1. O le lua o tausaga o Ioasa le atali‘i o Ioasasa le tupu o Isaraelu na fai ai ma tupu Amasia le atali‘i o Ioasa le tupu o Iuta.
2. O le luafulu ma le lima o ona tausaga na fai ai o ia ma tupu; e luafulu ma le iva fo‘i o tausaga na fai ai o ia ma tupu i Ierusalema. O le igoa fo‘i o lona tinā o Ioatana, o le Ierusalema ia.
3. Na ia faia fo‘i le amiotonu i luma o le ALI‘I, ‘ae le‘i fa‘apei o Tavita lona tamā; na ia faia mea uma fa‘apei ‘ona faia e lona tamā o Ioasa.
4. ‘Ae peita‘i na lē ‘ave‘eseina mea maualuluga; na faia pea e le nu‘u o taulaga ma latou fa‘amū mea manogi i mea maualuluga.
5. ‘Ua o‘o ‘ina uamau le mālō ‘iā te ia, ‘ona ia fasioti lea i ana ‘au‘auna o ē na fasi, lona tamā le tupu.
6. A ‘ua na lē fasiotia fānau a ‘ia fasi tagata, e tusa ma le ‘upu ‘ua tusia i le tusi o le tulafono a Mose, na poloa‘i mai ai le ALI‘I, ‘ua fa‘apea mai, “‘Aua ne‘i fasiotia tamā e sui a‘i le fānau, ‘aua ne‘i fasiotia fo‘i le fānau e sui a‘i o latou tamā; a ‘ia ta‘itasi le tagata ma fasiotia o ia ‘ona o lana lava agasala.”
7. Na ia fasia Etoma e sefulu afe i le vanu masima; ‘ua fao mai fo‘i Sela i le tau‘a, ‘ua fa‘aigoa ai fo‘i o Iokatielu, ‘ua o‘o mai i le aso nei.
8. ‘Ona ‘auina atu ai lea e Amasia o le sāvali ‘iā Ioasa le atali‘i o Ioasasa le atali‘i o Ieu le tupu o Isaraelu, ‘ua fa‘apea atu, “Maliu mai ia, se‘i tā fesilafa‘i.”
9. ‘Ona tali mai ai lea o Ioasa le tupu o Isaraelu ‘iā Amasia le tupu o Iuta, ‘ua fa‘apea mai, “Na ‘ave le fe‘au a le la‘au talatala o i Lepanona i le arasi o i Lepanona, ‘ua fa‘apea atu, ‘‘Aumai ia lou afafine e fai ma avā a lo‘u atali‘i;’ a ‘ua ui ane le manu fe‘ai sa i Lepanona, ‘ua soli i le la‘au talatala.
10. ‘Ua e fasia lava Etoma, ‘ua fa‘amaualugaina ai lou loto; mitamita ia i lea mea ma nofo pea i lou fale; ‘e te fa‘atupu le leaga i se a, ‘ina ‘ia malaia ai oe ‘atoa ma Iuta fa‘atasi ma oe?”
11. A ‘ua lē fa‘alogo mai Amasia; ‘ona alu a‘e ai lea o Ioasa le tupu o Isaraelu, ‘ua la feiloa‘i o ia ma Amasia le tupu o Iuta i Petesemesa le ‘a‘ai o Iuta.
12. ‘Ona fasia lea o Iuta e Isaraelu, ‘ua latou ta‘itasi ma sola i o latou fale ‘ie.
13. ‘Ona pu‘e ai lea e Ioasa le tupu o Isaraelu ‘iā Amasia le tupu o Iuta, le atali‘i o Ioasa, le atali‘i ia o Aasaia i Petesemesa, ‘ua ō mai i Ierusalema; ‘ona lepeti ai lea e ia o le pā o Ierusalema, e amata i le faitoto‘a o Efaraima e o‘o i le faitoto‘a o le tulimanu, o kupita e fa selau.
14. ‘Ua na ‘ave fo‘i auro ma ario uma, ‘atoa ma ipu uma sa maua i le fale o le ALI‘I ma mea e teu ai ‘oloa i le fale o le tupu, ‘atoa ma ni ali‘i e fai ma fa‘afo‘i ita. ‘Ona fo‘i atu ai lea o ia i Samaria.
15. O toe o mea a Ioasa na faia e ia ma lona fitafita ma lo la tau‘a ma Amasia le tupu o Iuta, e le‘i tusia ‘ea i le tusi o tala i nofoa‘iga a tupu o Isaraelu?
16. ‘Ua ta‘oto fo‘i Ioasa fa‘atasi ma ona tamā, ‘ua tanumia i Samaria fa‘atasi ma tupu o Isaraelu; ‘ona soloa‘i ane ai lea o Ierepoamo lona atali‘i e fai ma tupu.
17. E sefulu ma le lima tausaga na ola ai Amasia le atali‘i o Ioasa le tupu o Iuta talu ‘ona mavae ‘ona oti o Ioasa le atali‘i o Ioasasa, le tupu o Isaraelu.
18. O toe o mea na faia e Amasia, e le‘i tusia ‘ea i le tusi o tala i nofoa‘iga a tupu o Iuta?
19. ‘Ua latou fōua o ia i Ierusalema; ‘ona sola ai lea o ia i Lakisa; a ‘ua ‘a‘auina nisi e tuliloa ‘iā te ia i Lakisa, ‘ua latou fasioti ‘iā te ia i lea mea.
20. ‘Ona latou ‘aumai ai lea ‘iā te ia i luga o solofanua; ‘ua tanumia o ia i Ierusalema fa‘atasi ma ona tamā i le ‘a‘ai o Tavita.
21. ‘Ona ‘ave ai lea e le nu‘u o Iuta uma o Asaraia i le sefulu ma le ono tausaga o lona ola ma ‘ua fai o ia ma tupu e sui ai lona tamā o Amasia.
22. ‘Ua ia faia Elata ma na toe tu‘uina mai ‘iā Iuta ‘ina ‘ua ta‘oto le tupu fa‘atasi ma ona tamā.
23. O le sefulu ma le lima o tausaga o Amasia le atali‘i o Ioasa le tupu o Iuta, na fai ai ma tupu i Samaria o Ierepoamo le atali‘i o Ioasa le tupu o Isaraelu, e fagafulu ma le tasi tausaga na ia pule ai.
24. Na ia faia le amio leaga i luma o le ALI‘I, na ia le te‘a ‘ese lava i agasala uma a Ierepoamo le atali‘i o Nepata o lē na fa‘atupu le agasala ‘iā Isaraelu.
25. Na ia toe si‘i atu le tuā‘oi o Isaraelu, e amata i le ala e ui atu ai i Amato, e o‘o i le sami o i le ‘ele‘ele laugatasi, fa‘apei o le afioga a le ALI‘I le Atua o Isaraelu, na tulei mai ‘iā Iona lana ‘au‘auna o le atali‘i o Amitai, o le perofeta o Kataferu.
26. Auā ‘ua silafia e le ALI‘I le puapuagā o Isaraelu ‘ua matuā tele lava; ‘ua lē toe se pologa, ‘ua lē toe se sa‘oloto, ‘ua leai fo‘i se fesoasoani ‘iā Isaraelu.
27. A ‘ua lē fetalai mai le ALI‘I e sōloi‘esea e ia le igoa o Isaraelu i lalo o le lagi; a o le lima o Ierepoamo le atali‘i o Ioasa na ia fa‘aolaina ai i latou.
28. O toe o mea na faia e Ierepoamo, ‘atoa ma mea uma na ia faia ma lona fitafita na ia fai ai tau‘a, ma na toe fao mai ai mo Isaraelu o Tamaseko ma Amato, na ‘iā Iuta; e le‘i tusia ‘ea i le tusi o tala i nofoa‘iga a tupu o Isaraelu?
29. ‘Ua ta‘oto fo‘i Ierepoamo fa‘atasi ma ona tamā, fa‘atasi ma tupu o Isaraelu; ‘ona soloa‘i ane ai lea o lona atali‘i o Sakaria e fai ma tupu.