1. O Naamanu le ali‘i e pule i ‘au a le tupu o Suria, o le tagata aogā ia i lona ali‘i, ma le ta‘ua lava, auā o ia na o‘o mai ai le manuia mai le ALI‘I i Suria; o ia fo‘i o le toa malosi, a o le lepela ia.
2. Na ō atu ‘au a Suria, na latou ‘aumai fo‘i mai le nu‘u o Isaraelu le tasi teineitiiti o le tau‘a, ‘ua fai ma ‘au‘auna a le avā a Naamanu.
3. ‘Ua fai atu ia i lona matai tama‘ita‘i, “Se anoa! ana i ai lo‘u ali‘i le perofeta o i Samaria, po ‘ua fa‘ate‘aina e ia lona lepela.”
4. ‘Ona alu atu ai lea o le tasi, ‘ua tala atu i lona ali‘i, ‘ua fa‘apea atu, Sa fa‘apea ma fa‘apea ‘upu a le teine mai le nu‘u o Isaraelu.
5. ‘Ona fai mai ai lea o le tupu o Suria, “Sau ia, ‘inā e alu, ‘ou te avatu se tusi i le tupu o Isaraelu.”‘Ona alu ai lea o ia, ‘ua ‘ave e ia taleni ario e sefulu, ma sekeli auro e ono gaafe, ‘atoa ma ‘ofu e sefulu.
6. ‘Ua avatu e ia le tusi i le tupu o Isaraelu, ‘ua fa‘apea le tusi, “A o‘o atu lenā tusi ‘iā te oe ‘e te silafia ai ‘ua ‘ou ‘auina atu ‘iā te oe o la‘u ‘au‘auna o Naamanu, ‘ina ‘ia e fa‘ate‘a ‘iā te ia lona lepela.”
7. ‘Ua faitau e le tupu o Isaraelu le tusi, ‘ona saei lea e ia ona ‘ofu, ‘ua fa‘apea ane, “O a‘u ‘ea o le Atua o fasi oti ma fa‘aola, ‘ua ‘auina mai ai e lenā tagata ‘iā te a‘u e fa‘ate‘a se tagata i lona lepela? ‘Inā mānatunatu ia ma ‘ia ‘outou iloa, ‘ua sā‘ili e ia se mea e fa‘alani ai se tau‘a ‘iā te a‘u.”
8. A ‘ua lagona e Elisaia le tagata o le Atua ‘ua saei e le tupu o Isaraelu ona ‘ofu, ‘ona ‘ave lea o le fe‘au ‘iā te ia, ‘ua fa‘apea atu, “Se a ‘ea le mea ‘ua e saei ai ou ‘ofu? ‘Ia sau lava ia ‘iā te a‘u, ‘ona iloa ai lea e ia o lo‘o ‘iā Isaraelu le perofeta.”
9. ‘Ona sau ai lea o Naamanu ma ana solofanua ma lona nofoa fa‘ata‘avalevale, ‘ua tu mai i le faitoto‘a o le fale o Elisaia.
10. ‘Ona ‘auina atu lea e Elisaia o le ‘au‘auna ‘iā te ia, ‘ua fa‘apea atu, “‘Inā alu ia, ‘inā tā‘ele fa‘afitu i Ioritana, ‘ona toe fo‘i mai ai lea o lou tino tuai ‘iā te oe, ‘ona e mamā ai lea.”
11. ‘Ona ita lava lea o Naamanu ma alu ‘ese, ‘ua fa‘apea ane, “Fa‘auta, na ‘ou fa‘apea, e sau lava ia i fafo ma tu mai ma vala‘au i le suafa o le ALI‘I lona Atua, ma tālo lona lima i le mea ‘ua i ai le ma‘i e fa‘ate‘a ai i le lepela.
12. E lē sili ‘ea ‘ona lelei o Apana ma Farapa, o vaitafe ia o Tamaseko, i vai uma o Isaraelu? ‘Ou te lē tā‘ele ai ‘ea ma ‘ou mamā ai?” ‘Ona liliu ai lea o ia, ‘ua alu ma le ita tele?
13. A ‘ua fa‘alatalata ane ana ‘au‘auna, ‘ua fai ane ‘iā te ia, ‘ua fa‘apea ane, “Sena e, ana fai atu e le perofeta se mea tele ‘iā te oe, ‘e te lē faia ‘ea? A o lenei, ‘e te lē faia ‘ea ‘ina ‘ua ia fai atu ‘iā te oe, ‘‘E te tā‘ele, ‘e te mamā ai?’”
14. ‘Ona alu ifo ai lea o ia, ‘ua fufui fa‘afitu i Ioritana, e tusa ma le ‘upu a le tagata o le Atua, ‘ona fo‘i mai ai lea o lona tino tuai pei o le tino o le tamaitiiti, ‘ua mamā fo‘i ia.
15. ‘Ona fo‘i mai ai lea o ia i le tagata o le Atua, o ia ma i latou uma sa ‘iā te ia, ‘ua sau, ‘ua tu mai i ona luma, ‘ua fa‘apea mai, “Fa‘auta mai, ‘ua ‘ou iloa nei e leai se atua i le lalolagi uma, ‘ua na o i Isaraelu lava; o lenei fo‘i, ‘ia e talia se mea alofa a lau ‘au‘auna.”
16. A ‘ua fai atu ia, “O lo‘o soifua le ALI‘I, o lē ‘ou te tu a‘u nei i ona luma, ‘ou te lē talia se mea.”‘Ona tauānau mai lea o ia ‘iā te ia ‘ia na talia; a ‘ua lē mafai lava o ia.
17. ‘Ona fai mai ai lea o Naamanu, “E le foa‘iina mai ‘ea i lau ‘au‘auna ni avega a ‘ele‘ele a ni falata se lua? auā e lē toe faia e lau ‘au‘auna se taulaga mū po o se isi taulaga i atua ‘ese, na o le ALI‘I lava.
18. A ‘ia fa‘amāgalo mai e le ALI‘I i lau ‘au‘auna i lenei mea, pe a alu lo‘u ali‘i i le fale o Rimoni e ifo ai, e toto‘o fo‘i o ia i lo‘u lima, ‘ou te ifo fo‘i a‘u i le fale o Rimoni, pe a ‘ou ifo i le fale o Rimoni, ‘ia fa‘amāgalo e le ALI‘I i lau ‘au‘auna i lenā mea.”
19. ‘Ona fai atu ai lea o ia ‘iā te ia, “‘Inā maliu ia oe ma le manuia.” ‘Ona alu ai lea o ia, e le‘i fa‘amamao fo‘i.
20. ‘Ona fa‘apea lea o Kiasi le ‘au‘auna a Elisaia le tagata o le Atua, “Fa‘auta, ‘ua tu‘itu‘i e lo‘u ali‘i mea a lenā Suria o Naamanu i lona lē talia le mea ‘ua na ‘aumai; o lo‘o soifua le ALI‘I, ‘ou te tuliloa ‘iā te ia, ‘ou te maua ai se mea ‘iā te ia.”
21. ‘Ona tuliloa lea o Kiasi ‘iā Naamanu. ‘Ua iloa mai fo‘i e Naamanu o ia ‘ua momo‘e atu ‘iā te ia, ‘ona alu ifo lea o ia i le nofoa fa‘ata‘avalevale e fa‘afetaia‘i ‘iā te ia, ‘ua fa‘apea mai, “Pe se a le fe‘au ‘e te sau ai?”
22. ‘Ona fai atu lea o ia, “‘Ou te sau; ‘ua ‘auina mai a‘u e lo‘u ali‘i e fai atu, ‘Fa‘auta, ‘ua ō mai nei lava ‘iā te a‘u o taulele‘a e to‘alua, o so‘o o le ‘au perofeta, mai le mauga o Efaraima, se‘i avane mo i lā‘ua o le taleni ario e tasi, ‘atoa ma ‘ofu o lua.’”
23. ‘Ona fai mai lea o Naamanu, “‘Inā usita‘i mai ia, ‘ia e ‘ave taleni e lua.” ‘Ua ia finau mai fo‘i ‘iā te ia, ‘ua fafao taleni ario e lua i taga e lua, ‘atoa ma ‘ofu e lua, ‘ua tu‘u atu i ana ‘au‘auna e to‘alua, ‘ua la ‘avea, ‘ua muamua i ona luma.
24. ‘Ua o‘o fo‘i i le mauga, ‘ona ‘avea lea e ia o mea sa ‘iā te i lā‘ua, ‘ua tu‘u i le fale ‘ua na fa‘afo‘i atu ia tagata, ‘ona ō ai lea o i lā‘ua.
25. A ‘ua ulufale atu o ia, ‘ua tu‘u i luma o lona ali‘i. ‘Ona fai mai lea o Elisaia ‘iā te ia, “Kiasi e, na e ifea ‘ea?”‘Ona tali atu lea o ia, “E le‘i alu lava lau ‘au‘auna i se mea lava.”
26. ‘Ona fai mai ai lea o ia ‘iā te ia, “Lua te le‘i ō ‘ea ma lo‘u loto, ‘ina ‘ua toe fo‘i mai le tagata nai lona nofoa fa‘ata‘avalevale e fa‘afetaia‘i ‘iā te oe? O ona po nei ‘ea e talia ai ario ma talia ai ‘ofu ma tōolive ma tōvine ma mamoe ma povi ma ‘au‘auna tane ma ‘au‘auna fafine?
27. O le mea lea o le a pipi‘i atu ai ‘iā te oe ma au fānau le lepela o Naamanu i āu tupulaga.”‘Ona alu ‘ese ai lea o ia i ona luma, ‘ua lepelā lava pei o le kiona.#