1. ‘Ona fai atu ai lea o Elisaia, “Fa‘alogologo mai ia ‘outou i le afioga a le ALI‘I, O lo‘o fa‘apea ‘ona fetalai mai o le ALI‘I, O le itū aso fa‘apenei a taeao, e fa‘ataulia i le faitoto‘a o Samaria le fua o falaoa lelei i le sekeli, e lua fo‘i sea o karite i le sekeli.”
2. ‘Ona tali mai ai lea o le tasi ali‘i, “Sa toto‘o ai le tupu i lona lima, i le tagata o le Atua, ‘ua fa‘apea mai, Fa‘auta mai, ‘āfai e faia e le ALI‘I ni faitoto‘a i le lagi e ‘iloga ‘ea e o‘o lenā mea?”‘Ona fai atu ai lea o ia, “Fa‘auta mai, ‘e te iloa ai i ou fofoga, ‘ae ‘e te lē ‘ai ai.”
3. Na i ai fo‘i i le mea e ui atu ai i le faitoto‘a tagata lepela e to‘afa, ‘ua fetautalatala‘i i latou, “Se a le mea tatou te nonofo ai pea ‘i‘inei se‘ia oti?
4. ‘Āfai tatou te fa‘apea, ‘Tatou te ō i le ‘a‘ai,’ o lo‘o i ai le oge, ‘ona tatou oti ai lea i lea mea; ‘āfai fo‘i tatou te nonofo ai pea ‘i‘inei, tatou te oti ai fo‘i. ‘Inā ō mai ia, ‘inā tatou sōsōla i le itūtau‘a a Suria; ‘āfai latou te fa‘aola ‘iā te i tatou, tatou te ola; ‘ae ‘āfai latou te fasioti ‘iā te i tatou, na ‘ona tatou oti lava.”
5. ‘Ona latou tula‘i ai lea i le po, o le a ō atu i le toagalauapi a Suria; ‘ua o‘o fo‘i i latou i le toagalauapi pito mai a Suria, fa‘auta fo‘i, e le‘i i ai se tagata.
6. Auā na fa‘afa‘alogoina e le Ali‘i i le togālauapi a Suria le ta‘alili o kariota ma le ta‘alili o solofanua, o le ta‘alili o ‘au e tele. ‘Ona latou fetautalatala‘i ai lea, “Fa‘auta, ‘ua fa‘a‘oloatau‘aina e le tupu o Isaraelu o tupu o sa Hetī ma tupu o Aikupito e ō mai e tau, ma i tatou.”
7. ‘Ona latou tula‘i ai lea, ‘ua sōsōla i le po, ‘ua tu‘ulafoa‘i fo‘i o latou fale ‘ie ma a latou solofanua, ma a latou asini ma le toagalauapi pei ‘ona i ai, ‘ua sōsōla lava i le fia ola.
8. ‘Ua o‘o atu ia lepela i le toagalauapi pito mai, ‘ona latou ulu atu lea i le tasi fale ‘ie, ‘ua ‘a‘ai ma feinu, ‘ua latou ‘avea ai fo‘i ario ma auro, ‘atoa ma ‘ofu, ‘ona ō ai lea ‘ua nanā ai; ‘ona toe fo‘i lea, ‘ua ulu atu i le tasi fale ‘ie, ‘ua latou ‘avea ai fo‘i mea, ‘ona ō ai lea ‘ua nanā.
9. ‘Ona latou fetautalatala‘i ai lea, “E lē tatau le mea o tatou o faia nei, o le aso manuia lenei aso, a ‘ua tatou fa‘alologo pe ‘āfai tatou te fa‘atali se‘ia malama a‘e le taeao, ‘ona o‘o mai ai lea o le sala ‘iā te i tatou; ‘inā ō mai ia, ‘inā tatou ō e ta‘u atu i le ‘āiga o le tupu.”
10. ‘Ona latou ō mai ai lea, ‘ua vala‘au i le leoleo faitoto‘a o le ‘a‘ai ‘ua tala mai ‘iā te i latou, ‘ua fa‘apea mai, “Na matou ō atu i le toagalauapi a Suria; fa‘auta fo‘i, ‘ua leai se tagata o i ai, po o se leo o se tagata; ‘ua na o solofanua o noatia ma asini o noatia ma fale ‘ie pei ‘ona i ai.”
11. ‘Ona vala‘au lea o ia i leoleo faitoto‘a, ‘ona latou ta‘u atu ai lea i falē i le ‘āiga o le tupu.
12. ‘Ona tula‘i ai lea o le tupu i le po, ‘ua fa‘apea ane i ana ‘au‘auna, “So‘u fa‘aali atu nei ‘iā te ‘outou le mea ‘ua faia e Suria ‘iā te i tatou. ‘Ua iloa e i latou ‘ua tatou matelaina, o le mea lea ‘ua latou o ai i tua o le toagalauapi e lalafi i le vao, ‘ua fa‘apea i latou, ‘Pe a latou ō atu i tua o le ‘a‘ai, ‘ona tatou pupu‘e ola lea ‘iā te i latou ma tatou ō mai i le ‘a‘ai.’”
13. ‘Ona tali mai ai lea o le tasi o ana ‘au‘auna, ‘ua fa‘apea mai, “Se‘i ‘ave nisi solofanua e lima o totoe, ‘ua i ai pea i le ‘a‘ai, (fa‘auta, ‘ua latou pei o le vao tagata o Isaraelu o ē totoe ai, fa‘auta, pei o le vao tagata o Isaraelu lava, ‘ua fa‘aumatia,) tatou te ‘a‘auina atu se‘ia iloa.”
14. ‘Ona latou ‘ave lea o solofanua o kariota e lua, ‘ua ‘a‘auina atu e le tupu i le toagalauapi a Suria, ‘ua fa‘apea atu, “‘Inā ō ia, ‘ia ‘outou va‘ava‘ai.”
15. ‘Ona latou mulimuli lea ‘iā te i latou, ‘ua o‘o i Ioritana; fa‘auta fo‘i, ‘ua fola solo i le ala uma o ‘ofu ma ipu, na lafoa‘i e Suria i lo latou sōsōla fa‘aatuatuvale. ‘Ona fo‘i mai ai lea o ē na ‘a‘auina, ‘ua ta‘u mai i le tupu.
16. ‘Ona ō atu ai lea o le nu‘u, ‘ua vete le toagalauapi a Suria. ‘Ona fa‘ataulia lea o le sea o falaoa lelei i le sekeli ma le lua o sea o karite i le sekeli, e pei o le afioga a le ALI‘I.
17. ‘Ona tofia lea e le tupu lenā ali‘i sa toto‘o ai o ia i lona lima, ‘ia leoleo e ia le faitoto‘a. ‘Ona galuvaea lava lea o ia e le nu‘u i le faitoto‘a, ‘ona oti ai lea, e pei o le ‘upu a le tagata o le Atua, na ia fai atu ai ‘ina ‘ua alu ifo le tupu ‘iā te ia.
18. ‘Ona taunu‘u ai lea o le mea na fai atu ai le tagata o le Atua i le tupu, ‘ua fa‘apea, “E lua sea o karite i le sekeli ma le sea o falaoa lelei i le sekeli, e faia lea i le itū aso fa‘apenei a taeao i le faitoto‘a o Samaria.”
19. A ‘ua tali mai lenā ali‘i i le tagata o le Atua, ‘ua fa‘apea mai, “Fa‘auta ‘ea, ‘āfai e faia e le ALI‘I ni faitoto‘a i le lagi e ‘iloga ‘ea e o‘o lenā mea?”‘Ona tali atu ai lea o ia, “Fa‘auta mai, ‘e te iloa ai lava i ou fofoga, a ‘e te lē ‘ai ai.”
20. ‘Ua taunu‘u fo‘i ‘iā te ia, auā na galuvaea o ia e le nu‘u i le faitoto‘a, ‘ua oti ai.