le sefulu ma le fitu o tausaga o Peka le atali‘i o Remalia na fai ai ma tupu Aasa le atali‘i o Iotama le tupu o Iuta.
2. O le luafulu o ona tausaga na fai ai Aasa ma tupu; e sefulu ma le ono fo‘i tausaga na fai ai o ia ma tupu i Ierusalema; ‘ua na lē faia le amiotonu i luma o le ALI‘I lona Atua fa‘apei o Tavita lona tamā.
3. A ‘ua na savali i le ala o tupu o Isaraelu ma na fa‘aui ane lava lona atali‘i i le afi, fa‘apei o tu leaga a nu‘u ‘ese e na tulia e le ALI‘I i luma o le fānauga a Isaraelu.
4. ‘Ua ia faia fo‘i taulaga ma fa‘amū mea manogi i mea maualuluga, i luga fo‘i o mauga, ‘atoa ma lalo o la‘au lauolaola uma.
5. O ona po ia na ō a‘e ai Resina le tupu o Suria, ma Peka le atali‘i o Remalia le tupu o Isaraelu e tau ma Ierusalema; ‘ua la si‘omia Aasa, ‘ae le‘i mafaia ‘ona la manumālō.
6. O ona po ia na toe faoa ai e Resina le tupu o Suria o Elata mo Suria, ‘ua na tuli fo‘i sa Iutā nai Elata; ‘ona ō mai ai lea o tagata Suria i Elata, ‘ua latou nonofo ai, ‘ua o‘o mai lava i le aso nei.
7. ‘Ona ‘auina atu ai lea e Aasa o le sāvali ‘iā Tikila-pilesa le tupu o Asuria, ‘ua fa‘apea atu, “O a‘u o lau ‘au‘auna ma lou atali‘i; ‘inā afio mai ia e fa‘aola ‘iā te a‘u i le lima o le tupu o Suria ma le lima o le tupu o Isaraelu, ‘ua la si‘i mai le tau‘a ‘iā te a‘u.”
8. ‘Ua ‘ave fo‘i e Aasa ario ma auro na i ai i le fale o le ALI‘I ma mea e teu ai ‘oloa i le fale o le tupu, ‘ua avatu e fai ma mea alofa i le tupu o Asuria.
9. ‘Ona talia ai lea o ia e le tupu o Asuria; ‘ona alu a‘e ai lea o le tupu o Asuria i Tamaseko ma na ā‘ea, ma na fa‘atāfeaina i latou i Kira, ‘ua na fasioti fo‘i ia Resina.
10. ‘Ona alu atu ai lea o le tupu o Aasa i Tamaseko e feiloa‘i ma Tikila-pilesa le tupu o Asuria; ‘ona iloa ai lea e ia o le fatafaitaulaga i Tamaseko, ‘ona tusitusi atu ai lea e le tupu o Aasa ‘iā Uria le ositaulaga o le fa‘atusa o le fatafaitaulaga ma lona fuafua, o lona uiga uma lava.
11. ‘Ona faia lea e Uria le ositaulaga o le fatafaitaulaga e tusa ma mea uma na poloa‘i mai ai le tupu o Aasa i Tamaseko; ‘ua fa‘apea ‘ona faia e Uria e fa‘atali atu i le sau o le tupu o Aasa mai Tamaseko.
12. ‘Ua sau le tupu mai Tamaseko, ‘ona iloa ai lea e le tupu o le fatafaitaulaga; ‘ona fa‘alatalata atu ai lea o le tupu i le fatafaitaulaga, ‘ua faitaulaga ai i ona luga.
13. ‘Ua na susunu fo‘i lana taulaga mū ma lana taulaga i mea e ‘ai, ‘ua na liligi atu fo‘i lana taulaga i mea e inu, ‘ua na sausau fo‘i le toto o ana taulaga fa‘afetai i luga o le fata.
14. ‘Ua na si‘i ‘ese fo‘i le fata ‘apamemea sa i luma o le ALI‘I nai luma fale, nai le vā o le fata ma le fale o le ALI‘I ma tu‘u ai i le itū i matū o le fatafaitaulaga.
15. ‘Ona fai atu ai lea o Aasa le tupu ‘iā Uria le ositaulaga, ‘ua fa‘apea atu, “E susunu i luga o le fata tele le taulaga mū o le taeao ma le taulaga i mea e ‘ai o le afiafi, ‘atoa fo‘i ma le taulaga mū a le tupu ma lana taulaga i mea e ‘ai, o le taulaga mū fo‘i a tagata uma o le nu‘u, ‘atoa ma a latou taulaga i mea e ‘ai ma a latou taulaga i mea e inu; e sausau fo‘i i ona luga le toto uma o le taulaga mū ma le toto uma o taulaga; ‘ae ‘iā te a‘u le fata ‘apamemea, ‘ou te sā‘ili atu ai.”
16. ‘Ona faia lea e Uria le ositaulaga e tusa ma mea uma ‘ua fai atu ai le tupu o Aasa.
17. ‘Ua vavae ‘ese fo‘i e le tupu o Aasa itū o tu‘ugātanoa, ‘ua tu‘u ‘ese fo‘i le tanoa e mulumulu ai i o latou luga, ‘ua na tu‘u i lalo fo‘i le vai nai luga o povi ‘apamemea sa i ona lalo ma ‘ua tu‘u ai i luga o le paepae.
18. ‘Ua na liliu ‘ese fo‘i ai le fale o le ALI‘I le fa‘apaologa o le sapati na latou faia i le fale, ‘atoa ma le ala o le tupu i fafo, ‘ae tu‘u mo le tupu o Asuria.
19. O toe o mea a Aasa na ia faia, e le‘i tusia ‘ea i le tusi o tala i nofoa‘iga a tupu o Iuta?
20. ‘Ua ta‘oto fo‘i Aasa fa‘atasi ma ona tamā, ‘ua tanu fo‘i fa‘atasi ma ona tamā i le ‘a‘ai o Tavita; ‘ona soloa‘i ane ai lea o Esekia lona atali‘i e fai ma tupu.#