1. ‘Ua fa‘alogo ai le tupu o Esekia, ‘ona saei ai lea e ia ona ‘ofu, ‘ua lavalava i le ‘ie talatala, ‘ona ulufale ai lea o ia i le fale o le ALI‘I.
2. ‘Ua na ‘a‘auina atu fo‘i o Eliakimo o lē pule i le ‘āiga, ma Sevena le tusi‘upu, ‘atoa ma toeaina o le ‘au ositaulaga, ‘ua lavalava i ‘ie talatala, e ō ane ‘iā Isaia le perofeta le atali‘i o Amota.
3. ‘Ua latou fai atu ‘iā te ia, “O lo‘o fa‘apea ‘ona fetalai mai o Esekia, o le aso nei, o le aso o le puapuagā ma le a‘oa‘iga ma le fāifai, auā ‘ua o‘o ‘ina a fānau o tama, ‘ae leai se malosi e fānau mai ai.
4. Atonu e fa‘afofoga mai le ALI‘I lou Atua i ‘upu uma a Ravesaki, o lē ‘ua ‘auina mai e le tupu o Asuria lona ali‘i e fāifai i le Atua soifua ma taui atu i ‘upu ‘ua fa‘afofogaina e le ALI‘I lou Atua; o lea ‘ia e tatalo ai mo ē ‘ua totoe.”
5. ‘Ona ō atu ai lea o ‘au‘auna a le tupu o Esekia ‘iā Isaia.
6. ‘Ona fai mai lea o Isaia ‘iā te i latou, “‘Ia ‘outou fai atu fa‘apea i lo ‘outou ali‘i, ‘O lo‘o fa‘apea ‘ona fetalai mai o le ALI‘I: ‘Aua ‘e te mata‘u i ‘upu ‘ua e fa‘alogo ai, ‘ua fāifaia mai ai a‘u e ‘au‘auna a le tupu o Asuria.
7. Fa‘auta, ‘ou te tu‘u atu ‘iā te ia le agaga, na te fa‘alogo fo‘i i le tala, ‘ona fo‘i atu ai lea o ia i lona lava nu‘u; ‘ou te fasioti fo‘i ‘iā te ia i le pelu i lona lava nu‘u.’”
8. ‘Ona fo‘i atu ai lea o Ravesaki, ‘ua na iloa fo‘i le tupu o Asuria ‘ua tau ma Lipena; auā na ia fa‘alogo ‘ua alu ‘ese o ia i Lakisa.
9. ‘Ua ia fa‘alogo fo‘i i le tala ‘iā Tiraka le tupu o Aitiope, ‘ua fa‘apea ane, “Fa‘auta, ‘ua sau o ia e si‘i le tau‘a ‘iā te oe;” ‘ona toe tu‘u atu lea e ia o le sāvali ‘iā Esekia, e fa‘apea atu:
10. “‘Ia fa‘apea ‘ona ‘outou fai atu ‘iā Esekia le tupu o Iuta, ‘ia fa‘apea atu: ‘Aua ne‘i pelogia oe e lou Atua ‘ua e fa‘atuatua i ai, o lo‘o fa‘apea ane, E lē tu‘uina Ierusalema i le lima o le tupu o Asuria.
11. Fa‘auta mai ‘ea, ‘ua e fa‘alogo i mea ‘ua faia e tupu o Asuria i nu‘u uma lava, ‘ua fa‘aumatia lava, ‘ae lavea‘iina ‘ea oe?
12. Pe na lavea‘i ‘ea atua o nu‘u ‘iā te i latou na fa‘aumatia e o‘u tamā, o le nu‘u o Kosane, ma Karana, ma Resefa, ‘atoa ma le fānauga a Etena sa i Tilasa?
13. O fea o i ai le tupu o Amato ma le tupu o Arepa, ‘atoa ma le tupu o le ‘a‘ai o Sefavaima, o Ena ma Iva?”
14. ‘Ua talia e Esekia le tusi nai lima o le sāvali, ‘ua faitau ai; ‘ona alu a‘e ai lea o Esekia i le fale o le ALI‘I ma fofola atu ai i luma o le ALI‘I.
15. ‘Ona tatalo atu ai lea o Esekia i luma o le ALI‘I, ‘ua fa‘apea atu, “Le ALI‘I e, le Atua o Isaraelu, o lē afio i le vā o kerupi, o oe lava, na o oe, o le Atua o mālō uma o le lalolagi, na e faia le lagi ma le lalolagi.
16. Le ALI‘I e, ‘ia e liliu mai ou fofoga ma ‘ia fa‘afofoga mai; le ALI‘I e, ‘ia silasila mai ou fofoga, ma ‘ia e silafia ma ‘ia fa‘afofoga, mai i ‘upu a Sanerivi, o lē ‘ua ‘auina mai le tasi o fāifai i le Atua soifua.
17. Le ALI‘I e, e moni ‘ua fa‘atafunaina e tupu o Asuria o nu‘u ‘atoa ma o latou lau‘ele‘ele.
18. ‘Ua latou lafoina atu fo‘i o latou atua i le afi, auā e lē ni atua i latou, a o mea na faia e lima o tagata, o la‘au ma ma‘a; o le mea lea ‘ua latou fa‘aumatia ai i latou.
19. O lenei, le ALI‘I e lo matou Atua, ‘ou te ‘ai‘oi atu, ‘ia e fa‘aola mai ‘iā te i matou a‘i lona lima; ‘ina ‘ia iloa ai e mālō uma o le lalolagi, o oe lava o le ALI‘I o le Atua oe, na o oe lava.”
20. ‘Ona ‘auina lea e Isaia le atali‘i o Amota o le tasi ‘iā Esekia, ‘ua fa‘apea atu, “O lo‘o fa‘apea ‘ona fetalai mai o le ALI‘I le Atua o Isaraelu: ‘Ua ‘ou fa‘alogo lava i lau tatalo ‘iā te a‘u ‘iā Sanerivi le tupu o Asuria.
21. O le afioga lenei ‘ua tulei mai ai e le ALI‘I ‘iā te ia:‘‘Ua ‘ino‘ino ‘iā te oe le tama fafine taupou a Siona,‘ua fa‘atauemu o ia ‘iā te oe,‘ua lialia‘i e le tama fafine a Ierusalema lona ulu ‘iā te oe.
22. ‘O ai ‘ea ‘ua e ‘upu leaga i ai ma e fāifai i ai?O ai ‘ea ‘ua e fai i ai ‘upu fa‘asausili ma e fa‘asiasia i ai?O le Pa‘ia lava o Isaraelu.
23. O āu sāvali ‘ua e ‘upuleaga ai i le Ali‘i,‘ua e fa‘apea ane,“‘Ua ‘ou alu a‘e ma le tele o o‘u kariotai tumutumu o mauga i itū o Lepanona;‘ou te tatu‘uina fo‘i ona arasi maualuluga ma ona perosi silisili;‘ou te ulu atu fo‘i i mea e moe ai mālō i ona tuā‘oi i lona vao lafulemū:
24. ‘Ua ‘ou ‘eli ma ‘ou inu i vai ‘ese,‘ua ‘ou fa‘amateina i o‘u alofivae o vaitafe uma o nu‘u nofo ‘olo.”
25. ‘Po ‘ua e lē fa‘alogo ‘ea na ‘ou faia lea mea anamua,na ‘ou saunia fo‘i i aso muamua?A o ona po nei ‘ua ‘ou fa‘ataunu‘u ai,‘ina ‘ia fai e oe o ‘a‘ai nofo ‘olo ma faupuega mea fa‘atafunaina.
26. O le mea lea na pupu‘u ai lima o ē sa nonofo ai,na fefefe i latou ma māsiasi;na latou fa‘apei o le mutia o le fanua ma le vao mu‘a lauolaola,pei o le mutia fo‘i i luga o fale,pei o saito fo‘i ‘ua mamae a o le‘i o‘o ‘ina matua.
27. “‘‘Ua ‘ou iloa fo‘i lou nofo i lalo,‘atoa ma lou ulufafo ma lou ulufale,‘atoa ma lou ita tele ‘iā te a‘u.
28. ‘Ua o‘o mai i o‘u taliga lou ita tele ‘iā te a‘u ma lou fa‘asiasia;o le mea lea ‘ou te tu‘u ai la‘u mama i lou isu ma la‘u fa‘agutu i ou laugutu,‘ou te fa‘afo‘i atu ai ‘iā te oe i le ala na e sau ai.
29. “‘‘Ona fai atu lea o Isaia i le tupu o Esekia ‘ua fa‘apea atu: O le fa‘ailoga fo‘i lenei ‘iā te oe; o le tausaga nei tou te ‘a‘ai ai i mea ‘ua tutupu fua, tou te ‘a‘ai fo‘i i lona lua o tausaga o mea e tutupu fua ai; a o le tausaga e tolu ‘ia ‘outou lūlū ai saito ma ‘ia ‘outou selesele, ‘ia ‘outou totōina tōvine ma ‘ia ‘outou ‘a‘ai i o latou fua.
30. O ē o totoe o le ‘āiga o Iuta ‘ua sao, e toe sosolo i lalo o latou a‘a ma fua mai ni fua i luga.
31. Auā e ō atu e o totoe nai Ierusalema, o ē ‘ua sao fo‘i e ō atu nai le mauga o Siona; e faia lenei mea e le mā‘elegā o le ALI‘I.
32. “‘O le mea lava lea o lo‘o fa‘apea ‘ona fetalai mai ai o le ALI‘I i le tupu o Asuria: E lē sau lava ia i lenei ‘a‘ai, e lē fana mai ai fo‘i se ū, e lē sau fo‘i i ai ma se talitā, e lē tanu ai fo‘i se mea mauti‘eti‘e.
33. O lo‘o fa‘apea mai le ALI‘I, O le ala na sau ai o ia, o le ala lava lea e toe fo‘i atu ai, ‘ae lē sau lava ia i totonu o le ‘a‘ai nei.
34. Auā ‘ou te fa‘amamaluina le ‘a‘ai nei ‘ia ola ‘ona o a‘u nei lava, ‘ona o Tavita fo‘i la‘u ‘au‘auna.’”
35. O lea lava po na alu atu ai le agelu a le ALI‘I, ‘ua fasi i le togālauapi o Asuria o tagata e selau afe ma afe e valu sefulu ma afe e lima. ‘Ua ala o latou na totoe i le taeao lava, fa‘auta, o tagata oti i latou uma.
36. ‘Ona alu ‘ese ai lea o Sanerivi le tupu o Asuria, ‘ua alu ma fo‘i atu i Nineva, ‘ua nofo ai.
37. Sa ifo o ia i le fale o Nisero lona atua, ‘ona fasia lea o ia e ona atali‘i o Atameleko ma Salese; ‘ona la sōsōla ai lea i le nu‘u o Ararata. ‘Ona soloa‘i ane ai lea o Esarata lona atali‘i e fai ma tupu.#